ورتالىقتا حالقىمىزدىڭ ۇلى اقىنى, ويشىلى ابايدىڭ ءومىرى مەن شىعارماشىلىق الەمىنە ساياحات جاساۋعا بولادى. ورتالىقتىڭ اشىلۋىنا اۋداندىق بيۋدجەتتەن قارجى بولىنگەن.
"مەملەكەت باسشىسى قاسىم-جومارت توقاەۆ ءوزىنىڭ سوزىندە وقىرمانداردىڭ ساۋاتىن ارتتىرۋعا كوڭىل ءبولۋ كەركتىگىن ايتقان بولاتىن. بۇل رەتتە, كىتاپحانانىڭ ماڭىزى زور. الايدا, كوپتەگەن كىتاپحانالار جاڭعىرتۋدى جانە تسيفرلاندىرۋدى قاجەت ەتەدى. ال ءبىزدىڭ كىتاپحانادا جاڭا فورماتتاعى زالداردا الاڭسىز وتىرىپ, كىتاپ وقۋعا بولادى", دەيدى اۋداندىق كىتاپحانا ماماندارى.
ايتا كەتەيىك, اقكول اۋداندىق كىتاپحاناسىنا 1990 جىلى ۇلى ابايدىڭ ەسىمى بەرىلگەن. بۇگىنگى تاڭدا كىتاپحانا قورىندا 61000 ەكزەمپليار كىتاپ بار. ونىڭ ىشىندە 6780 مەملەكەتتىك تىلدە. كىتاپحانا ءۇش بولىمنەن تۇرادى.
"رابيس" جۇيەسى كومەگىمەن ەلەكتروندى كاتالوگ ءۇشىن بيبليوگرافيالىق جازبا جۇرگىزىلەدى. ابونەمەنت, ەكى وقىرمان زالى جانە ادىستەمە زالىنان تۇراتىن قىزمەت كورسەتۋ ءبولىمى جۇمىس ىستەيدى.
بۇدان بولەك, اۋداندىق كىتاپحانادا 2007 جىلدان باستاپ, كەڭەس وداعىنىڭ باتىرى, حالىق قاھارمانى, قر ءبىرىنشى قورعانىس ءمينيسترى, گەنەرال مايور ساعادات نۇرماعامبەتوۆتىڭ مۋزەيى بار. 2018 جىلى كىتاپحانادا "رۋحاني جاڭعىرۋ" اۋداندىق كەڭسەسى مەن كوۆوركينگ ورتالىق اشىلدى. اقكول اۋدانىندا اشىلىپ وتىرعان ابايدىڭ ادەبي ورتالىعى بۇل اقمولا وبلىسىندا اشىلىپ وتىرعان ءۇشىنشى وسىنداي ورتالىق.
