كەڭەستىك كەزەڭدە الىپتاردىڭ ءىزىن جالعاعان ابىلسەيىت ايحانوۆ اعامىز كسرو حالىقتارى سپارتپاكياداسىنىڭ جانە كسرو چەمپيونى اتاندى. ونىڭ جەتىستىگىن 1991 جىلى وداق تاراعانعا دەيىن ەشكىم قايتالامادى. ۇيات تا بولسا ايتايىق, قازاقتان ۇل تۋماعانداي, قاپ تاۋىنان جىگىت جالداپ اكەلىپ, ونى ەلىمىز اتىنان كۇرەستىرىپ ءماز بولعانىمىز كەشە عانا...
ءوستىپ, ءبىر بالاعا زار بولعان ءبايبورى شالداي زارلانىپ جۇرگەندە جارق ەتىپ نۇرماحان تىناليەۆ ءىنىمىز شىقتى. اتان جىلىك ازامات, 2010 جىلى گرەك-ريم كۇرەسىنەن اسا اۋىر سالماقتا الەم بىرىنشىلىگىنىڭ قولا مەدالىن ءبىر تارپىپ الىپ كەلدى. بۇل جەتىستىگىن قاتارىنان ەكى دۇركىن (2011, 2013) قايتالادى. ەكىنشى تارپىعاندا ازيا ويىندارىنىڭ قوس التىنى (2013, 2015) قورجىنعا ءتۇستى. ونىڭ سىرتىندا قۇرلىقتىڭ ەكى دۇركىن چەمپيونى (2013, 2015), جازعى ۋنيۆەرسيادانىڭ قولا جۇلدەگەرى (2013) قاتارلى بيىكتەردى باعىندىردى. وسىلاي حالقىمىز ساناسىندا ۇيالاعان الىپتار لەگىنىڭ ءبىر ءتۇيىر ۇشقىنى جاندى.
ەگەر دە ويىن بالاسى نۇرماحاندى اكەسى اناربەك «اۋىلدىڭ قارا شاڭىندا اسىر سالىپ ويناي بەرمەي, بالۋان بول, قاراعىم, سەنىڭ ءدۇبىرلى شابىسىڭدى كورىپ مەنىڭ شەرىم تارقاسىن...» دەپ الماتىداعى داۋلەت تۇرلىحانوۆ اتىنداعى كۇرەس مەكتەبىنە الىپ كەلمەگەندە, قايتەر ەدى؟!. كەم دەگەندە اۋىلدىڭ اپتالداي قاراجون جىگىتتەرىنىڭ ءبىرى بولىپ قالا بەرەر... نۇرماحان ءتارىزدى الىپ ازاماتتار قازاقتىڭ ءار اۋىلىندا بار. بىراق ولاردى اناربەك اكە سياقتى قولىنان جەتەكتەپ اكەلىپ, دۇبىرگە قوساتىن ادام جوق. بولماسا, الىپ بالا ىزدەپ سابىلىپ جۇرگەن باپكەر كورمەيسىز. ءسويتىپ قانشاما قازاقتىڭ الىپ ۇلى شاڭ قاۋىپ دالادا ءجۇر...
* * *
نۇرماحاننىڭ اكەسى اناربەك مارقۇم ءوزى دە كۇرەسكەن, اۋىل-ايماق, ات جەتەر جەرگە تۇيە بالۋان اتانعان. ابدەن ساقايىپ, جاسى ۇلعايعان شاعىنداعى سالماعى 130 كيلو بولىپتى. دالانىڭ تارلان بورىسىندەي اتىلماي قۋاتىن ىشىنە ساقتاپ, وزىنەن تۋعان ۇلدارىنا ءۇمىت ارتقان سىڭايلى. ۇلىنىڭ بالۋان بولارىن ناق تانىعان. ىشكى تۇيسىك, تىلسىم ۇمىتپەن. ءسويتىپ نۇرماحاندى الماتىعا الىپ بارعان. بۇل 2002 جىل ەدى.
ول كەزدەگى نۇرماحاننىڭ سالماعى 54 كيلو. سول كۇندەردى ەسىنە العان بالۋان جىگىت «وتە ءالسىز, ءارى كۇرەسكە ەشقانداي يكەمىم جوق ەدى» دەيدى. ونىڭ ۇستىنە ادامدارى ارپالىسىپ جاتقان الىپ شاھار الماتىدا اعايىن-تۋعاندارى جوق, جاقىن-جۋىق تانىستاردى ساعالاپ ءجۇرىپ, راسىن ايتقاندا كەز كەلگەن جەرگە جامباس سىيدىرۋ قايدان وڭاي بولسىن.
