الماتىلىق كوماندا ەل بىرىنشىلىگىندە ميسسياسىن ورىنداپ قويعان سوڭ, باس باپكەر الەكسەي شپيلەۆسكي قالعان ويىنداردا الاڭعا قارسىلاستارعا ۇپاي سىيلاۋ ءۇشىن ەمەس, مەيىلىنشە بارلىق ويىندا جەڭىسكە جەتۋ ءۇشىن شىعامىز دەگەن بولاتىن. دەسە دە «قايرات» بۇل تۋردا «قايسارمەن» كۇش سىناسىپ, تەگەۋرىندى قارسىلىققا تاپ بولدى. نەگىزگى قۇرامنىڭ بىرقاتار ويىنشىسىنا دەمالىس بەرىپ, جاسىل الاڭعا قوسالقى قۇرامداعى فۋتبولشىلارىن شىعارعان الماتىلىق ۇجىم قورعاۋشى سەرگەي كەيلەر مەن جارتىلاي قورعاۋشى كونراد ۆرجەششينسكيدىڭ سوققان گولدارىنىڭ ارقاسىندا كەزدەسۋدىڭ 70-مينۋتىنا دەيىن 2:0 ەسەبىمەن الدا تۇرعان-دى. ويىننىڭ 70-مينۋتىندا «قايساردىڭ» سۇرمەرگەنى ەلگۋدجا لوبجانيدزە گول سوعىپ, ەسەپ ايىرماسىن قىسقارتتى. 89-مينۋتتا يۆان گراف مەرگەندىگىمەن كوزگە ءتۇسىپ, كومانداسىنا ءبىر ۇپاي سىيلادى. كەيىنگى ءۇش ويىندا جەڭىلىس تاپقان «قايسار» ۇزاق كۇتتىرگەن ءبىر ۇپايىنا قول جەتكىزدى. ال نەگىزگى قۇرامنىڭ فۋتبولشىلارىنسىز, ەڭ باستىسى, ۆاگنەر لاۆسىز ويناعان چەمپيوندار قولدا تۇرعان 3 ۇپايىنان ايىرىلىپ قالدى. «قايراتتىڭ» تۋرنير كەستەسىندە 45 ۇپايمەن ءبىرىنشى ورىندا قالعانى ايتپاسا دا تۇسىنىكتى شىعار. ال «قايسار» 21 ۇپايمەن بەسىنشى ورىنعا كوتەرىلدى.
«تاراز» بەن «شاحتەر» كوماندالارى اراسىندا وتكەن ويىننىڭ ءۇشىنشى مينۋتىندا «تاراز» شابۋىلشىسى سەرج نيۋادزي ءوز ايىپ الاڭىندا قولمەن ويناعانى ءۇشىن قىزىل قاعاز الىپ, الاڭنان قۋىلعاننان كەيىن جانە «كەنشىلەر» كومانداسىنىڭ شابۋىلشىسى ارسەن حۋبۋلوۆ 11 مەترلىك ايىپ دوبىن ءساتتى ورىنداعان سوڭ بۇل باسەكەدە قاي كلۋبتىڭ جەڭىسكە جەتەتىنى بەلگىلى بولدى. ءبىرىنشى تايمنىڭ 28-مينۋتىندا ءدال وسى حۋبۋلوۆ دۋبل اۆتورى اتاندى. ال ۇلتتىق قۇراماعا شاقىرتۋ العان «تاراز» قاقپاشىسى مۇحاممەدجان سەيسەن 40-مينۋتتا ءوز قاقپاسىنا گول سوعىپ الدى.
ەكىنشى تايمدا ءۇش گول جانە ءبىر ويىنشى باسىمدىعىمەن الدا بولعان «شاحتەر» ءبىراز ەركىنسي باستادى. سونىڭ سالدارىنان 73-مينۋتتا «تاراز» كلۋبىنىڭ قوسالقى قۇرامىنان الاڭعا شىققان ابىلايحان جۇمابەك كوزگە تۇسسە, اراعا ءبىر مينۋت سالىپ توني سيلۆا ءوز كومانداسىنىڭ ەكىنشى گولىن سوقتى. ماتچ سوڭىنا دەيىن «تاراز» كلۋبىنىڭ گول سوعاتىن بىرنەشە مۇمكىندىگى بولعانىمەن, ءتيىمدى پايدالانا المادى. قورىتىندى ەسەپ – 4:2. بۇل وسى تۋرداعى ەڭ ناتيجەلى ويىن بولدى. «شاحتەر» وسى جەڭىستىڭ ارقاسىندا 23 ۇپايمەن 5-ورىنعا كوتەرىلدى. «تاراز» 17 ۇپايمەن 8-ورىندا تۇر.
