ايماقتار • 06 قاراشا، 2020

ناعي ءىلياسوۆتىڭ 100 جىلدىعىنا وراي ەسكەرتكىش-ءبيۋستى اشىلدى

بۇگىن وبلىس اكىمى گۇلشارا ابدىقالىقوۆانىڭ قاتىسۋىمەن كەڭەس وداعىنىڭ باتىرى ناعي ءىلياسوۆتىڭ 100 جىلدىعىنا وراي ەسكەرتكىش-ءبيۋستىنىڭ سالتاناتتى اشىلۋ ءراسىمى ءوتتى، دەپ حابارلايدى Egemen.kz

ايىم ءداۋىت

"بيىل قانشاما بوزداقتى قىرشىنىنان قيىپ، قانشاما ءۇيدى اڭىراتىپ كەتكەن سوعىستىڭ اياقتالعانىنا 75 جىل بولدى. سول سۇراپىل سوعىسقا قاتىسىپ، كەڭەس وداعىنىڭ باتىرى اتانعان ناعي ءىلياسوۆتىڭ تۋعانىنا 100 جىل تولىپ وتىر. قايراتكەر تۇلعانىڭ جارقىن بەينەسى حالقىنىڭ جادىندا ماڭگىلىك ساقتالادى. ەسكەرتكىش-ءمۇسىننىڭ اشىلۋ سالتاناتى بارشاڭىزعا قۇتتى بولسىن!"، دەدى گۇلشارا ابدىقالىقوۆا.

سالتاناتتى شاراعا ارداگەرلەر، مەملەكەت جانە قوعام قايراتكەرلەرى، مەملەكەتتىك مەكەمە وكىلدەرى مەن ن.ءىلياسوۆتىڭ بالاسى رينات ءىلياسوۆ تا قاتىسىپ، كورسەتىلگەن قۇرمەتكە العىسىن جەتكىزدى.

ناعي ءىلياسوۆ 1920 جىلى سىر توپىراعىندا دۇنيەگە كەلگەن. 1933-1936 جىلدارى بالالار ۇيىندە تاربيەلەندى. 1936-1939 جىلدارى ورتالىق ازيا ۋنيۆەرسيتەتىنىڭ جۇمىسشى فاكۋلتەتىن، تاشكەنت پەداگوگيكالىق ۋچيليششەسىن ءبىتىرىپ، مەكتەپتە نەمىس جانە تاريح پاندەرىنەن ساباق بەردى.

1942 جىلى قاڭتاردا مايدانعا اتتانىپ، ۆەنگريانىڭ بۋداپەشت قالاسىن ازات ەتۋدە كورسەتكەن ەرلىگى ءۇشىن "كەڭەس وداعىنىڭ باتىرى" اتاعى بەرىلگەن. بۋداپەشتە ونىڭ ەسىمىمەن اتالاتىن كوشە بار.

1945 جىلى ماسكەۋدە وتكەن جەڭىس شەرۋىنە قاتىسقان. سوعىستان كەيىن تۋعان جەرىندە جاۋاپتى قىزمەتتەر اتقاردى. اتاپ ايتساق، اۋداندىق پارتيا كوميتەتىنىڭ حاتشىسى، "قازاق سسر-ءنىڭ 50 جىلدىعى"، "قاراوزەك" جانە «كومسومول» كەڭشارلارىنىڭ ديرەكتورى، وبلىستىق اتقارۋ كوميتەتىنىڭ ءبولىم مەڭگەرۋشىسى قىزمەتتەرىندە بولدى، "جاۋىنگەر جولى" كىتابىنىڭ اۆتورى.

ناعي ءىلياسوۆ 1987 جىلى دۇنيەدەن وتسە دە، ەسىمى وشكەن جوق. ۇزاق جىلدار ءوزى باسقارعان "قازاقستاننىڭ 50 جىلدىعى" اۋىلىنا ەسىمى بەرىلدى. بۇگىندە بۇل ەلدى مەكەن – رەسپۋبليكاداعى ەڭ ۇزدىك جانە ۇلگىلى اۋىلداردىڭ ءبىرى. ەسكەرتكىش-بيۋست باتىردىڭ اتىمەن اتالاتىن №9 مەكتەپ-گيمنازياسى اۋلاسىندا ورنالاسقان. اۆتورى – جەرلەسىمىز، قازاقستان سۋرەتشىلەر وداعىنىڭ مۇشەسى، ءمۇسىنشى جاركەن يسماعۇلوۆ.

ايتا كەتەيىك، كەڭەس وداعىنىڭ باتىرى ناعي ءىلياسوۆتىڭ تۋعانىنا 100 جىل تولۋىنا وراي تۇرعان ۇيىنە مەموريالدىق تاقتا ورناتىلىپ، "باتىردىڭ ءۇش ءومىرى – ءۇش باقىتى" اتتى كىتاپتىڭ تۇساۋى كەسىلدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز