«جۇمىسپەن قامتۋدىڭ جول كارتاسى-2020» باعدارلاماسى اياسىندا قولعا الىنعان ىسكە جۇمىسشىلاردىڭ كوبى جەرگىلىكتى جەردەگى تۇرعىنداردىڭ ىشىنەن تارتىلعان. ولاردىڭ جالاقىسى 85 257 تەڭگە دەپ بەلگىلەنگەن. تەك ارنايى ماماندار شەتتەن بارىپ, ۋاقىتشا قىزمەت ەتەدى. ولارعا مەردىگەر كومپانيا كەلىسىمشارت نەگىزىندە ءۇش كۇن ىشىندە 85 مىڭ تەڭگە الەۋمەتتىك كوتەرمە اقىسىن بەرۋى ءتيىس. ال وسكەمەن قالاسىندا كوتەرمە اقى بۇل بەلگىلەنگەن مولشەردەن جوعارى.
حالىقتىڭ ءال-اۋقاتىن ارتتىرۋ ءۇشىن ۇيىمداستىرىلعان باعدارلامانىڭ جۇمىستارىنا از-كەم توقتالىپ وتسەك, وڭىردە كوپتەگەن يگى ءىس اتقارىلىپ جاتىر. تۇرعىن ءۇي-كوممۋنالدىق شارۋاشىلىعى سالاسىندا «جۇمىسپەن قامتۋدىڭ جول كارتاسى» باعدارلاماسى اياسىندا 214 جوبا قولعا الىنىپتى. ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى نۇرلان رامازانوۆتىڭ ايتۋىنشا, وبلىستا سۋمەن جابدىقتاۋ جانە سۋ بۇرۋ جەلىلەرىن قايتا قۇرۋ جانە اعىمداعى جوندەۋ بويىنشا 49 جوبا, جىلۋمەن جابدىقتاۋ نىساندارى بويىنشا 18 جوبا, ەلەكترمەن جابدىقتاۋ بويىنشا 5 جوبا جانە اباتتاندىرۋ بويىنشا 142 جوبا ىسكە اسىرىلىپ جاتقان كورىنەدى.
– وسكەمەن, سەمەي, التاي قالالارىندا, سونداي-اق اياگوز, اباي, تارباعاتاي, بورودۋليحا, شەمونايحا, بەسقاراعاي, جارما جانە زايسان اۋداندارىنىڭ سۋمەن جابدىقتاۋ جانە سۋ بۇرۋ جەلىلەرىنە, اياگوز, بورودۋليحا, كاتونقاراعاي, ۇلان جانە التاي اۋداندارىنىڭ جىلۋمەن جابدىقتاۋ جانە جىلۋ كوزدەرى جەلىلەرىنە, ريددەر قالاسىندا جانە ءۇرجار, ۇلان اۋداندارىنىڭ ەلەكترمەن جابدىقتاۋ جەلىلەرىنە جوندەۋ جۇمىستارى جۇرگىزىلدى, – دەپ اتاپ ءوتتى ن.رامازانوۆ.
سونداي-اق بالالار فۋتبول الاڭدارى, حوككەي كورتتارى مەن ۆوركاۋت الاڭدارى ورناتىلدى. ساياباقتار مەن سكۆەرلەرگە كوگالداندىرۋ جانە جوندەۋ جۇمىستارى جۇرگىزىلدى. وبلىستىڭ بارلىق قالالارى مەن اۋداندارى اباتتاندىرىلدى.
بيىل جارما اۋدانىندا ءتۇرلى دەڭگەيدەگى 60 جوبا جۇزەگە اسىرىلىپ جاتىر. ونىڭ ىشىندە جالپى قۇنى 3 ملرد 679 ملن تەڭگەنى قۇرايتىن ينۆەستيتسيالىق جوبالار بولسا, ودان بولەك كۇردەلى جانە اعىمداعى جوندەۋ جۇمىستارى دا بار. تۇپتەپ كەلگەندە, بۇل جۇمىستار اۋداننىڭ ينجەنەرلىك ينفراقۇرىلىمىن دامىتىپ قانا قويماي, الەۋمەتتىك-ەكونوميكالىق احۋالىنا ايتارلىقتاي وزگەرىستەر ەنگىزۋى ءتيىس.
جارما اۋدانىندا «جۇمىسپەن قامتۋدىڭ جول كارتاسى» باعدارلاماسى اياسىندا 25 جوبانى ىسكە اسىرۋعا 656 ملن تەڭگە بولىنگەن. سونىڭ ناتيجەسىندە اۋداندا 174 جاڭا جۇمىس ورنى قۇرىلعان. بۇگىنگە دەيىن 20-دان اسا جوبا ورىندالعان. ونىڭ ىشىندە ەلدى مەكەندەردىڭ ىشكى جولدارىن قالپىنا كەلتىرۋ جۇمىستارى دا بار. مىسالى, قالباتاۋ اۋىلىنىڭ ءۇش كوشەسىنە جانە شارداعى قابانباي باتىر كوشەسىنە ورتاشا جوندەۋ جۇمىستارى جۇرگىزىلگەن. بۇعان قوسا قالباتاۋ, شار, اۋەزوۆ ەلدى مەكەندەرىندەگى بىرقاتار كوشەگە جارىق تارتىلعان.
