تۇركىستان قپب كەزەكشى ءبولىمىنىڭ “102” پۋلتىنە ساۋدا ورتالىقتارىنىڭ بىرىنە بەلگىسىز ەر ادام كىرىپ, قارۋ-جاراقپەن قورقىتىپ, كۇش قولدانىپ التىن بۇيىمداردى ۇرلاپ, قاشىپ كەتكەنى تۋرالى حابارلاما كەلىپ ءتۇستى. جابىرلەنۋشىگە كەلتىرىلگەن شىعىننىڭ جالپى كولەمى شامامەن جەتى ميلليون تەڭگەنى قۇرادى. اتالعان فاكتىنى پوليتسيا قىزمەتكەرلەرى قر قك-ءنىڭ 192-بابى (قاراقشىلىق) بويىنشا سدتبت-عا تىركەپ, كۇدىكتى ادامدى ىزدەستىرۋگە كىرىستى.
قاراقشىلىق شابۋىلدىڭ تاپا تال تۇستە وبلىس ورتالىعىنىڭ كوشەسىندە ورىن العانىن ەسكەرە وتىرىپ, پوليتسيا دەپارتامەنتىندە تاجىريبەلى قىزمەتكەرلەر قاتارىنان جەدەل-تەرگەۋ توبى قۇرىلدى. جەدەل ۋاكىلدەر قىلمىس ورنىن مۇقيات قاراپ, بەينەباقىلاۋ كامەرالارىن زەرتتەپ, ىقتيمال كۋاگەرلەردەن جاۋاپ الدى. پوليتسيا ءار اۋلا مەن كوشەنى ارالادى, قىلمىسكەردىڭ ۇرلانعان زاتتاردى ساتۋى مۇمكىن لومباردتار مەن ساتىپ الۋشىلاردى تەكسەردى.
ەكى كۇننەن كەيىن جەدەل شارالار بارىسىندا ارنايى قۇرىلعان ىزدەستىرۋ توبىنىڭ قىزمەتكەرلەرى كۇدىكتىنىڭ ىزىنە ءتۇستى. ونى كەنتاۋ قالاسى كوشەلەرىنىڭ بىرىنەن ۇستادى. كۇدىكتى جۇمىسسىز, تۇركىستان قالاسىنىڭ تۇرعىنى بولىپ شىقتى. ۇستالعان ازامات پوليتسيا باسقارماسىنا جەتكىزىلىپ, ۋۇي-عا قاماۋعا الىندى.
تەرگەۋ بارىسىندا انىقتالعانداي, قاراقشىلىق شابۋىلدان كەيىن كۇدىكتى قالالىق جولدار ارقىلى قاشىپ كەتكەن. جىگىت بەينەكامەرالار مەن ىزدەستىرۋدەن قۇتىلۋ ءۇشىن كيىمىن باسقا كيىمگە اۋىستىرىپ الىپ, تاكسيگە وتىرىپ كەنتاۋ قالاسىنا قاراي بەت العان. بۇل قاراقشىلىق جاساعان كۇدىكتىنى ىزدەۋگە ەكى كۇن جۇمساعان جەدەل ۋاكىلدەردىڭ جۇمىسىن قيىنداتتى. بەلگىلى بولعانداي, كورشى قالادا كۇدىكتى لومباردقا التىن بۇيىمداردىڭ ءبىرىن تاپسىرىپ, ال اقشاسىن ءوز قاجەتتىلىگىنە جۇمساعان. قازىرگى ۋاقىتتا تۇركىستان قپب-نىڭ تەرگەۋشىلەرىمەن قاراقشىلىق شابۋىل دەرەگى بويىنشا سوتقا دەيىنگى تەرگەۋ امالدارى جۇرگىزىلۋدە. ۇرلانعان التىن بۇيىمدارى ايعاقتى زات رەتىندە تاركىلەنىپ الىنىپ, زاڭدى يەسىنە قايتارىلدى. تەرگەۋ جالعاسۋدا.
