كارانتين كەزىندە تابىسىنان ايىرىلعان نەمەسە شىعىنعا ۇشىراعان 6000-عا جۋىق كاسىپكەر نەسيەسىن قايتا قارجىلاندىرا الادى.
بۇعان دەيىن قازاقستان ۇكىمەتى بەكىتكەن "جەكە كاسىپكەرلىكتى مەملەكەتتىك قولداۋدىڭ كەيبىر شارالارى تۋرالى" قاۋلىعا ەنگەن وزگەرىستەرگە سايكەس, "دامۋ" كاسىپكەرلىكتى دامىتۋ قورى" اق نەسيەنى قايتا سۋبسيديالاۋ بويىنشا جۇمىس باستادى.
پرەزيدەنت قاسىم-جومارت توقاەۆتىڭ بيىلعى 1 قىركۇيەكتەگى جولداۋى بارىسىندا ايتىلعان تاپسىرماسى بويىنشا, شاعىن جانە ورتا بيزنەسكە مەملەكەت تاراپىنان قوسىمشا قولداۋ كورسەتىلىپ, نەسيەلەر جەڭىلدەتىلگەن شارتتارمەن قايتا قارجىلاندىرىلا (سۋبسيديالاۋ) باستادى. "بجك-2025" بيزنەستى قولداۋ باعدارلاماسىنا بەكىتىلگەن وزگەرىستەرگە سايكەس, COVID-19 پاندەمياسى مەن كارانتين شەكتەۋلەرى كەزىندە زارداپ شەككەن كاسىپكەرلەر 2020 جىلعى 31 تامىزعا دەيىن بانكتەن العان نەسيەلەرى مەن ليزينگ مامىلەلەرى بويىنشا سىياقى مولشەرلەمەسىنىڭ ءبىر بولىگىن "دامۋ" كاسىپكەرلىكتى دامىتۋ قورى" اق ارقىلى سۋبسيديالاي الادى.
قاۋلىدا ەكىنشى دەڭگەيلى بانكتەرگە ءوتىنىش بەرۋ مەرزىمى بيىلعى 30 قازانعا دەيىن دەپ كورسەتىلگەن. ول بويىنشا "دامۋ" قورى بانكتەر بەرگەن تىزىلىمدەر مەن ساۋالناما-وتىنىشتەر نەگىزىندە 5 جۇمىس كۇنىنەن اسپايتىن مەرزىم ىشىندە سۋبسيديالاۋ مۇمكىندىگى تۋرالى شەشىم قابىلدايدى.
قازىر بانكتەر كاسىپكەرلەردەن قارىزدارىن سۋبسيديالاۋ ءۇشىن كەلىپ تۇسكەن 5921 ساۋالناما-ءوتىنىشتى "دامۋ" قورىنا بەردى. 3574-نان استام ءوتىنىش قارالىپ, "مەملەكەتتىك قولداۋ شارالارىن الۋ ءۇشىن قويىلاتىن شارت تالاپتارىنا سايكەس كەلەدى" دەگەن وڭ شەشىم قابىلداندى.
وسى قولداۋدى پايدالانا الاتىن كومپانيالار مەن كاسىپورىندار قاتارىندا بولشەك ساۋدا, قوناق ءۇي بيزنەسى, تۋريستىك اگەنتتىكتەر, كينوتەاترلار, فيتنەس-ورتالىقتار, كولىككە تەحنيكالىق قىزمەت كورسەتۋ جانە جوندەۋ, مەكتەپكە دەيىنگى جانە باستاۋىش ءبىلىم بەرۋ جانە ت.ب. سالالاردا جۇمىس ىستەيتىن شوب سۋبەكتىلەرى بار. جالپى تىزبەگە 29 قىزمەت ءتۇرى ەنگىزىلگەن.
وسى مەملەكەتتىك قولداۋ شاراسى 2020 جىلعى 16 ناۋرىزدان باستاپ 2021 جىلعى 15 ناۋرىزعا دەيىنگى سۋبسيديالاۋ كەزەڭىنە ارنالعان. قولداۋ شارتتارى بويىنشا, كاسىپكەر نومينال سىياقى مولشەرلەمەسىنىڭ 6%-ىن عانا تولەيدى. ال كرەديت/ليزينگ مامىلە بويىنشا نومينال سىياقى مولشەرلەمەسى مەن كاسىپكەر تولەيتىن مولشەرلەمە اراسىنداعى ايىرمانى مەملەكەت قارجى اگەنتى – "دامۋ" قورى ارقىلى وتەيدى.
بانكتەر قارىز الۋشىلاردى ءوتىنىمنىڭ ماقۇلدانعانى تۋرالى حاباردار ەتەدى. رەسىمدەۋ شارۋالارىن اياقتاۋ ءۇشىن كاسىپكەر بانككە بۇرىن بەرىلگەن ءوتىنىش نەگىزىندە بانكتىك قارىز شارتىن نەمەسە قولدانىستاعى شارتتارعا قوسىمشا كەلىسىم جاساسۋ ءۇشىن نەسيە بەرگەن بانككە جۇگىنۋى قاجەت. بۇل رەتتە, سۋبسيديالاناتىن قارىزدار بويىنشا 6%-دان اساتىن پايىزدىق سىياقىنى وتەۋ ءۇشىن ارتىق تولەنگەن سوما كاسىپكەرگە بانككە اقشا اۋدارۋ ارقىلى وتەلەدى. ونى بورىشكەر كەيىننەن وسى نەسيەنىڭ پايىزىن وتەۋ ءۇشىن پايدالانا الادى. سوما قالعان جاعدايدا ول بورىشكەرگە قارىز مەرزىمىنىڭ سوڭىندا تولەنەدى. "دامۋ" قورى ماقۇلداعان جانە بانكتەرمەن قوسىمشا كەلىسىمگە قول قويىلعان كۇننەن باستاپ سۋبسيديالاناتىن قارىزدار بويىنشا كەزەكتى تولەمدەردى كاسىپكەر تومەندەتىلگەن مولشەرلەمە بويىنشا ەنگىزەدى.
