ونلاين رەجىمدە وتكەن شاراعا مادەنيەت جانە سپورت مينيسترلىگىنىڭ مادەنيەت جانە ونەر ىستەرى دەپارتامەنتىنىڭ ديرەكتورى كۇمىس سەيىتوۆا, مادەنيەت جانە سپورت مينيسترلىگىنىڭ مادەنيەت جانە ونەر ىستەرى دەپارتامەنتىنىڭ مۋزەيلەر مەن كىتاپحانالار باسقارماسىنىڭ باسشىسى, حاتشى گۇلزەينەپ پازىلوۆا, ۇلتتىق اكادەميالىق كىتاپحاناسىنىڭ ديرەكتورى ءۇمىتحان مۇڭالباەۆا, قازاقستان رەسپۋبليكاسى ۇلتتىق كىتاپحاناسىنىڭ باسشىسى باقىتجامال وسپانوۆا, سونداي-اق «zoom» پلاتفورماسى ارقىلى باسقا ايماقتارداعى كىتاپحانا ديرەكتورلارى قاتىستى.
دوڭگەلەك ۇستەل بارىسىندا مادەنيەت جانە سپورت مينيسترلىگىنىڭ مادەنيەت جانە ونەر ىستەرى دەپارتامەنتىنىڭ ديرەكتورى ك.سەيىتوۆا اتالعان شارانىڭ ماڭىزدىلىعىنا توقتالىپ: «مەملەكەت باسشىسى قاسىم-جومارت توقاەۆ اعىمداعى جىلدىڭ 22 قازانىندا وتكەن ۇلتتىق قوعامدىق سەنىم كەڭەسىنىڭ IV وتىرىسىندا جاساعان بايانداماسىندا كىتاپحانالار اعارتۋشىلىق ءرولىن جوعالتپاي, زاماناۋي تالاپتارعا ساي بولۋ كەرەكتىگىن اتاپ ءوتتى. سونداي-اق كىتاپحانالاردىڭ وسكەلەڭ ۇرپاق بويىندا وقۋ مادەنيەتىن قالىپتاستىرۋ, وقۋ ساۋاتتىلىعىن دامىتۋ ىسىندەگى ەرەكشە رولىنە باس نازار اۋدارعان ەدى. وسىعان وراي رەپۋبليكالىق جانە جەرگىلىكتى اتقارۋشى ورگاندارىنا قاراستى كىتاپحانالار وزدەرىنىڭ ءداستۇرلى قىزمەت كورسەتۋ ساپاسىن ارتتىرىپ, ۋاقىت تالاپتارىنا ساي وقىرمانداردى تارتۋدىڭ جاڭا جولدارىن ىزدەستىرۋ قاجەتتىلىگى تۋىنداپ وتىر», دەدى.
ايتا كەتەيىك, جاستارعا ارنالعان كوۆوركينگ ورتالىقتارىن اشۋ ەلباسى ن.ءا.نازارباەۆتىڭ پارتيانى جاڭعىرتۋ بويىنشا تاپسىرماسىمەن ورىندالعان بولاتىن. جانە وسى ماقساتتا بىلتىرعى جاستار جىلى قارساڭىندا ەلىمىزدىڭ بارلىق ايماقتارىنداعى كىتاپحانالاردا جاستار كوۆوركينگ ورتالىقتارى اشىلعان ەدى. بۇل تۋرالى ۇلتتىق اكادەميالىق كىتاپحاناسىنىڭ ديرەكتورى ءۇ.مۇڭالباەۆا دا ءوز سوزىندە ايتىپ ءوتتى. «قازىرگى كەزدە بارلىق قازاقستان كىتاپحانالارى بىرىگىپ, سەرپىلىس جاساۋىمىز كەرەك. مەملەكەت باسشىسى بىزگە ۇلكەن سەنىم ارتىپ وتىر. سول سەنىمدى اقتاۋ ءۇشىن, ەڭ الدىمەن, جاستاردىڭ كىتاپ وقۋعا دەگەن تالپىنىسىن ارتتىرۋ شارت. البەتتە, جاستار كوۆوركينگ ورتالىقتارى جاستاردىڭ عىلىم-بىلىمگە دەگەن قىزىعۋشىلىعىن ارتتىرۋعا كومەكشى ءبىر قۇرال», دەدى ول.
ناقتىلاپ ايتساق, كوۆوركينگ ورتالىقتارى – جاستار ۇيىمدارىنىڭ جۇمىسىن جۇزەگە اسىرۋعا مۇمكىندىك بەرەتىن ۇجىمدىق كەڭسە قىزمەتى. جاستارعا ءداستۇرلى كىتاپحانالاردىڭ ىشىندە جاعداي جاساپ, عىلىم-بىلىمگە دەگەن قۇلشىنىسىن ارتتىرۋدى ماقسات تۇتقان بۇل جوبا زاماناۋي كىتاپحانالىق جۇيەنىڭ ءبىر سيپاتى ىسپەتتەس. مۇندا الەۋمەتتىك جوبالار اياسىندا جاستار ءتۇرلى فورماتتاعى ءىس-شارالاردى وتكىزىپ, كەڭەس الىپ, يدەيالارىن تالقىلاۋعا مۇمكىندىك الادى.