بىراق نۇرماحاندا نامىس بولدى. قالاي دا جەتەمىن, قالاي دا جەڭەمىن دەگەن. قىسقاسى, بۇل جىگىتتى بالۋان قىلعان – نامىس. ونى ازاماتپەن اشىق اڭگىمە بارىسىندا انىق اڭدادىق. دەگەنمەن, ادامدى قيىندىقتان الىپ شىعاتىن اباي اتامىز ايتقانداي, «اقىلى مەن قايراتى» عوي. اسىرەسە بالۋاندا قايرات بولىپ, اقىلى بولماسا, كوشەدەگى كوپ تەنتەكتىڭ بىرىنە اينالار, باسقا قايدا بارار دەيسىز. ودان كەيىن – ەڭبەك. ونىڭ ءدامىن نۇرماحان ءبىر كىسىدەي بىلەدى.
باپكەر قاۋىم جاقسى بىلەدى, اۋىر سالماقتاعى بالۋانداردى كۇرەسكە يكەمدەۋ قيىن, بۇقانىڭ جون تەرىسىندەي ءيى قانباي جاتىپ الادى. كوپ باپكەر وسىنى بىلەدى دە, جاس شىبىقتاي يۋگە جۇمساق جەڭىل سالماقتاعى بالالارعا اۋەس. وسىنداي جاعداي نۇرماحاننىڭ باسىنان دا ءوتتى. شىنى كەرەك, العاشقى ەكى جىل جىعىلۋدان كوز اشپاعان بالا 2004 جىلى ورال قالاسىندا وتكەن جاسوسپىرىمدەر چەمپيوناتىندا توپ جاردى. سودان قۋانسىن كەلىپ. دالانىڭ قوڭىر جەلى ءسۇيىپ وسكەن قارا تورى جۇزىنە كۇلكى ءۇيىرىلدى. ول كەزدە اكەسى ءتىرى. ۇلىنىڭ جەڭىس تۇعىرىنا كوتەرىلگەنىن ەستىگەندە, كەڭ دالاعا ءبىر قاراپ, ءوزىنىڭ الىپ كەۋدەسىنە ءبىر قاراپ, ء«دال وسىلاي باستالۋى ءتيىس» دەپ ميىعىنان تەرەڭ ءبىر كۇلگەندە ۇقسايدى.
* * *
بالاسىنىڭ بالۋان بولارىن اكە جۇرەگى باياعىدا سەزگەن. جاستاۋ كەزىندە ءتۇس كورگەن. تۇسىندە اق قوشقار ءسۇزىپ جاتىر ەكەن. بۇل قوشقار اتاسى بالۋان شولاقتىڭ ءپىرى ەكەنىن بىلەتىن. وسى بالۋان شولاقتىڭ اكەسى – بايمىرزا. بايمىرزانىڭ اكەسى – جارىقشاق, جارىقشاقتىڭ اكەسى – قازانعاپ. وسى قازانعاپ توعىز جاسىندا اكەسى ەسەنتاي سامبەتتىڭ ازعانا اۋىلىن باستاپ كوكشەتاۋ جاققا قونىس اۋدارعان. سول كۇيى بۇلاندى ءوڭىرى تاسىوزەك بويىن مەكەندەپ قالىپ قويعان. ال اناربەكتىڭ اكەسى بەكباي. بەكبايدىڭ اكەسى ءتىنالى وسى بالۋان شولاقپەن شامالاس. سوناۋ جىلدارى بالۋان شولاق شۋ بويىنداعى اتاجۇرتى ءۇيسىن-سامبەت ەلىنە كەلگەندە قارسى العان ادامنىڭ ءبىرى ءتىنالى ەكەن. ويتكەنى ءتىنالى مەن نۇرماعامبەت (بالۋان شولاق) – اعايىندى ادامنىڭ بالالارى. قىسقاسى, ءبىزدىڭ نۇرماحان – اتاقتى بالۋان شولاقتىڭ شوبەرەسى.
