وبلىستا 3 جىلجىمالى مەديتسينالىق كەشەن جۇمىس ىستەيدى. يندۋستريا جانە ينفراقۇرىلىمدىق دامۋ مينيسترلىگىنىڭ يندۋستريالىق دامۋ جانە ونەركاسىپتىك قاۋىپسىزدىك كوميتەتى ءبىزدىڭ وبلىس, سونىڭ ىشىندە قورعالجىن, زەرەندى, جارقايىڭ, ەسىل, ەرەيمەنتاۋ, استراحان, ارشالى, اقكول اۋداندارى ءۇشىن ءوز ەلىمىزدە وندىرىلگەن 8 جىلجىمالى مەديتسينالىق كەشەندى ساتىپ الۋدى جۇزەگە اسىرعان بولاتىن. سالتاناتتى جيىندا وبلىس اكىمى اۋداندىق اۋرۋحانالاردىڭ باس دارىگەرلەرىنە اتالمىش جىلجىمالى كەشەندەردىڭ كىلتتەرىن تاپسىردى.
وبلىسقا قارجىلىق ليزينگ بويىنشا سانيتارلىق اۆياتسيا جانە جەدەل جاردەم قىزمەتى ءۇشىن 58 سانيتارلىق كولىك جەتكىزۋ كوزدەلگەن. ونىڭ 30-ى Hyundai H350, 25-ءى JAC Sunray, 3-ەۋى ۋاز پروفي كولىكتەرى. بۇگىنگى تاڭدا وسى كولىكتەردىڭ جارتىسىنان استامى كەلىپ جەتتى. بارلىق كولىكتەر تۇرعىندارعا كومەك كورسەتۋگە ارنالعان قاجەتتى مەديتسينالىق قۇرالدارمەن جابدىقتالعان. وبلىستىق جەدەل جاردەم ستانتسياسىنا رەانيموبيلدەر, وبلىستىق پوليتسيا دەپارتامەنتى مەن كوكشەتاۋ قالالىق پوليتسيا باسقارماسىنا پاترۋلدىك اۆتوكولىكتەر, وبلىستىق توتەنشە جاعدايلار دەپارتامەنتىنە ءورت سوندىرۋگە ارنالعان تەحنيكالار تابىس ەتىلدى.
– بارلىق ماتەريالدىق جانە ادامي رەسۋرستار ىندەتپەن كۇرەسۋگە باعىتتالعان. اۋرۋدى ودان ءارى تاراتپاۋ ءۇشىن ەلىمىزدە بارلىق قاجەتتى شارالار قابىلدانۋدا. كوروناۆيرۋسپەن كۇرەس ماسەلەسى – ەل پرەزيدەنتى قاسىم-جومارت توقاەۆتىڭ ءجىتى باقىلاۋىندا. سوڭعى كۇندەرى ەلىمىزدە ينفەكتسيا جۇقتىرعاندار سانى ءوسىپ جاتىر. ءبىزدىڭ وبلىس – ەپيدەميالىق احۋالى كۇردەلى ءتورت ايماقتىڭ قاتارىندا, – دەدى وبلىس اكىمى ەرمەك مارجىقپاەۆ.
جامان تۇماۋدىڭ العاشقى لەگى جان القىمنان العان كەزدە ادال ەڭبەگىمەن كورىنگەن بىرقاتار سالا ماماندارىنا «حالىق العىسى» مەدالى تابىس ەتىلدى.