سونداي-اق بەسقاراعاي اۋدانىندا دا جولدار جوندەلىپ, كوشەلەر جارىقتاندىرىلىپ جاتىر. بيىل بەسقاراعايدا جول كارتاسى اياسىندا 6 بىردەي اۋىلدىڭ كوشەسىنە جارىق تارتىلدى. ءۇش اۋىلدىڭ جولى ورتاشا جوندەۋدەن ءوتتى. بەسقاراعاي اۋىلىنداعى اۋەزوۆ, جاباەۆ, شەۆتسوۆ, تاۋەلسىزدىك كوشەلەرى, گلۋحوۆكا اۋىلىنىڭ اباي, پيونەر جانە سوۆەت كوشەلەرى جوندەلدى. بۇل جۇمىستارعا 137 ملن تەڭگە جۇمسالعان ەكەن.
ال كاتونقاراعاي اۋدانىندا جالپى قۇنى 6 ملرد تەڭگە بولاتىن 76 جوبا جۇزەگە اسىرىلىپ جاتسا, ونىڭ ىشىندە 24 جوبا «جۇمىسپەن قامتۋدىڭ جول كارتاسى-2020» باعدارلاماسى اياسىندا قولعا الىنعان. وسى رەتتە ايتا كەتەرلىگى, 20 مەكتەپ جانە 6 مادەني نىسان جوندەلگەن. سونداي-اق اۋدان جولدارىنىڭ 30 شاقىرىمىنا اسفالت توسەلدى.
كوكپەكتى اۋدانىندا دا اۆتوموبيل جولدارىنا ورتاشا جوندەۋ جۇمىستارى جۇرگىزىلگەن. بۇل اۋداننىڭ 50 ەلدى مەكەنىن بايلانىستىراتىن اۋداندىق ماڭىزى بار اۆتوموبيل جولدارىنىڭ 72,5%-ى – قاناعاتتانارلىق جاعدايدا. اۋدان باسشىلىعىنىڭ جوسپارلاۋىنشا, 2025 جىلعا دەيىن جولداردىڭ 95%-ى جاقسى جاعدايعا جەتۋى ءتيىس. بيىل «جۇمىسپەن قامتۋدىڭ جول كارتاسى» باعدارلاماسى اياسىندا پرەوبراجەنكا – شۇعىلباي اۋىلدارىنا ورتاشا جوندەۋ جۇمىستارى جۇرگىزىلدى. ۇلكەنبوكەن – كوكجايىق – ۇلگىلى مالشى اۆتوموبيل جولىنىڭ 54 شاقىرىمىنا اعىمداعى جوندەۋ جۇرگىزىلدى. بىرنەشە اۋىلدىڭ كىرەبەرىستەرى تەگىستەلدى.
بۇل باعدارلاما بويىنشا التاي اۋدانىنىڭ كوپتەگەن اۋىلدىق مەكتەبىندە جىلى دارەتحانالار ورناتۋ ماسەلەسى شەشىلدى. ولاردىڭ ىشىندە وكتيابرسك كەنتىندەگى مەكتەپ تە بار. 1957 جىلى سالىنعان وقۋ عيماراتىندا وسى ۋاقىتقا دەيىن دارەتحانا بولماعان ەدى. اۋدان حالقى, اتا-انالار «جۇمىسپەن قامتۋدىڭ جول كارتاسى-2020» باعدارلاماسى ارقىلى بۇل ماسەلەنىڭ شەشىلگەنىنە قۋانىشتى.
اباي اۋدانىنىڭ قاراۋىل اۋىلىنداعى 27 پاتەرلى تۇرعىن ءۇيدىڭ اۋلاسى, سونداي-اق قۇنانباي كوشەسى اباتتاندىرىلىپ, زەرە, سۇندەتباي, قۇتجانوۆ كوشەلەرىنىڭ كوشە جارىعىنا اعىمداعى جوندەۋ جۇرگىزىلدى, بەكبوسىنوۆ جانە ايگەرىم كوشەلەرىنە جارىقتاندىرۋ تارتىلدى. ال اياگوز قالاسىندا 8 سپورتتىق ۆوركاۋت الاڭدارى اشىلىپ, اۋلالاردى اباتتاندىرۋ جۇمىستارى جۇرگىزىلۋدە. بورودۋليحا اۋدانىنىڭ بەلاعاش جانە زەنكوۆكا اۋىلدارىندا دا كوشەلەرگە جارىق تارتىلدى.