وسىلاي نۇرماحاننىڭ جەڭىستى جولدارى باستالدى. كەلەسى, 2005 جىلى ەل بىرىنشىلىگىندە تاعى دا جۇلدەلى ورىنعا يە بولىپ, وسى جىلى جاپونيادا وتكەن جاسوسپىرىمدەردىڭ ازيا چەمپيوناتىندا قولا مەدال قانجىعالادى. 2006 جىلى جاستار قاتارىنا ءوتتى. سالماعى – 96 كيلو. اجەپتاۋىر ىسىلدى. جاستار اراسىندا جەڭىمپاز اتاندى. «داندەگەن قارساق قۇلاعىمەن ءىن قازادى» دەگەندەي, قۋات-قارىمىن سىناپ كورمەككە ەرەسەكتەر اراسىندا وتكەن قازاقستان چەمپيوناتىنا قاتىستى. فينالدا مارعۇلان اسەمبەكوۆتەن جىعىلىپ, ەكىنشى ورىن الدى. بۇعان دا شۇكىر. ول تۇستا 96 كيلو سالماقتا م.اسەمبەكوۆ كوش باستاپ, اسەت مامبەتوۆ وكشەلەپ, ناعىز باسەكەلەستىك قىزىپ تۇرعان شاق. نۇرماحان ءۇشىن ەرەسەكتەر قاتارىنا وتۋگە ءالى ەكى-ءۇش جىل بار. وعان دەيىن مارعۇلان مەن اسەت 96 كيلودا كۇرەسە تۇرسىن...
2007 جىل. نۇرماحان جاستار اراسىندا فيليپپيندە وتكەن ازيا بىرىنشىلىگىندە توپ جارىپ, الەم چەمپيوناتىندا قولا جۇلدەگە يە بولدى. وسى جىلى ەرەسەكتەر اراسىندا سەمەيدە وتكەن قازاقستان كۋبوگى جولىنداعى جارىستا مارعۇلاندى جەڭدى. انە-مىنە قىر استىندا بەيجىڭ وليمپياداسى قىلتيىپ تۇر. 96 كيلودا قايشىلاسىپ جاتقان ەكەۋگە بۇل كەلىپ قوسىلدى. بىراق «قىرسىققاندا قىمىران ءىريدى» دەگەندەي, جاتتىعۋ ۇستىندە نۇرماحان توبىعىن تايدىرىپ الدى.
ۇزاق ەمدەلۋگە تۋرا كەلدى. تايعان توبىقتى «جوندەتىپ», تىزەنىڭ سوگىلىپ كەتكەن شەمىرشەگىنە وپەراتسيا جاساتىپ, توعىز ايعا جۋىق كىلەمگە شىعا المادى. بىراق تۇساۋلى تۇلپارداي شيرىعىپ جاتتى. 2008 جىلدى تولىقتاي بوس جىبەرىپ الدىم دەپ وكىنەدى نۇرماحان. جالپى ۇلكەن جاقسىلىق بولار الدىندا ءبىر سىناقتىڭ كەلەرى – قۇدىرەتتىڭ بۇلجىماس زاڭى. مۇنى بىلمەگەن ادام ءومىردىڭ ءمانىن ءتۇسىنىپ جارىتپايدى.
2009 جىلى ابدەن ساقايىپ, تۋلاعان تۇلپارداي كىلەمگە ورالدى. ءبىر جىلدىڭ ىشىندە سالماعى توقتاۋسىز ءوسىپ 120 كيلوعا جەتتى. كەلگەن بەتتە ەرەسەكتەر اراسىندا قازاقستان بىرىنشىلىگىن باعىندىردى. العاشقى الەم چەمپيوناتىنا قاتىسىپ, تاجىريبە جيناپ قايتتى.
* * *
«بىتەر ءىستىڭ باسىنا, جاقسى كەلەر قاسىنا» دەگەندەي, 2010 جىلدىڭ باسىندا نۇرماحاندى نامىستى باپكەر مارات تۇرلىحانوۆ قامقورلىعىنا الدى. ويتكەنى جاس بالۋاندى ءتورت جىلدا ءبىر رەت جالاۋىن كوتەرەتىن ازيا ويىندارى مەن كەزەكتى الەم چەمپيوناتى كۇتىپ تۇرعان بولاتىن. وسىعان دايىندىق باستالدى. قىرسىققاندا, ەسكى جاراقات قايتادان سىر بەرمەسى بار ما؟! باپكەرى قاراجات تاۋىپ نۇرماحاننىڭ اياعىنا شەتەلدە وپەراتسيا جاساتتى. وڭالعان سوڭ بەيجىڭ وليمپياداسىنىڭ قولا جۇلدەگەرى اسەت مامبەتوۆ ەكەۋىن قوساقتاپ ماسكەۋگە اتتاندىردى.