تاعى ءبىر ماڭىزدى وقيعا كوكشەتاۋدا 200 ورىندىق جۇقپالى اۋرۋلار ورتالىعىنىڭ اشىلۋى ەكەنى ءسوزسىز. ۇكىمەتتىڭ قولداۋىمەن نەبارى از ۋاقىتتىڭ ىشىندە بوي كوتەرگەن بۇل ورتالىقتا پاندەميا كەزىندە, ودان كەيىن دە جۇقپالى اۋرۋلارعا شالدىققان ناۋقاستاردىڭ ساپالى, جوعارى بىلىكتى مەديتسينالىق كومەك الۋىنا قاجەتتى جاعدايلاردىڭ بارلىعى جاسالعان. ورتالىقتىڭ ۇيىمداستىرۋشىلىق قۇرىلىمىنىڭ وزىندىك ەرەكشەلىكتەرى بار. مۇندا جۇقپالى اۋرۋلارعا شالدىققان ناۋقاستار تولىق وقشاۋلانىپ, ىندەتتىڭ تارالماۋى ءۇشىن بارلىق جاعداي قاراستىرىلعان. جەلدەتۋ, سۇزگىلەۋ جۇيەسى ۆيرۋستىڭ ناۋقاستان وزگەگە جۇقپاۋىن قامتاماسىز ەتەدى. ورتالىق كومپيۋتەرلىك توموگراف, تسيفرلىق رەنتگەن, ءوجج اپپاراتتارى سەكىلدى زاماناۋي قۇرالدارمەن جابدىقتالعان. ءار كەرەۋەت وتتەگى ستانساسىنا قوسىلعان. وتكەن جاز ايلارىندا ىندەتتىڭ ءورشىپ كەتىپ, ءولىم-ءجىتىمنىڭ ورىن الۋىنىڭ نەگىزگى سەبەبى وسىنداي جابدىقتاردىڭ بولماۋىنان ەدى. بۇگىندە وبلىستىڭ مەديتسينالىق ۇيىمدارىندا 425 ءوجج اپپاراتى, شامامەن 600 وتتەگى كونتسەنتراتورى, 32 رەنتگەن اپپاراتى, 9 كومپيۋتەرلىك توموگرافيا بار.
اشىلۋ سالتاناتىندا ءسوز سويلەگەن كوكشەتاۋ قالاسىنىڭ قۇرمەتتى ازاماتى, مەديتسينا سالاسىنىڭ ارداگەرى بولات ءجانادىلوۆ پەن جازۋشى-دراماتۋرگ, قوعام قايراتكەرى جابال ەرعاليەۆتىڭ لەبىزدەرىندە ەلگە جاسالىپ جاتقان قامقورلىققا حالىقتىڭ رازى ەكەنى ايتىلدى.
ورتالىق 8 كورپۋستان تۇرادى. مۇندا 180 توسەكتىك ورىن تاۋلىكتىك ەمدەلۋگە ارنالعان جانە 20 توسەكتىك ورىن قارقىندى تەراپيا بولىمشەسى بولىپ تابىلادى. ءبىر پالاتا ەكى ناۋقاسقا لايىقتالعان. ىشىندە جۋىناتىن ورىن, اۋىز سۋى بار. رەانيماتسيالىق بولىمشە بەينەكامەرامەن باقىلانىپ وتىرادى.
جاقسىلىق جاۋعان وسى كۇنى وبلىستىق كوپبەيىندى اۋرۋحانادا ماگنيتتى-رەزونانستى توموگرافيا كابينەتى اشىلدى. Signa Creator اپپاراتىن ساتىپ الۋعا جەرگىلىكتى بيۋدجەتتەن بولىنگەن 568 ملن تەڭگە بولىنگەن. اۋرۋحانانىڭ باس دارىگەرى نۇرلان جاروۆتىڭ ايتۋىنشا, بۇل توموگرافيا اپپاراتى «گەليدىڭ نولدىك بۋعا اينالۋى» تەحنولوگياسىنىڭ ارقاسىندا قيىن جاعدايدا دا اۋرۋدىڭ ناقتى كورىنىسىن بىلۋگە مۇمكىندىك بەرەدى. ەڭ باستىسى, مىندەتتى الەۋمەتتىك مەديتسينالىق ساقتاندىرۋ جۇيەسى اياسىندا مرت زەرتتەۋى تەگىن جۇرگىزىلەدى. ول ءۇشىن تۇرعىندار ءوز ۋچاسكەلەرىنەن جولداما الۋى قاجەت. مەديتسينالىق ساقتاندىرۋ جارناسىن اۋدارمايتىن تۇلعالار دياگنوستيكانى اقىلى وتە الادى.
كوكشەتاۋ