كۇمىس جۇلدەدەن ۇمىتكەر كلۋبتىڭ ءبىرى – قوستانايدىڭ «توبىلى» بۇل تۋردا تۋرنير كەستەسىندە تومەنگى ورىندارعا جايعاسقان پەتروپاۆلدىڭ «قىزىلجار» كومانداسىمەن كەزدەسىپ, تارتىستى وتكەن ويىندا 1:0 ەسەبىمەن باسىم ءتۇستى. كەزدەسۋدەگى جالعىز ءارى جەڭىستى گولدى قورعاۋشى تەمىرلان ەرلانوۆ سوقتى. «توبىل» اۋتسايدەر كوماندانى ءبىر دوپ ايىرماشىلىعىمەن ارەڭ جەڭسە دە, باستىسى, ماڭىزدى ءۇش ۇپايىنا قول جەتكىزدى. ءسويتىپ تۋرنير كەستەسىندە ەكىنشى ورىنعا كوتەرىلىپ, ءۇشىنشى ورىندا تۇرعان «استانادان» بەس ۇپايعا وزىپ كەتتى. بىراق ەلوردالىقتاردىڭ ءبىر ويىنى كەم. وسىلايشا چەمپيوناتتاعى ەكىنشى ورىن ءۇشىن تارتىس كۇشەيە ءتۇستى. 16 ۇپايى بار «قىزىلجار» 9-ورىنعا جايعاستى.
تۋردىڭ سوڭعى ويىنىندا «وقجەتپەس» كلۋبى تالدىقورعاننىڭ «جەتىسۋ» كومانداسىنان جەڭىلىپ, تۋرنير كەستەسىندەگى جاعدايىن ودان ءارى ناشارلاتىپ الدى. 11 ۇپايمەن 11-ورىندا كەلە جاتقان كوكشەتاۋلىقتاردىڭ ءبىر ساتى جوعارىلاۋىنا وڭتايلى ءسات تۋعان ەدى. الايدا 10-ورىندا تۇرعان «كاسپيدىڭ» بۇل تۋرداعى دەمالىسىن ءساتتى پايدالانا الماي, قاۋىپتى ايماقتا قالىپ قويدى. كەزدەسۋدەگى جالعىز ءارى جەڭىس گولىن ويىننىڭ 21-مينۋتىندا «جەتىسۋ» ويىنشىسى نەناد اداموۆيچ سوقتى. ءۇش ۇپاي ەنشىلەگەن «جەتىسۋ» تۋرنير كەستەسىندە 22 ۇپايمەن 6-ورىنعا كوتەرىلدى.
چەمپيوناتتا باق سىناپ جاتقان كوماندالار قىسقا مەرزىمدى ۇزىلىسكە شىقتى. ويتكەنى وسى اپتادا ۇلتتىق قۇرامالار «ۇلتتار ليگاسى» اياسىنداعى سوڭعى تۋر ويىندارىن وتكىزەدى. س ديۆيزيونىندا ونەر كورسەتەتىن قازاقستان قۇراماسى 15 قاراشادا سىرت الاڭدا البانيامەن, 18 قاراشادا الماتىنىڭ ورتالىق ستاديونىندا ليتۆا فۋتبولشىلارىمەن كەزدەسەدى. البانيا قۇراماسىمەن وتەتىن ويىنعا دەيىن جەرلەستەرىمىز بۇگىن پودگوريتسادا چەرنوگوريامەن جولداستىق ماتچ وتكىزەدى.
سونىمەن قاتار ىشكى بىرىنشىلىكتىڭ 18-تۋر ويىندارىنان كەيىن قازاقستان كاسىپقوي فۋتبول ليگاسى چەمپيوناتتاعى سوڭعى ءتورت تۋرىنىڭ كۇنتىزبەسىن جاريالادى. ليگا اكىمشىلىگى تۋرنيرگە قاتىسۋشى كوماندالاردىڭ قولداۋىمەن 4 تۋردىڭ ويىندارىن 10 كۇن ىشىندە وتكىزۋگە شەشىم قابىلداعانىن مالىمدەدى. ويىندار كەستەسىنىڭ تىعىزدىعىنا بايلانىستى ەندى كوماندالار تۋردىڭ بارلىق كەزدەسۋىن ءبىر كۇندە, كەي كەزدەرى ءبىر ۋاقىتتا وتكىزۋگە ءماجبۇر. كەزدەسۋلەردىڭ ءبىر بولىگى QAZSPORT تەلەارناسىنىڭ تىكەلەي ەفيرىندە كورسەتىلسە, ەكىنشى بولىگىن تەلەارنانىڭ qazsporttv.kz رەسمي سايتىندا تىكەلەي ەفيردە كورسەتۋ جوسپارلانعان.