بۇل ءبىر اقىلمەن ويلاپ, كەڭ پىشىلگەن ءىس بولدى. ويتكەنى قازاقستاندا اسا اۋىر سالماقتا باسەكەلەستىك جوقتىڭ قاسى. ءبىر-بىرىنە قارسىلاس بالۋاندار ساۋساقپەن سانارلىق. ال باسەكەلەستىك بولماعان جەردە سپورتشىنىڭ شەبەرلىك دەڭگەيى وسپەيدى. رەسەيدە اۋىر جانە اسا اۋىر سالماق دارەجەسىندە كەمىندە بەس-التى بالۋان بار. نۇرماحان مەن اسەت رەسەيلىك بالۋاندارمەن بىرگە جاتتىقتى.
وسى وقيعا جايىندا مەرزىمدىك باسپاسوزگە بەرگەن ءبىر سۇحباتىندا نۇرماحان: «ماسكەۋدىڭ قاق ورتاسىنان پاتەر جالداپ, ەش الاڭسىز جاتتىعۋعا كىرىستىك. ەڭ باستىسى, شەبەرلىك جاعىنان كوپ وستىك», دەسە, بالۋاننىڭ باپكەرى مارات تۇرلىحانوۆ: «باپكەرلىك كاسىپكە دەن قويعان كەزىمدە اسەت مامبەتوۆپەن جۇمىس ىستەدىم. ول ۇزاق ۋاقىت ماسكەۋدە رەسەي بالۋاندارىمەن بىرگە دايارلاندى. بەيجىڭ وليمپياداسىندا ول قولا جۇلدەگەر اتاندى. سودان اسەتتىڭ قاسىنا سەرىك بولاتىن تاعى ءبىر بالۋان ىزدەدىم. تاڭداۋىم نۇرماحان تىناليەۆكە ءتۇستى. بۇل بالانىڭ ەڭبەكقورلىعى ۇنادى. جاتتىعۋدان جالىقپايدى. ەگەر نۇرماحاننىڭ باعىن اشا السام, بۇل جالعىز ماعان ەمەس, بۇكىل الاش جۇرتىنا ۇلكەن ابىروي بولاتىنىن جۇرەگىم سەزدى. قازاقتىڭ نار تۇلعالى ءبىر ازاماتى الەم الىپتارىن بىرىنەن كەيىن ءبىرىن جىعىپ, جەڭىس تۇعىرىندا مارقايىپ تۇرسا, قانداي عانيبەت. سول كەزدە مەملەكەتىمىزدىڭ مەرەيى وسەدى جانە وزگە حالىقتار الدىندا ۇلتىمىزدىڭ تەكتىلىگىن تانىتار ەدىك...», دەپتى ءباسپاسوز وكىلدەرىنە بەرگەن سۇحباتىندا.
* * *
مارات باپكەر ايتسا ايتقانداي, كەشىكپەي نۇرماحان ونىڭ ءۇمىتىن اقتادى. 2010 جىلدىڭ قىركۇيەك ايىندا ماسكەۋ قالاسىندا الەم بىرىنشىلىگى باستالدى. وعان دۇنيە ءجۇزىنىڭ وتىز ەلىنەن بالۋاندار قاتىستى. نۇرماحان تىناليەۆ 120 كيلو سالماقتا العاشقى بەلدەسۋىن يتاليالىق فيگارومەن وتكىزىپ, ونى ءبىرىنشى كەزەڭدە 4:0 ەسەبىمەن, ەكىنشى كەزەڭدە 6:0 ەسەبىمەن توڭكەرىپ تاستادى. كەلەسى كەزەكتە جولى تۇيىسكەن يزرايلدىك الىپ ۆلاديمير گۋرالسكيدى دە ايقىن باسىمدىقپەن (1:0, 4:2) ۇتتى. ءۇشىنشى كەزەكتە, رەسەيلىك الىپ, وليمپيادا جانە الەم چەمپيونى حاسان باروەۆپەن بەلدەستى. ءبىزدىڭ نۇرماحان بۇل سويقاندى العاشقى كەزەڭدە الىپ جىقتى, ەكىنشى كەزەڭدە پارتەردە ەپتەپ ۇتىلدى. شەشۋشى ءۇشىنشى تۇستا ايقىن باسىمدىقپەن (3:1) ۇتتى. ءسويتىپ, رەسەيلىك الىپتى الىپ ۇرعان نۇرماحاندى كۋبالىق قارا ءداۋ ميحاين لوپەس كۇتىپ تۇردى. ودان ۇتىلدى. ءۇشىنشى ورىن, ياعني الەم بىرىنشىلىگىنىڭ قولا مەدالى ءۇشىن شايقاستا چەحيالىق مارەك سۆەچتى ويسىراتا جەڭىپ (4:0, 7:0), اسا اۋىر سالماقتا الەم چەمپيوناتىنان مەدال بۇيىرعان تۇڭعىش قازاق رەتىندە تاريح بەتىنە اتى تاڭبالاندى.
