الدابەرگەن مىرزابەكوۆ 1930 جىلى قازىرگى قاراعاندى وبلىسى, جاڭاارقا اۋدانى, تۇگەسكەن اۋىلىندا تۋىپتى. جارىقتىق ەكى جىلدىڭ الدىندا دۇنيەدەن ءوتتى.
باي-ولكەنىڭ ونەر تاريحىن زەرتتەۋشى تايف تاۋكەي ۇلى جازعان «موڭعوليا قازاقتارىنىڭ تەاتر تارلاندارى» اتتى كىتاپتىڭ 266-شى بەتىندە: «وتكەن عاسىردىڭ ورتاسىندا كەمەلدەنگەن سوتسياليزم جولىنا تۇسكەن موڭعول ۇكىمەتى ەلدىڭ باتىس شەبىندە ءومىر ءسۇرىپ جاتقان قازاقتاردىڭ مۋزىكا, ساز ونەرىن كاسىبيلەندىرۋ ماقساتىندا قازاقستاننان جوعارى دەڭگەيلى مامان شاقىردى. ءبىرىنشى بولىپ حابيدوللا تاستانوۆ كەلدى. ول كىسىدەن كەيىن ءىزىن جالعاپ 1962 جىلى الدابەرگەن مىرزابەكوۆ كەلىپ, ۇلت اسپاپتار وركەسترىنە ديريجەرلىك قىزمەت اتقاردى. الدابەرگەن اعاي ءوزىن ۇلت جاناشىرى رەتىندە كورسەتە ءبىلدى. شارتتى كەلىسىم مەرزىمى اياقتالعان سوڭ دا, باستاعان ءىسىن جول ورتادا تاستاپ كەتپەي, تاعى ەكى جىل جۇمىس ىستەپ, وركەستردى بيىك دەڭگەيگە كوتەردى. بۇل كىسىنىڭ باستى قاسيەتى – مۋزىكا مادەنيەتىنە وتە جەتىك, پارتيتۋرانى جاتقا بىلەتىن قابىلەتتى مامان ەدى», دەپ جازىپتى.
وسىلاي قوبدا بەتى قازاقتارىن اعارتۋعا بارعان الدەكەڭ كوپتەگەن شاكىرت تاربيەلەگەن. سونىڭ ءبىرى قازىر جاسى سەكسەننىڭ سەڭگىرىنە شىققان قاراعاندىلىق رايحان مۇحامەت ۇلىنىڭ ەستەلىگىندە: «باي-ولكە ايماعىندا 1956 جىلى مۋزىكالىق دراما تەاتر اشىلىپ, ونى اياعىنان تۇرعىزۋ ءۇشىن قازاقستاننان ح.تاستانوۆ اعامىز كەلدى. ول كىسى 1961 جىلى ەلىنە كەتكەن سوڭ ءبىر جىلدان كەيىن ورنىنا الدابەرگەن مىرزابەكوۆ اعاي كەلدى. بۇل كىسى قازاق كۇي ونەرىن وركەسترگە ءتۇسىرۋدىڭ شىنايى شەبەرى, كۇي تابيعاتىن ەرەكشە تانىعان داڭقتى ديريجەر ەدى. اسىرەسە قۇرمانعازىنىڭ «كىسەن اشقان», «تۇرمەدەن قاشقان», «امان بول, شەشەم», «سارىجايلاۋ», «سارىارقا», «الاتاۋ» كۇيلەرىن ءبىزدىڭ وركەسترگە بەيىمدەپ بەردى. ونىڭ سىرتىندا, الدەكەڭ «تۇلبا كول شايقاسى» اتتى سپەكتاكلگە حالىق كۇيلەرى نەگىزىندە مۋزىكا جازىپ شىقتى», دەپتى.
كوپ ايتىلا بەرمەيتىنى بولماسا, سوتسياليزم داۋىرىندە شەتەل قازاقتارىنىڭ ونەر-مادەنيەتى ءۇشىن اتسالىسقان, ماڭداي تەرىن توككەن تۇلعالار كوپ.
