قازاقستان رەسپۋبليكاسىنىڭ قورعانىس ءمينيسترى ادىلبەك جاقسىبەكوۆ رەسەي فەدەراتسياسىنىڭ استاناسى ماسكەۋ قالاسىندا ءوتىپ جاتقان تاۋەلسىز مەملەكەتتەر دوستاستىعىنا قاتىسۋشى مەملەكەتتەر قورعانىس مينيسترلەرى كەڭەسىنىڭ 65-ءشى وتىرىسىنا قاتىستى.
قازاقستان رەسپۋبليكاسىنىڭ قورعانىس ءمينيسترى ادىلبەك جاقسىبەكوۆ رەسەي فەدەراتسياسىنىڭ استاناسى ماسكەۋ قالاسىندا ءوتىپ جاتقان تاۋەلسىز مەملەكەتتەر دوستاستىعىنا قاتىسۋشى مەملەكەتتەر قورعانىس مينيسترلەرى كەڭەسىنىڭ 65-ءشى وتىرىسىنا قاتىستى.
دوستاستىق ەلدەرى قورعانىس ۆەدومستۆولارىنىڭ باسشىلارى تمد-عا قاتىسۋشى مەملەكەتتەر قارۋلى كۇشتەرىنىڭ ءوزارا ءىس-قيمىل ماسەلەلەرىن تالقىلادى. بىرلەسكەن جۇمىستار بارىسىندا مينيسترلەر تمد قورعانىس مينيسترلەرى كەڭەسىنىڭ 2013 جىلعى قىزمەتىنىڭ قورىتىندىسىن شىعارىپ, كەلەسى جىلعا جوسپارلانعان ىنتىماقتاستىق شارالارىنىڭ نەگىزگى باعىتتارىن ايقىندادى. وتىرىستا تمد-عا مۇشە ەلدەردىڭ اۋە شابۋىلىنا قارسى بىرىككەن قورعانىس جۇيەسىنىڭ 2014 جىلعا ارنالعان بىرلەسكەن ءىس-شارالارى تالقىلانىپ, دوستاستىق مەملەكەتتەرى اسكەرلەرىنىڭ مۇددەسى ءۇشىن جەدەل گەوكەڭىستىك اقپاراتىن الماسۋداعى ىنتىماقتاستىقتى قاراستىردى. سونىمەن قاتار, ءاسكەري-تەحنيكالىق جانە اسكەري ءبىلىم سالاسىنداعى كوپتاراپتى ىنتىماقتاستىق باعىتى تالقىلاندى.
سونداي-اق, وتىرىستا جەدەل جانە جاۋىنگەرلىك دايارلىق ءىس-شارالارىن تاجىريبە تۇرىندە ىسكە اسىرۋ, تەررورعا قارسى ءىس-قيمىل سالاسىنا ماماندار دايىنداۋدى ۇيىمداستىرۋ جانە ولاردىڭ بىلىكتىلىكتەرىن ارتتىرۋ ماسەلەلەرى كوتەرىلدى. ءاسكەري ءبىلىم سالاسىنداعى ىنتىماقتاستىق شەڭبەرىندە رەسەي تاراپى دوستاستىق ەلدەرىنىڭ جوعارى اسكەري وقۋ ورىندارى اراسىندا وليمپيادا وتكىزۋ تۋرالى ۇسىنىس جاسادى.
ماسكەۋدەگى وتىرىس شەڭبەرىندە ادىلبەك جاقسىبەكوۆ رەسەي فەدەراتسياسى, بەلارۋس رەسپۋبليكاسى, ازەربايجان رەسپۋبليكاسى, تاجىكستان رەسپۋبليكاسى, قىرعىز رەسپۋبليكاسى جانە ۋكراينانىڭ قورعانىس مينيسترلەرىمەن بىرقاتار ەكىجاقتى كەزدەسۋلەر وتكىزدى.
كەلىسسوزدەر كەزىندە قورعانىس ۆەدومستۆولارىنىڭ باسشىلارى اسكەري جانە ءاسكەري-تەحنيكالىق ءوزارا ءىس-قيمىلدىڭ قازىرگى جاعدايى مەن ونى دامىتۋدىڭ كەلەشەگىن تالقىلادى. ادىلبەك جاقسىبەكوۆ مەملەكەت باسشىلارى اراسىنداعى جوعارى دەڭگەيدەگى بايلانىستار قورعانىس سالاسىنداعى ىنتىماقتاستىققا جاڭاشا تىنىس بەرىپ, ءوزارا ءىس-قيمىلدى ءتيىمدى قامتاماسىز ەتەتىندىگىن اتاپ كورسەتتى.
قازاقستان قورعانىس مينيسترلىگىنىڭ رەسەي, بەلارۋس, ازەربايجان, تاجىكستان, قىرعىزستان جانە ۋكراينا اسكەري ۆەدومستۆولارىمەن ىنتىماقتاستىعىنىڭ نورماتيۆتىك نەگىزدەرىن قامتاماسىز ەتۋ ءۇشىن 2014 جىلعا ەكىجاقتى ىنتىماقتاستىق جوسپارلارىنا قول قويىلدى.
«ەگەمەن-اقپارات».