بۇل جەتىستىگىنەن كەيىن ەل-جۇرت نۇرماحاندى القادى ءھام الاقانىنا سالدى. وعان ازامات لايىق ەدى. ويتكەنى كوڭىلى بالاداي, قۋاتى دالاداي, الىپ ۇلدىڭ باستى قاسيەتى سۇيەگىنە سىڭگەن قازاقى تاربيەسى. ۇلكەننىڭ الدىن كەسىپ وتپەيدى, كىشىپەيىل جىگىت. الىپتىڭ اناسى جۇماگۇل رابجانقىزى «بالامنىڭ ەڭ جاقسى قاسيەتى – باسىن كەسىپ الامىن دەسەڭ دە وتىرىك ايتپايدى, سودان سوڭ بىرەۋگە ۋادە بەرسە, سونى ورىنداماي تىنبايدى» دەيدى ەكەن.
وسىلاي الەمدىك دودادا ولجا سالعان جىگىت كەشىكپەي ءتورت جىلدا ءبىر بولاتىن ازيا ويىندارىنا اتتاندى. باردى. العاشقى قارسىلاسى كامبودجالىق چام ءچبيندى تازا ۇتتى. ودان كەيىن ۇندىلىك دادال چماندردى بەت قاراتپادى. ءۇشىنشى بەلدەسۋدە وسى جىلى ماسكەۋدە وتكەن الەم بىرىنشىلىگىندە 96 كيلودا التىن مەدال العان يراك الىبى ءالي اكپارمەن جولى ءتۇيىستى. ونى دا ۇتتى. شەشۋشى كەزەڭ التىن مەدال ءۇشىن قىتايلىق الىپ, سالماعى 150 كيلودەن جوعارى لۋي دەليدى ەكى كەزەڭدە 1:0, 2:0 ەسەبىمەن ايقىن جەڭىپ, چەمپيون اتاندى.
كەلەسى 2011 جىلى الەم بىرىنشىلىگى تۇركيادا ءوتتى. وعان دۇنيە ءجۇزىنىڭ 40 ەلىنەن بالۋاندار قاتىستى. نۇرماحان العاشقى اينالىمدى ەركىن وتكىزىپ, ەكىنشى اينالىمدا امەريكالىق درەمايل بايەرسپەن جولى ءتۇيىستى. د.بايەرس – 2002 جىلى الەم چەمپيونى اتانىپ, 2007 جىلدان بەرى بارلىق جارىستا جۇلدەلى ورىنداردان تۇسپەي كەلە جاتقان وتە تاجىريبەلى بالۋان. ونى ءبىزدىڭ جىگىت ايقىن ۇتىپ, ءۇشىنشى اينالىمدا نەمىس جىگىتى نيكو شميدكە تاپ كەلدى. العاشقى ەكى كەزەڭدە دە ەسە جىبەرگەن نەمىس جىگىتى جەڭىلىپ تىندى. نۇرماحان ءتورتىنشى بەلدەسۋىن گرەك الىبى كسەفونت كوتسيۋباسپەن وتكىزدى. جەڭدى. بىراق بەسىنشى بەلدەسۋ قيىنعا سوقتى. ول تۇركيالىق ازامات رىزا كايالاپ بولاتىن. بۇل جىگىت وتكەن جىلى ماسكەۋ چەمپيوناتىندا ارمەنيالىق الىپ يۋري پاتريكەەۆتەن جەڭىلىپ, ءبىزدىڭ نۇرماحانمەن ءبىر تۇعىردا (قولا مەدال) تۇرعان ەدى. ەندى, مىنە, ءبىر تۇعىردا قوناقتاعان قوس الىپتىڭ جولى ءتۇيىستى. نۇرماحان تۇرىككە ەسە جىبەردى, ونىڭ اقىسىنا قولا مەدال ءۇشىن ماجار بالۋانى ميكاەل باروشتى ويسىراتا ۇتىپ, لوندون وليمپياداسىنا قاتىساتىن ليتسەنزياعا قول جەتكىزدى. بۇيىرسا, الدا وليمپيادا!
