قازىر ەڭ كۇردەلى جوبالاردى قارجىلاندىرۋعا دايىن
كەشە «قازاقستاننىڭ دامۋ بانكى» اق-تا ءباسپاسوز كونفەرەنتسياسى بولىپ ءوتتى. بانكتە 2010-2013 جىلدار ارالىعىندا اتقارىلعان جۇمىستار قورىتىندىلاندى. سونداي-اق, بانكتىڭ باسقارما توراعاسى نۇرلان قۇسايىنوۆ وسى ايدىڭ 25 جۇلدىزىنان باستاپ باسقا قىزمەتكە اۋىساتىن بولعاندىقتان ۋاكىلەتتىگىن مەرزىمىنەن بۇرىن توقتاتاتىندىعىن جاريالادى.
قازىر ەڭ كۇردەلى جوبالاردى قارجىلاندىرۋعا دايىن
كەشە «قازاقستاننىڭ دامۋ بانكى» اق-تا ءباسپاسوز كونفەرەنتسياسى بولىپ ءوتتى. بانكتە 2010-2013 جىلدار ارالىعىندا اتقارىلعان جۇمىستار قورىتىندىلاندى. سونداي-اق, بانكتىڭ باسقارما توراعاسى نۇرلان قۇسايىنوۆ وسى ايدىڭ 25 جۇلدىزىنان باستاپ باسقا قىزمەتكە اۋىساتىن بولعاندىقتان ۋاكىلەتتىگىن مەرزىمىنەن بۇرىن توقتاتاتىندىعىن جاريالادى.
كونفەرەنتسياعا پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆ, «بايتەرەك» ۇلتتىق باسقارۋ حولدينگىنىڭ باسقارما توراعاسى – قدب ديرەكتورلار كەڭەسىنىڭ مۇشەسى قۋاندىق بيشيمباەۆ, بانكتىڭ تاۋەلسىز ديرەكتورى ۋولف ۆوكۋركا, قدب باسقارما توراعاسى نۇرلان قۇسايىنوۆ قاتىستى. شارانى بانكتىڭ تاۋەلسىز ديرەكتورى جۇرگىزدى. ول قازاقستان دامۋ بانكىنىڭ ماقسات-مىندەتى مەن قىزمەتى تۋرالى ايتا كەلىپ, ءبىرىنشى ءسوز كەزەگىن بانكتىڭ ديرەكتورلار كەڭەسىنىڭ توراعاسى اسەت يسەكەشەۆكە بەردى.
«ەلىمىزدە جۇرگىزىلىپ جاتقان يندۋستريالاندىرۋ شاراسى – مەملەكەتتىك ساياساتىمىزداعى باسىم باعىتتاردىڭ ىرگەلى ءارى ىلگەرىسى ەكەنى ءمالىم. ال وسى مەملەكەتتىك ۇدەمەلى يندۋستريالىق-يننوۆاتسيالىق دامۋ باعدارلاماسىن جۇيەلى قارجىلاندىراتىن جانە ونىڭ باستى وپەراتورلارىنىڭ ءبىرى قازاقستاننىڭ دامۋ بانكى. سوندىقتان اتالعان بانكتىڭ جۇمىسىن ۇنەمى جۇيەلەپ وتىرۋ وتە ماڭىزدى. ءبىرىنشى ايتارىمىز, 2010-2013 جىلدار ارالىعىندا بانك ەل ەكونوميكاسىنا 3 ملرد. دوللاردان استام قارجى سالدى. وسى كەزەڭدەردە, ەلىمىزدە جالپى قۇنى 7 ملرد. دوللار بولاتىن 36 ءىرى جوبا ماقۇلدانعان. دامۋ بانكى وسى جوبالاردى جۇزەگە اسىرۋعا بەلسەنە قاتىسىپ, ولارعا 4,3 ملرد. دوللار قۇيىپتى. بىلە-بىلگەنگە بۇل اسا اۋقىمدى جۇمىس», دەدى پرەمەر-ءمينيستردىڭ ورىنباسارى.