سونىمەن قاتار الەۋمەتتىك قورعاۋ بويىنشا 66 جوبا جوسپارعا ەنگىزىلگەن. سونىڭ ءبىرى – سەمەيدەگى الەۋمەتتىك قورعاۋ جانە جۇمىسپەن قامتۋ بولىمىنە ليفت ورناتىلدى. بۇل دا كوپتەن بەرى شەشىلمەي كەلە جاتقان كۇرمەۋى قيىن ماسەلە ەدى.
جالپى, وبلىستا 817 ينفراقۇرىلىمدىق جوبانى جۇزەگە اسىرۋ ءۇشىن 77 ملرد تەڭگە بولىنگەنى بەلگىلى. «جۇمىسپەن قامتۋدىڭ جول كارتاسى» باعدارلاماسىن ىسكە اسىرۋدا وسكەمەندەگى اۋەجاي قايتا جاڭاردى, ەكى جاتاقحانا پايدالانۋعا بەرىلدى, سەمەيدەگى ونكولوگيالىق ديسپانسەردىڭ راديولوگيالىق ورتالىعىنىڭ قۇرىلىسى اياقتالدى, وسكەمەندەگى وبلىستىق اۋرۋحانا مەن كوپسالالى ونكولوگيا جانە حيرۋرگيا ورتالىعى قايتا جاڭارتىلدى.
باعدارلاما بويىنشا 15 ءبىلىم بەرۋ نىسانى جاڭارتىلۋدا. بيىل ءبىلىم بەرۋ نىساندارىن جوندەۋدەگى ەڭ اۋقىمدى جۇمىستار گلۋبوكوە اۋدانىنىڭ بىرنەشە ەلدى مەكەندەرىندە جۇرگىزىلىپ جاتىر. كوپ جىلدار بويى كۇردەلى جوندەۋدى كورمەگەن مەكتەپ عيماراتتارى رەتكە كەلتىرىلەدى.
بيىل «نۇرلى جەر» مەملەكەتتىك باعدارلاماسى بويىنشا «جۇمىسپەن قامتۋ جول كارتاسى» اياسىنداعى جوبالاردى ەسكەرە وتىرىپ, وبلىستا جالپى اۋدانى 533 مىڭ شارشى مەتر 6 454 پاتەرگە ارنالعان 118 كوپپاتەرلى ءۇيدىڭ قۇرىلىسى جۇرگىزىلىپ جاتىر. وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ باسشىسى اسەت سۇلەيمەنوۆتىڭ ايتۋىنشا, «جۇمىسپەن قامتۋدىڭ جول كارتاسى» بويىنشا ءبىر قاباتتى ۇيلەردى, سونداي-اق جالعا بەرىلەتىن جانە كرەديتتىك تۇرعىن ۇيلەردى پايدالانۋعا بەرۋ جوسپارلانۋدا.
بەسقاراعاي اۋدانىندا جاڭا سپورتتىق نىساندار پايدا بولدى. «جۇمىسپەن قامتۋدىڭ جول كارتاسى» باعدارلاماسى بويىنشا 3 فۋتبول الاڭى ورناتىلدى. ەستەرىڭىزگە سالا كەتسەك, بۇل باعدارلامانى جۇزەگە اسىرۋ ءۇشىن بەسقاراعاي اۋدانىندا 27 جوبا بويىنشا جوندەۋ-قۇرىلىس جۇمىستارىنا 531,2 ملن تەڭگە بولىنگەن. بورودۋليحا اۋدانىندا دا بىرنەشە اۋىلدىڭ كوشەلەرى جارىقتانىپ, اۋىلداردا شاعىن فۋتبول الاڭدارى پايدا بولدى.
بۇگىنگى تاڭدا ريددەر جانە كۋرچاتوۆ قالالارىندا, سونداي-اق گلۋبوكوە, جارما, زايسان, كاتونقاراعاي, كۇرشىم, تارباعاتاي جانە ۇلان اۋداندارىندا «جۇمىسپەن قامتۋدىڭ جول كارتاسى» باعدارلاماسىنىڭ جوبالارى تولىق اياقتالىپ, سالىنعان, جوندەلگەن بارلىق نىسان پايدالانۋعا بەرىلدى. نەگىزىنەن بۇل – حالىقتى ناتيجەلى جۇمىسپەن قامتۋعا باعىتتالعان داعدارىسقا قارسى باعدارلاما. ناتيجەسىندە توزعان عيماراتتار قايتا جوندەلىپ, اۋىلدىڭ اجارىن اشا ءتۇستى. قانشاما الەۋمەتتىك, سپورتتىق نىساندار بوي كوتەردى. تاعى ءبىر ماڭىزدى ماسەلەنىڭ ءبىرى – كوپتەگەن ادام جۇمىسپەن قامتىلدى.