* * *
اتامىز قازاقتا الميساقتان كەلە جاتقان «بۇيىرعان الا ما, جۇگىرگەن الا ما» دەيتىن ءتامسىل بار. نۇرماحاننىڭ تاعدىرىن جوعارىداعى ءبىر اۋىز سوزگە بايلاپ ايتساق تۇسىنىكتى شىعار. ارينە, ەل بولىپ ۇلكەن ءۇمىت ارتتىق. ءتىپتى كوك تۋدى جەلبىرەتىپ قولىنا ۇستاتىپ قويدىق. بالپاڭ-بالپاڭ باسقان, بالتىرى جۋان ءھام دوڭگەلەك ءجۇزدى, قاراسىنان الاسى مول قوي كوزدى الىپ قازاقتىڭ تۋىن ۇستاپ, ماڭدايدا ءجۇرۋى ءبىر عانيبەت ەمەس پە؟!
بىراق نۇرماحان العاشقى اينالىمنان اسا المادى. شۆەد جىگىتى ەۋرەنگە جول بەرىپ قويدى. بۇل شۆەد وليمپادانىڭ قولاسىن قانجىعالادى. قازىر ويمەن شولىپ وتىرساق, نۇرماحاننىڭ ءوز توبىن جارىپ شىعىپ, فينالدا ايقاسۋعا تولىق مۇمكىندىگى بار ەدى. ءبىزدىڭ جىگىتپەن ءبىر توپقا ل.ۆانەك (پولياك), ر.شاۆۆي (تۋنيس), ناۆي (ەستون), چۋگوس (بەلورۋس), لۋي (قىتاي), باروش (ماجار), جوعارىداعى ەۋرەن (شۆەد), پاتريكەەۆ (ارميان), باروەۆ (رەسەيلىك), باباجانزادە (يران), ءالي اكپار (يراك), ت.ب. تۇسكەن. بۇلاردىڭ قاي-قايسىسىن جەڭۋگە نۇرماحاننىڭ مۇمكىندىگى بار ەدى. 2010 جىلعى الەم بىرىنشىلىگىنىڭ كۇمىس جۇلدەگەرى يۋري پاتريكەەۆتى قوسپاعاندا, قالعاندارىن بۇدان بۇرىن تالاي جارىستا جەڭگەن بولاتىن. باستى قارسىلاستارى: تۇرىك رىزا مەن كۋبالىق لوپەس كەلەسى توپتا بولاتىن.
جەرەبەگە قاراپ بار قازاق «ا, قۇدايلاپ» قۋاندىق. بىراق قۋانىش ۇزاققا سوزىلمادى. جاعدايدىڭ قالاي بولعانى جايلى نۇرماحاننىڭ ايتقانى: «كۇرەستىم, جىعىلدىم, جەڭىلدىم. حالقىما وتىرىك ايتىپ اقتالعىم دا كەلمەيدى. كىلەمگە شىعاردان 15 مينۋت بۇرىن, دەنە قىزدىرىپ الماق بولىپ جاتتىعۋ جاساپ جاتقاندا اياعىمنىڭ توبىعىن شىعارىپ الدىم. قاسىمدا جەكە باپكەرىم مارات تۇرلىحانوۆ بولدى...».
ودان بەرى سەگىز جىل اعىپ ءوتتى. نۇرماحان كۇرەس كىلەمىنەن كەتكەن جوق. پاندەميانىڭ الدى – قاڭتار ايىنىڭ اياعىندا گرەك-ريم كۇرەسىنەن فرانتسيادا وتكەن گران-پري ءتۋرنيرى «انري دەگلان – 2020-عا» قاتىسىپ, كۇمىس جۇلدە الىپ قايتتى. فينالدا جاراقاتىنا بايلانىستى كىلەمگە شىقپادى. جاقىندا حابارلاسقانىمدا «قازىر جاراقاتىم تولىق جازىلدى, ۇزبەي جاتتىعۋ جاساپ ءجۇرمىن, بۇيىرسا مەنى كىلەمنەن كورەسىز اعا», دەدى. ارينە, ءتاڭىرىم سولاي بولۋعا جازسىن!
