سىبايلاس جەمقورلىققا قارسى ءىس-قيمىل اگەنتتىگى پاراساتتىلىق دەپارتامەنتىنىڭ باسشىسى عانيجان اسان ۇلى اشىقتىقتى قامتاماسىز ەتەتىن سەرۆيستىك اكىمدىكتىڭ وڭىردەگى بارلىق قالا, اۋدانداردا اشىلۋى ءتيىس ەكەنىن جەتكىزدى. وبلىس اكتيۆىمەن وتكەن كەزدەسۋدە.
سىبايلاس جەمقورلىق مادەنيەتىن قالىپتاستىرۋ ماقساتىندا تۇركىستان وڭىرىنە ارنايى جۇمىس ساپارىمەن كەلگەن سىبايلاس جەمقورلىققا قارسى ءىس-قيمىل اگەنتتىگىنىڭ جانىنان قۇرىلعان اقپاراتتىق-ۇگىت ناسيحات شتابىنىڭ ءتورايىمى ىرزا تۇرسىنزادا مەن دەپارتامەنت باسشىسى عانيجان اسان ۇلى الدىمەن وبلىس اكتيۆىمەن كەزدەسۋ وتكىزدى. قوعامدىق باقىلاۋ جانە ازاماتتاردىڭ قارجىلىق ساۋاتتىلىعىن ارتتىرۋ ماقساتىندا قۇرىلعان "اشىق بيۋدجەتتەردىڭ ينتەراكتيۆتى كارتاسىندا" تۇركىستان وبلىسى بويىنشا مەكەمەلەردىڭ جالپى سومماسى 373, 6 ملرد تەڭگە بيۋدجەتى جاريالانعان. بۇل ورايدا دەپارتامەنت باسشىسى جىل سوڭىنا دەيىن تولىق جاريالانۋى بويىنشا ۇسىنىس-پىكىرىن ءبىلدىردى.
كيەلى وڭىرگە ارنايى كەلگەن قوناقتارعا ءوز العىسىن بىلدىرگەن وبلىس اكىمى ومىرزاق شوكەەۆ رۋحاني استانا مارتەبەسىن ارقالاعان تۇركىستاننىڭ سىبايلاس جەمقورلىقتان ادا, تازا ءوڭىر رەتىندە تانىلۋى ءتيىس ەكەندىگىن جەتكىزدى. ال رەسپۋبليكالىق شتاب ءتورايىمى ىرزا تۇرسىنزادا: "ۇلت بولىپ ۇيىسۋدىڭ باستى تەتىگى - رۋحاني تاربيە, ياعني ادامزاتتىڭ بويىندا ادامگەرشىلىك, ادالدىق, ادىلدىك جانە پاراساتتىلىق سىندى قۇنى بيىك قاسيەتتەر بولسا, سوندا عانا سىبايلاس جەمقورلىق سياقتى تەرىس قۇبىلىستىڭ قوعام ومىرىندە جولى كەسىلەدى", دەپ اتاپ ءوتتى.
اگەنتتىكتىڭ تۇركىستان وبلىسى بويىنشا دەپارتامەنتىنىڭ باسشىسى حاكيم كوشقاليەۆ, وبلىستىق اكىمدىكتىڭ ءبولىم باسشىلارى مەن قىزمەتكەرلەرى, وبلىستىق ءماسليحات دەپۋتاتتارى, اۋماقتىق دەپارتامەنت باسشىلارى, وبلىستىق اقپاراتتىق-ۇگىت ناسيحات شتابىنىڭ توراعاسى, ارنايى مونيتورينگتىك توپ مۇشەلەرى, ۇكىمەتتىك ەمەس ۇيىم جانە باق وكىلدەرى قاتىسقان جيىندا, سونداي-اق حالىقپەن سىندارلى سۇحبات قۇرۋ جانە پاراساتتىلىق قۇندىلىقتارىنا كوبىرەك كوڭىل ءبولۋ, جەمقورلىق كورىنىستەرىن قابىلداماۋ ارقىلى ادال ەڭبەك ەتۋ – ءاربىر ەل ازاماتىنا جۇكتەلگەن ورتاق مىندەت ەكەندىگى ايتىلدى.
تۇركىستان وبلىسى
