وسى ورايدا, كونەنىڭ ءسوزىن ۇستاعان, وتكەننىڭ ونەگەسىن بىلەتىن ءتۇبى تارازدىق نۇعىمان سۇلەتەي دەيتىن جىگىتتىڭ قازاقتىڭ قانىنا سىڭگەن مارتتىگى جايلى اڭگىمەسىن ەستىگەن ەدىك. ونىڭ ايتۋىنشا, اباي اتامىز كەمەلىنە كەلىپ, اقىلى مەن ابىرويى بار قازاققا ءماشھۇر كەزىندە جەتىسۋدىڭ جالايىر ەلىندە جۇرت «جامەڭكە اعا» دەپ اتاپ كەتكەن ابىرويلى قاريا بولىپتى.
وسى كىسى قارتايعان شاعىندا: «ارمانىم, سەمەي ەلىندەگى اباي اقىندى كورگىم كەلەدى. ول كىسى «ۇيات كىمدە بولسا – يمان سوندا» دەپتى. ۇيات دەگەنىمىز ادامگەرشىلىك بولسا, ادامگەرشىلىكتىڭ بار سيپاتىن اباي دەپ بىلەمىن», دەپ, ۇلدارىن ەرتىپ شىڭعىستاۋعا جول تارتىپتى.
الىستان ارنايى كەلگەن قۇرمەتتى مەيمانىنا اباي جەكە ءۇي تىگىپ, ەرەكشە قۇرمەت كورسەتىپتى. ەلىندە ءبىر اي جاتىپ قوناق بولعان جامەڭكە قارياعا اباي:
– اعا, بۇيىمتاي ايتىپ, قالاعانىڭىزدى الىڭىز, – دەگەندە, جامەڭكە:
– قامىسقۇلاق اتىڭدى بەر, – دەگەن ەكەن. ونداي جىلقىسى جوق اباي:
– قاي قامىسقۇلاق اتتى ايتاسىز؟ – دەگەندە جامەڭكە «شوقپارداي كەكىلى بار قامىس قۇلاق...» دەپ باستالاتىن ءوزىنىڭ «اتتىڭ سىنى» اتتى ولەڭىن تۇگەلدەي جاتقا ايتىپ شىعىپتى.
قۇنانباي اۋلەتىنىڭ جىلقىلارىندا ءدال وسى ولەڭدە ايتىلاتىن سايگ ۇلىك تابىلماعاندىقتان, قوناعىن تاعى ءبىر جۇما ايالداتىپ, بەس بولىس توبىقتى ەلىنە ساۋىن ايتىپ, ولەڭدەگى سىنعا ساياتىن ات ىزدەتىپتى. ودان دا شىقپاعان سوڭ, وزىمەن اراز 9 مىڭ جىلقىسى بار ورازبايعا:
– ەل نامىسى – ەر نامىسى بولعاندا, ەر نامىسى – ەل نامىسى بولماي ما ەكەن؟ ءوزىم ءمىنۋ ءۇشىن ەمەس, توبىقتىنىڭ قوناعىنا سىيلاۋ ءۇشىن سۇراتىپ وتىرمىن. ورازەكەڭ ءبىر تايىن اياماسىن, – دەگەن سالەممەن كىسى جىبەرىپتى.
سالەمدى ەستىگەن ورازباي:
– اعايىن اششى, مال تۇششى دەسەم, مەن ورازباي بولامىن با؟! جاتتان ساعى سىنباسىن, – دەپ, وڭكەي سايگ ۇلىك بولەك باعىلاتىن 5 قوس جىلقى ۇيىرلەرىن ارالاپ ءجۇرىپ ءۇش ات ۇستاتىپتى.
– ابايعا ايت, قوناعى ۇشەۋ ەكەن, وسى ءۇش اتتى ءبىر-بىردەن بەرسىن. وزىنە قارسى بولسام دا, اقىلى مەن اجارىنا قارسى ەمەسپىن, – دەپتى.