قازىرگى ۋاقىتتا قازاقستان دامۋ بانكىنىڭ باستى وپەراتورلىعىمەن دۇنيەگە كەلگەن كەشەندى جوبالاردا 10 مىڭنان استام ادام ەڭبەك ەتىپ جاتىر. وسىدان ءۇش جىل بۇرىن اياعىن ەندى عانا ءتاي-ءتاي باسقان بانكتىڭ از ۋاقىتتىڭ ىشىندە وسىنداي بيىك كورسەتكىشكە قول جەتكىزۋى, ونىڭ باسشىلارى مەن قىزمەتكەرلەرىنىڭ قارجىنى بىلىكتى باسقارا ءبىلۋىنىڭ ناتيجەسى. «قدب مەملەكەت باسشىسى جۇكتەگەن مىندەتتەردى ابىرويمەن اتقارىپ شىعىپ, بانكتىڭ تيىمدىلىگى مەن كورپوراتيۆتى باسقارۋ قىزمەتىن جاقسى جەتىلدىرە بىلگەنىن دە ايتقىم كەلەدى. بۇگىندە دامۋ بانكى حالىقارالىق ستاندارتتاردىڭ بارىنە ساي قىزمەت ەتىپ جاتىر دەۋگە تولىق نەگىز بار», – دەپ قورىتىندىلادى ءسوزىن ءا.يسەكەشەۆ.
«بايتەرەك» حولدينگىنىڭ باسشىسى ق.بيشيمباەۆ قدب جۇمىسىنداعى كاسىبيلىكتى جوعارى باعالادى. ءسويتىپ, بانكتىڭ باسقارما توراعاسى ن.قۇسايىنوۆقا العىسىن ءبىلدىردى. حولدينگ باسشىسىنىڭ سوزىنە قاراعاندا, وركەندەۋ جولىنداعى بانك بۇگىندە كوممەرتسيالىق ينستيتۋتتارعا تارتىمدى ەمەس, بىراق ەلگە اسا قاجەت كەز كەلگەن ءىرى جانە قيىن جوبانى قارجىلاندىرۋعا دايىن كورىنەدى.
«ءۇش جىل بۇرىن بانك پەن ونىڭ باسشىسى بولىپ تابىلاتىن مەنىڭ الدىمدا بىرقاتار ماقساتتار تۇردى. شۇكىر, سول بيىك ماقساتتاردى يگەرىپ كەلەمىز. ناتيجەسىندە كوپتەگەن اۋىر جانە ماڭىزدى وزگەرىستەردەن وتتىك. بانكتىڭ ستراتەگياسى تۇزەلدى, مىندەتتەمەلەردى باسقارۋ جاقساردى. قيۋى قيىن جوبالاردى ەلىمىزدىڭ ينۆەستيتسيالىق قورىنا تاپسىرۋ مەن بالانستى تازالاۋ بويىنشا بىرەگەي مامىلە جۇرگىزىلىپ, بيزنەس ۇدەرىستەردى وڭتايلاندىرۋ شارالارى ءتيىمدى قابىلداندى», – دەدى ن.قۇسايىنوۆ.
دامۋ بانكىنىڭ بۇگىنى مەن كەلەشەگى تۋرالى اڭگىمەلەگەن ۋولف ۆوكۋركا, كورپوراتيۆتى باسقارۋدىڭ جوعارعى دەڭگەيىن مەڭگەرگەن بانكتىڭ ءدال قازىر ءتورت اياعىنان نىق تۇرعانىن جەتكىزدى. كونفەرەنتسيانىڭ ەكىنشى بولىمىندە ديرەكتورلار كەڭەسىنىڭ مۇشەلەرى تىلشىلەردىڭ سۇراقتارىنا جاۋاپ بەردى.
نۇرباي ەلمۇراتوۆ,
«ەگەمەن قازاقستان».
