دەگەنمەن ءبىلىم سالاسىنداعى جەمقورلىق ازايار ەمەس. اسىرەسە كوللەدجدەرگە قاتىستى شاعىمدار كوپ. «وندا جەمقورلىق ەكى باعىتتا بولادى. باستىسى – مەملەكەتتەن الاتىن گرانتقا تالاس. وسى ماسەلە بويىنشا بىرقاتار كوللەدج باسشىلارى ۇستالعان. سونداي-اق كوپتەگەن كوللەدج ستۋدەنتتەرى تىزىمدە عانا بار دا, شىندىعىندا ساباققا مۇلدەم كەلمەيدى. شاكىرتاقىسىن مۇعالىم جانە كوللەدج باسشىسى ءوزارا جينايدى. ستۋدەنت ساباققا بارماي جۇمىس ىستەيدى, ساۋدادا جۇرەدى. وسىلايشا, جاستاردىڭ دا تۇسىنىگىندە كوللەدج تۋرالى جەمقورلىق پىكىر قالىپتاسادى. وسىنداي ولقىلىقتار ورىن الۋدا, ونى مويىنداۋىمىز كەرەك. بۇل ماسەلەلەرگە قاتىستى زاڭدى تەتىكتەردى ىسكە قوسۋ كەرەك», دەدى وبلىستىق Nur Otan پارتياسى فيلالى توراعاسىنىڭ ءبىرىنشى ورىنباسارى بەيسەن تاجىباەۆ سىبايلاس جەمقورلىققا قارسى ءىس-قيمىل اگەنتتىگى جانىنان قۇرىلعان رەسپۋبليكالىق اقپاراتتىق-اعارتۋشىلىق شتابى وكىلدەرىمەن وتكەن كەزدەسۋدە.
ال وبلىستىق ءماسليحاتتىڭ حاتشىسى قايرات بالابيەۆ كورسەتكىش قۋىپ, ستاتيستيكا ءۇشىن جۇمىس ىستەۋگە بولمايتىنىن جەتكىزدى. «وسى ورايدا زاڭ تالاپتارىنا وزگەرىستەر ەنگىزۋ قاجەت-اق. قازىرگى كەزدە مەملەكەتتىك قىزمەتشىلەر قورقادى. ءوز بەتتەرىنشە شەشىم قابىلداي المايدى. ويتكەنى قىسپاق كۇشتى. مىسالى اۋىلداردا اكىم بولۋدان ەل قاشادى, ەشكىم بارعىسى كەلمەيدى. سوندىقتان نەگىزسىز قۋدالاۋدى ازايتۋ قاجەت. زاڭدى وزگەرتپەي ءتارتىپ بولمايدى», دەدى ءماسليحات حاتشىسى.
سىندارلى ديالوگ قۇرۋ جانە كەڭەيتىلگەن اقپاراتتىق ءىس-شارالار ارقىلى پاراساتتىلىق قاعيداتتارىن دامىتۋ نەگىزگى ماقساتى سانالعان كەزدەسۋدە سىبايلاس جەمقورلىقتىڭ الدىن الۋدى كوزدەگەن شتاب مۇشەلەرى قوعامدىق ساناعا سەرپىلىس جاساۋ ارقىلى جەمقورلىقتى جويۋعا بولاتىندىعىن ايتتى. وبلىس اكىمى ومىرزاق شوكەەۆ كوررۋپتسيامەن كۇرەسۋدىڭ ەڭ نەگىزگى جولى – ونىڭ الدىن الۋ ەكەنىن, وڭىردە جەمقورلىقتىڭ بۇرىنعى جىلدارمەن سالىستىرعاندا ەداۋىر تومەندەگەنىن ايتىپ ءوتتى. وسى رەتتە, رەسپۋبليكالىق اقپاراتتىق-اعارتۋشىلىق شتابىمەن بىرلەسە جۇمىس ىستەۋدىڭ جاڭا سەرپىن بەرەتىنىن اتادى.
