– ەلباسى كىتاپحاناسى ءبىلىم بەرۋ مەن مادەني باعىتتاعى مىندەتتەردى جۇزەگە اسىرۋدىڭ جاڭا مۇمكىندىكتەرىنە قول جەتكىزىپ وتىر. مەكەمەنىڭ مۋزەي, ارحيۆ, كىتاپحانا قورىن ۇشتاستىرعان جاڭا عيمارات قازىرگى جاستارعا رۋحاني, پاتريوتتىق تاربيە بەرۋدە, قۇندىلىقتار جۇيەسىن قالىپتاستىرۋدا ماڭىزدى ءرول اتقارۋدا. ەلباسىنىڭ «ەلىڭدى سۇيە بىلسەڭ, جان اياماي قىزمەت ەتە بىلسەڭ, ەلىڭ دە سەنى الاقانعا سالىپ ايالاي بىلەدى» دەگەنىندەي, ۇرپاقتى ەلىن سۇيۋگە تاربيەلەۋ جولىندا بارشا مۇمكىندىكتەرىمىزدى پايدالانىپ كەلەمىز, – دەدى مەكەمە باسشىسى ءا.راحىمجانوۆ. سونىمەن قاتار كىتاپحانا پاندەميا كەزەڭىندە ونلاين فورماتتا بەلسەندى جۇمىس ىستەپ جاتقانىن دا اتاپ ءوتتى.
ەركىن فورماتتا وتكەن باسقوسۋعا قاتىسۋشىلار زاماناۋي ءبىلىم بەرۋ ماسەلەلەرىن, قازىرگى جاعدايداعى قوسىمشا ءبىلىم بەرۋدىڭ ماڭىزىن جانە ىنتىماقتاستىق مۇمكىندىكتەرىن تالقىلادى.
ءىس-شارا بارىسىندا ءبىلىم بەرۋ مەكەمەلەرىنىڭ باسشىلارىنا مەكتەپ كىتاپحانالارىنىڭ قورىن تولىقتىرۋ ءۇشىن كىتاپتار تابىس ەتىلدى. ولاردىڭ ىشىندە: ء«بىزدىڭ پرەزيدەنت», «تۇڭعىش», «استانا – تاۋەلسىز قازاقستاننىڭ سيمۆولى», «تاريحي تاڭداۋ» ت.ب. باسىلىمدار بار. تۋىندىلاردىڭ دەنىن ەلباسى كەڭسەسىنىڭ باسشىسى, ساياسي عىلىمدار دوكتورى, پروفەسسور م.ب.قاسىمبەكوۆ جەتەكشىلىگىمەن ەلباسى كىتاپحاناسىنىڭ اۆتورلىق ۇجىمى جارىققا شىعارعان.
«ەلوردالىق مەكتەپتەر ءبىزدىڭ باستى سەرىكتەستەرىمىز بولدى جانە سولاي بولىپ قالا بەرەدى. وسى مۇمكىندىكتى پايدالانا وتىرىپ, سىزدەرگە كوپجىلدىق جەمىستى ىنتىماقتاستىق ءۇشىن العىسىمدى بىلدىرەمىن جانە جاڭا شىعارماشىلىق تابىستار تىلەيمىن» دەگەن تىلەك ءبىلدىردى ۇيىمداستىرۋشى تاراپ وكىلدەرى.
جيىن بارىسىندا قوناقتار اتىنان ءسوز العان №17 مەكتەپ-گيمنازياسىنىڭ ديرەكتورى, قالالىق ءماسليحاتتىڭ دەپۋتاتى ءرامزيا ومىرباەۆا: «ەلباسى كىتاپحاناسىنىڭ مۋزەيى – تاريحقا تەرەڭ بويلايتىن ورىن. مەنىڭ ويىمشا, ءاربىر ازامات ءوز ەلىنىڭ تاريحىن بىلۋگە مىندەتتى. كوپتەگەن ادامدار جاستاردى تاربيەلەۋ جولىن قاراستىرۋدا. جاستارعا مورال وقۋدىڭ قاجەتى جوق, ولارعا قالاي دۇرىس ءومىر ءسۇرۋ كەرەكتىگىن كورسەتۋ قاجەت. وسىنداي ۇلى جولمەن ءجۇرۋ: قاراپايىم جۇمىسشىدان پرەزيدەنتتىككە دەيىن كوتەرىلىپ, ەلباسى بولۋ – وسىنداي ءومىردىڭ, كۇرەستىڭ, جاسامپازدىقتىڭ جارقىن دالەلى. مۇنداعى ءاربىر فوتوسۋرەت پەن جادىگەر – ەلباسىنىڭ ءومىرى مەن كوپقىرلى قىزمەتىنىڭ تاريح ارقىلى كورسەتىلگەن, جاڭا تاۋەلسىز مەملەكەتتى قۇرىپ قانا قويماي, ونى بۇكىل الەمگە تانىمال ەلگە اينالدىرعان قازاقستان تاريحى. ماعان بۇل جەر وتە ۇنادى, وقۋشىلارىمىزدى مىندەتتى تۇردە وسىندا اكەلەمىن. ەلباسى كىتاپحاناسىنا مەكتەپ كىتاپحانالارىنىڭ كىتاپ قورىن تولىقتىرۋ ماقساتىندا وسىنداي ماڭىزدى ءارى قاجەتتى باستاماسى ءۇشىن زور العىسىمدى بىلدىرگىم كەلەدى. ءبىز بارلىق وقۋشىلاردى جاڭا باسىلىمدارمەن تانىستىرۋعا كۇش سالامىز. تەك وقۋشىلاردى عانا ەمەس, ولاردىڭ اتا-انالارىن دا قۇندى قازىنالارمەن تانىستىراتىن بولامىز», دەپ وي ءبولىستى.
