بۇل جادىگەر ءحىV عاسىردان بەرى قايدا ساقتالدى, قالاي تابىلدى؟ ول تۋرالى اشىق مالىمەت جوق. اتالمىش ەلدە كوشپەندىلەردىڭ ۇلتتىق مۇراسىن ناسيحاتتاۋمەن اينالىساتىن حالىقارالىق دارەجەدە بەدەلى بيىك «نامناا» اتتى اكادەميا بار ەكەن. شاپاندى وڭدەپ-جوندەپ, بۇرىنعى قالپىنا كەلتىرىپ ساتقان وسى ۇيىم.
بۇل اكادەميا ەرتە داۋىردەگى جاۋىنگەرلىك ونەردى جاڭعىرتۋمەن اينالىساتىن كورىنەدى. اسىرەسە شاۋىپ كەلە جاتىپ ات ۇستىندە ساداق اتۋدى كاسىبيلەندەرىپ يۋنەسكو كولەمىندە تانىتۋمەن شۇعىلدانۋدا.
سونىمەن قاتار ەرتە ءداۋىر, ورتا عاسىردا كوشپەندىلەر پايدالانعان ساداق ءھام جەبە تۇرلەرى, قورامساق, ساۋىت, ەر-تۇرمان, كيىم-كەشەك سياقتى جاۋىنگەرلىك ءمانى بار قۇرالداردى جاساپ, ساۋدالاۋمەن دە اينالىسادى ءھام كونە ءداۋىر جادىگەرلەرىن دە جينايتىن كورىنەدى.
جوعارىداعى شاپان بۇلاردىڭ قولىنا قالاي ءتۇسىپ ءجۇر ول جاعى بەلگىسىز. بىراق جادىگەر باسقا ەمەس تەك التىن ورداعا ءتان ەكەنى ونشاقتى جىل جۇرگىزىلگەن عىلىمي ساراپتاما نەگىزىندە تولىق دالەلدەنىپتى. سوعان قاراعاندا, شاپان موڭعولياعا رەسەي نەمەسە ورتا ازيا ەلدەرىنىڭ بىرىنەن باردى ما دەگەن بولجام شىندىققا جاقىن.
«Namnaa.com» سايتىندا جاريالانعان دەرەككە قاراعاندا, جادىگەر اسا بەرىك, وتە قىمبات, بەدەرلى سارى ءتۇستى جىبەك تورعىننان جاسالعان. سول سەبەپتى جەتى عاسىر بويى ب ۇلىنبەي بۇگىنگە جەتكەن. قولتىعىنىڭ ۇستىڭگى جاعىندا كيگەن ادام قولىن سىرتقا شىعاراتىن ارنايى تەسىگى بار. ەتنوگرافتار بۇل تەسىكتى ساداق اتۋعا ىڭعايلى بولۋ ءۇشىن جاساپ قويعان جىرىق دەيدى. شاپاننىڭ جاعاسى مەن كوكىرەك قاۋسىرماسى ادەمى قوڭىرقاي ءتۇستى ماتامەن قوس قاتار جيەكتەلىپ, التىن جىپپەن تىگىلگەن ەكەن.