ءوز كەزەگىندە اگەنتتىكتىڭ پاراساتتىلىق دەپارتامەنتىنىڭ ديرەكتورى ع.اسان ۇلى اقپاراتقا قولجەتىمدىلىكتى وڭتايلاندىرىپ, مەملەكەتتىك بيلىككە دەگەن سەنىمدەرىن ارتتىرۋ جانە بيلىك پەن ازاماتتىق قوعام اراسىنداعى بايلانىستىڭ تىكەلەي ارناسىن قۇرۋ ماقساتىندا قۇرىلعان «اشىق بيۋدجەتتەردىڭ ينتەراكتيۆتى كارتاسى» جوباسىمەن تانىستىردى. تۇركىستان وبلىسى بويىنشا مەكەمەلەردىڭ جالپى سوماسى 373, 6 ملرد تەڭگە بيۋدجەتى جاريالانعان. بۇل ورايدا دەپارتامەنت باسشىسى جىل سوڭىنا دەيىن تولىق جاريالانۋى بويىنشا ۇسىنىس-پىكىرىن ءبىلدىردى. مەملەكەت باسشىسى قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىنىڭ نەگىزىندە ازاماتتارعا قولايلى, قولجەتىمدى جانە جەدەل قىزمەت كورسەتەتىن «سەرۆيستىك اكىمدىكتەردىڭ» تۇركىستان وبلىسىنىڭ 8 قالا, اۋدانىندا عانا اشىلعان. بۇل ورايدا عانيجان اسان ۇلى اشىقتىقتى قامتاماسىز ەتەتىن سەرۆيستىك اكىمدىكتىڭ وڭىردەگى بارلىق قالا, اۋدانداردا اشىلۋى ءتيىس ەكەنىن جەتكىزدى. ال سىبايلاس جەمقورلىققا قارسى ءىس-قيمىل اگەنتتىگىنىڭ جانىنان قۇرىلعان اقپاراتتىق ۇگىت-ناسيحات شتابىنىڭ ءتورايىمى ىرزا تۇرسىنزادا: «ۇلت بولىپ ۇيىسۋدىڭ باستى تەتىگى – رۋحاني تاربيە, ياعني ادامزاتتىڭ بويىندا ادامگەرشىلىك, ادالدىق, ادىلدىك جانە پاراساتتىلىق سىندى قۇنى بيىك قاسيەتتەر بولسا, سوندا عانا سىبايلاس جەمقورلىق سياقتى تەرىس قۇبىلىستىڭ قوعام ومىرىندە جولى كەسىلەدى», دەپ اتاپ ءوتتى.
اگەنتتىكتىڭ تۇركىستان وبلىسى بويىنشا دەپارتامەنتىنىڭ باسشىسى حاكيم كوشقاليەۆ, وبلىستىق اكىمدىكتىڭ ءبولىم باسشىلارى مەن قىزمەتكەرلەرى, وبلىستىق ءماسليحات دەپۋتاتتارى, اۋماقتىق دەپارتامەنت باسشىلارى, وبلىستىق اقپاراتتىق ۇگىت-ناسيحات شتابىنىڭ توراعاسى, ارنايى مونيتورينگتىك توپ مۇشەلەرى, ۇكىمەتتىك ەمەس ۇيىم وكىلدەرى قاتىسقان جيىندا, سونداي-اق حالىقپەن سىندارلى سۇحبات قۇرۋ جانە پاراساتتىلىق قۇندىلىقتارىنا كوبىرەك كوڭىل ءبولۋ, جەمقورلىق كورىنىستەرىن قابىلداماۋ ارقىلى ادال ەڭبەك ەتۋ – ءاربىر ەل ازاماتىنا جۇكتەلگەن ورتاق مىندەت ەكەنى ايتىلدى.
تۇركىستان وبلىسى
