– ءدىني باسقارما ءتول تەلەارنا اشۋدى بىلتىردان بەرى قولعا الىپ, وسى باعىتتا بىرقاتار جۇمىس ىستەدى. ەندى, مىنە, سول تابىسقا قول جەتكىزىپ وتىرمىز. ءتول ارنامىز قمدب قۇرىلعانىنا 30 جىل تولعان مەرەيتوي قارساڭىندا اشىلۋىنىڭ ءوزى تاريحي وقيعا. اللاعا شۇكىر, قازىر ءمۇفتياتتىڭ مەديا سالاسىنداعى الەۋەتى جىلدان-جىلعا جەتىلىپ, اقپارات كەڭىستىگىندە وزىندىك ورنىن تاپتى. وتىز جىل مەرزىم ىشىندە «يمان» جۋرنالى مەن «مۇنارا» گازەتى وقىرمانعا جول تارتتى. بۇگىندە ءدىني باسقارماعا قاراستى 21 سايت جۇمىس ىستەيدى. بۇدان بولەك ءمۇفتيات جانىنان اشىلعان «حيكمەت» تەلەراديوستۋدياسى 10 جىلعا جۋىق ءوز ونىمدەرىن كورەرمەندەر مەن تىڭدارماندارعا ۇسىنىپ كەلەدى. اللاعا شۇكىر, بۇگىندە يۋتۋب جەلىسىندەگى ءدىني باعىتتا جاسالعان ونىمدەردىڭ 70 پايىزدان استامى ءدىني باسقارماعا تيەسىلى. جاڭادان دۇنيەگە كەلگەن ارنا تەك ءدىني مازمۇنداعى تەلەباعدارلامالارمەن شەكتەلمەيدى. ەفيردە تاريحي-تانىمدىق, عىلىمي-تاعىلىمدىق, قازاقى سالت پەن داستۇرگە باسىمدىق بەرىلەدى, – دەدى ءباسپاسوز كونفەرەنتسياسىنىڭ بەتاشار ءسوزىن ايتقان قمدب توراعاسىنىڭ ورىنباسارى ەرشات وڭعاروۆ.
ءوز كەزەگىندە ءسوز تىزگىنى تيگەن مۇحامەدجان تازابەك جاڭادان ءدىني ارنا اشىلۋىنا بايلانىستى بۇعان دەيىن 10 جىل بويى ۇزدىكسىز ءدىني-اعارتۋشىلىق باعىتتا جۇمىس اتقارىپ كەلگەن «Asyl arna» جابىلاتىنىن, الداعى ۋاقىتتا ء«تالىم تۆ» اتتى جاڭا ارنا اشىپ, قازاق قوعامىنىڭ ۇستىنى وتباسىلىق, تۇرمىستىق, الەۋمەتتىك ماسەلەلەردى جاقسى جاعىنان ناسيحاتتايتىنىن ايتتى. سونىمەن قاتار 10 جىل بويى جيناقتالعان ءدىني كونتەنتتەردى تۇگەلدەي جاڭا ارناعا باسى ءبۇتىن وتكىزىپ بەرەتىنىن جەتكىزدى.
جيىن بارىسىندا جاڭا ارنانىڭ الداعى جۇمىس باعىتى, شىعارماشىلىق الەۋەتىنىڭ مازمۇنى جايلى بايانداعان تەلەارنا باسشىسى نۇرجان دارقۇلوۆتىڭ سوزىنە قۇلاق تۇرسەك, «حالىق ارناسى» ءدىني-اعارتۋشىلىق باعىتتا 24 ساعات جۇمىس ىستەپ, ەكى تىلدە حابار تاراتادى. اقلاق, اقيدا, پايعامبارلار جانە يسلام تاريحى ماسەلەلەرى قامتىلادى. قوعامدا وزەكتىلىگى زور شاريعي سۇراقتارعا جاۋاپ بەرۋ ءۇشىن «سۇراق-جاۋاپ» ايدارى قاراستىرىلعان. بۇعان قمدب ءپاتۋا ءبولىمىنىڭ ماماندارى تارتىلادى. سونىمەن قاتار دارىستىك سيپاتتاعى «قۇران وقىپ ۇيرەنەيىك», «ناماز وقي بىلەيىك», «دۇعا جاتتايىق», ت.ب. باعدارلامالار بار. تەلەارنا ءوز جۇمىسىن قوعامداعى زايىرلى قۇندىلىقتار مەن شاريعات تالاپتارىن قابىستىرا وتىرىپ جۇرگىزەدى. ەكىنشىدەن, قازاق دالاسىنىڭ سان عاسىرلىق ءدىني مادەنيەتى بار. سول سەبەپتى ارنادا ءدىن مەن ءداستۇر ساباقتاستىعىن كەڭەيتۋگە باعىتتالعان كونتەنتتەرگە باسىمدىق بەرىلەدى. اتاپ ايتقاندا, «اتانىڭ ءسوزى – اقىلدىڭ ءسوزى», ء«ىنجۋ-مارجان», «تۇلعالار تاعىلىمى», «رۋحاني جاڭعىرۋ» قاتارلى باعدارلامالار كوپشىلىكتىڭ كوزايىمىنا اينالادى. سونىمەن بىرگە ء«مۇفيات تىنىسى», ء«بولىم ساعاتى», «باسپاسوزگە شولۋ», «حالال دامۋ» ايدارىمەن اقپاراتتىق سيپاتتاعى باعدارلامالار كورسەتىلەدى. بالالارعا ارنالعان مۋلتفيلم, تاربيەلىك ماندەگى «بالالارعا بازارلىق» جوباسى مەن بەينەباياندار دا بار.
