ايماقتار • 09 قاراشا، 2020

اقپارات ايناسىنا اينالعان «Aqtóbe»

بۇگىنگى كۇنى ءوڭىر تۇرعىندارىنىڭ 98 پايىزى «Aqtóbe» تەلەارناسىنان تارالاتىن رەسپۋبليكا، قالا جانە وبلىس كولەمىندەگى جاڭالىقتار مەن ءتۇرلى تاقىرىپتارداعى تەلەباعدارلامالاردى تاماشالاپ ءجۇر. جارتى عاسىردان استام ۋاقىت بويى ءوڭىردىڭ اقپاراتتىق ايناسىنا اينالعان 60 جىلدىق مەرەيتويىن اتاپ ءوتتى.

بايان قۋاندىققىزى

تەلەارنا ۇجىمىن تەلەۆيزيا سالاسىندا قىزمەت ەتكەن ارداگەرلەر، اقپارات قۇرالدارىنىڭ وكىلدەرى، ءوڭىر باسشىسى، «اقتوبە مەديا» جشس ديرەكتورى ر.وتىنشين، جامبىل جانە ماڭعىستاۋ وبلىستىق تەلەارنالارىنىڭ باسشىلارى – ب.ءجۇسىپ، م.الىبەك ۇلى قۇتتىقتاپ كەلدى. وبلىس اكىمى وڭداسىن ورازالين الپىس جىلدىق اسۋدى ەڭسەرگەن تەلەارنا ۇجىمىن قۇتتىقتاپ، العىس حاتتار مەن سەرتيفيكاتتار تاپسىردى:

«وسىدان 60 جىل بۇرىن «Aqtóbe» تەلەارناسىنىڭ نەگىزى قالانىپ، العاشقى ايماقتىق حابارلار ەفيرگە شىعا باستادى. وسى جىلدار ىشىندە قالىڭ جۇرتشىلىقتىڭ قۇرمەتىنە بولەنگەن «Aqtóbe» تەلەارناسى وبلىسىمىزدىڭ رۋحاني-مادەني، الەۋمەتتىك، ساياسي-قوعامدىق قۇندىلىقتارىنىڭ دامۋىنا، ۇلتتىق سانا-سەزىمنىڭ قالىپتاسۋىنا قوسقان ۇلەسى ولشەۋسىز. زامان تالابىنا ساي وڭ مەن سولىڭدى، اق پەن قارانى اجىراتاتىن ۇلتجاندى حابارلاردىڭ كورسەتىلۋى ۇرپاق ساناسىنا وي سالارى انىق. 60 جىل ىشىندە ءار قازاقتىڭ تورىنەن ورىن العان كوگىلدىر ەكراننان سان ءتۇرلى قۇندى دۇنيەلەر جارىق كورىپ، قالىڭ كورەرمەنگە جول تارتىپ كەلەدى. وسى جىلدار ىشىندە «Aqtóbe» تەلەارناسى زيالى قاۋىمنىڭ رۋحاني، مادەني وشاعىنا اينالدى. قارا شاڭىراقتا ءار جىلدارى ەڭبەك ەتكەن اعا بۋىن وكىلدەرى كوپتەگەن جاس مامانداردى تاربيەلەپ، بولاشاققا باعىت-باعدار بەرىپ، جول سىلتەدى. وتكىر وي، باتىل پىكىر، تىڭ باستامالار كوتەرىپ، ايماقتىڭ ءتۇرلى جاڭالىقتارى مەن الەۋمەتتىڭ مۇڭ-مۇقتاجىن ايقىن كورسەتەتىن تەلەۆيزيا مەكتەبىنىڭ قالىپتاسۋىنا اتسالىستى»، – دەدى وبلىس باسشىسى.

بۇگىنگى كۇنى حابارلارى وبلىستىڭ 112 ەلدى مەكەنىنە تارايتىن «Aqtóbe» تەلەارناسىنىڭ قازىرگى زامانعا لايىق سوڭعى ۇلگىدەگى تەحنيكالارمەن جابدىقتالعان 5 ستۋدياسى بار.

سونداي-اق سوڭعى جىلدارى تەلەارنانىڭ شىعارماشىلىق ۇجىمنىڭ رۋحاني-مادەني، الەۋمەتتىك، ساياسي-قوعامدىق ماسەلەلەردى كوتەرگەن وزەكتى باعدارلامالارى، سۇحباتتارى، اۆتورلىق حابارلارى مەن دەرەكتى فيلمدەرى ءوڭىر تۇرعىندارىنىڭ جۇرەگىنەن جول تاۋىپ ءجۇر.

اقتوبە