ۇلان اۋدانى, بوزانباي اۋىلىنىڭ تۇرعىنى ەرجان ءسابيتوۆ 2015 جىلى وتباسىلىق شارۋاشىلىق قۇرىپ, اقجارتاس اۋىلىندا مال وسىرە باستايدى. وكىنىشكە وراي, ۇرىلار مازاسىن ابدەن قاشىرعان. بيىلدىڭ وزىندە 148 قوي, 11 باس سيىرى جوعالعان. ال بىلتىر ۇرىلار 26 باس جىلقىسىن قولدى قىلعان. ەندى مىنە, 1 قاراشادا 400 وراما ءشوبىن ورتەپ جىبەرگەن.
"قۇرمەتتى ىشكى ىستەر ءمينيسترى ەرلان تۇرعىنباەۆ مىرزا! مەن ءسابيتوۆ ەرجان سەيتاشىم ۇلى شىعىس قازاقستان وبلىسى, ۇلان اۋدانى, بوزانباي اۋىلىنىڭ تۇرعىنىمىن. 2015 جىلى وتباسىلىق شارۋاشىلىق قۇرعام. ول شارۋاشىلىق اقجارتاس اۋىلىندا. الايدا سوڭعى جىلدارى مال ۇرلىعى ءورشىپ تۇر. تەك بيىل مەنەن 148 باس قوي, 11 باس سيىر, بىلتىر 26 باس جىلقىم جوعالدى. قاراشا ايىنىڭ ءبىرى كۇنى تاڭعى ساعات ۇشكە تاياۋ 400 رۋلون ءشوبىم مەن مال قورانى ورتەپ جىبەردى. وبلىستىق, اۋداندىق پوليتسيادان ەش قايىر جوق. ارىزدان ناتيجە جوق. ءالى ءبىر دە قىلمىس اشىلمادى. قۇرمەتتى مينيستر مىرزا, ءۇمىتىم سىزدە. كومەك ەتىڭىز", دەيدى قوجالىق جەتەكشىسى ەرجان ءسابيتوۆ.
وبلىستىق پوليتسيا دەپارتامەنتى بەرگەن اقپاراتتارعا سۇيەنسەك, جىل باسىنان بەرى مال ۇرلىعىنىڭ 232 فاكتىسى تىركەلگەن. ال 2019 جىلى 293 مال ۇرلىعى بولعان. جالپى العاندا شىعىس قازاقستان ايماعىندا 442 باس مال جوعالسا, ونىڭ 278-ءى تابىلىپ, يەسىنە قايتارىلعان ەكەن.
شىعىس قازاقستان وبلىسى
