جاھاندىق جارىستىڭ وتۋىنە "Fiestalonia Milenio" ەۋروپالىق ۇيىمى ۇيىتقى بولدى. تالانتتى جاستاردى انىقتاۋ, ولاردى بەكزات ونەرگە باۋلۋ ارقىلى شىعارماشىلىق قارىم-قابىلەتىن دامىتۋدى كوزدەگەن ونەر سايىسىنا الەمدەگى جوعارى وقۋ ورىندارى جانىنداعى انسامبلدەر مەن جەكە شىعارماشىلىق ۇجىمدار قاتىسىپ, بىرنەشە نوميناتسيا بويىنشا باقتارىن سىنادى.
"Tomiris" توبى ەكى كەزەڭنەن تۇراتىن فەستيۆالدىڭ العاشقى اينالىمىندا "سىلقىلداق" ۇلتتىق ءبيىن ورىنداسا, ەكىنشى تۋردا انسامبل مۇشەسى داريا مۇحيتوۆانىڭ ورىنداۋىنداعى "ورتەكە" ءبيىن كورەرمەن نازارىنا ۇسىندى.
ەكى حورەوگرافيالىق كومپوزيتسيانىڭ جالپى ۇزاقتىعى – 5 مينۋت. سايىسقا الەمدىك دەڭگەيدە تانىمال ونەر مايتالماندارى قازىلىق جاسادى.
كونكۋرس بارىسىندا ونەر ۇجىمدارى كاسىبي جانە ارتىستىك ورىنداۋشىلىق شەبەرلىگى, ساحنالىق مادەنيەتى, بي كومپوزيتسياسىنىڭ وزىندىك ەرەكشەلىگى مەن شىعارمانىڭ كوركەمدىك قۇندىلىعى بويىنشا باعالاندى. سونىمەن قاتار مۋزىكالىق ماتەريالداردىڭ سايكەستىگى, ءبيدىڭ ۇلتتىق نەگىزدەرىنىڭ شىنايىلىعى جانە ۇلتتىق ءستيلدىڭ ۇيلەسىمدىلىگى دە نازارعا الىندى.
– "قازاق بي ونەرىنىڭ حانشايىمى" اتانعان شارا جيەنقۇلوۆانىڭ بۇگىنگى ءىزباسارلارى قىزدار ۋنيۆەرسيتەتىنىڭ "Tomiris" ءانسامبلى جارىس بارىسىندا ءوز شەبەرلىكتەرىن تولىقتاي پاش ەتىپ, جەڭىس تۇعىرىنان كورىندى. بۇل – ءوز ونەرلەرى ارقىلى ءبيدىڭ ومىرىندەگى الار ورىنى مەن اسەرىن شەبەر كورسەتە بىلگەن بويجەتكەندەردىڭ ەڭبەگىنىڭ ايقىن ناتيجەسى, – دەيدى ءانسامبلدىڭ كوركەمدىك جەتەكشىسى مەدەت اعابىلوۆ.
بايقاۋ قورىتىندىسى بويىنشا داريا مۇحيتوۆانىڭ ونەرى قازىلار القاسى تاراپىنان جوعارى باعالانىپ, ءبىرىنشى ورىنعا لايىق دەپ تانىلدى. ول "Fiestalonia Milenio" ەۋروپالىق ۇيىمىنىڭ ارنايى ديپلومىمەن ماراپاتتالدى.
ايتا كەتەيىك, "Online Wave" حالىقارالىق شىعارماشىلىق بايقاۋى 16 جىلدان بەرى ۇيىمداستىرىلىپ كەلەدى. بيىلعى سايىسقا الەمنىڭ 37 ەلىنەن 500-دەن استام ونەرپاز قاتىستى.
