فرانتسيادا ەكىنشى جالپىۇلتتىق كارانتين جاريالاندى. 30 قازاندا ۇكىمەت ازاماتتارعا اسا ۇلكەن قاجەتتىلىكسىز ۇيدەن شىعۋعا تىيىم سالدى. بۇل جولى دا ناۋرىزداعى كارانتيندەگىدەي جازباشا رۇقساتى بولمايىنشا, دالادا جۇرۋگە شەكتەۋ قويىلدى. دۇكەندەر, مەيرامحانالار مەن مەكتەپتەر جۇمىسىن توقتاتتى. بۇل شەكتەۋلەر ازىرگە 1 جەلتوقسانعا دەيىن بەكىتىلگەن. الايدا بەسىنشى رەسپۋبليكا ۇكىمەتى جاعداي تۇزەلمەسە, شەكتەۋلەردى ۇزارتۋدى جوسپارلاپ وتىر.
ال گەرمانيا 2 قاراشادان باستاپ جاڭا ەرەجەلەر ەنگىزدى. ەلدە كينوتەاترلار, تەاترلار, سپورت زالدارى مەن مەيرامحانالار جابىلدى. ۇلكەن جيىندارعا تىيىم سالىندى. ياعني 10-نان ارتىق ادام جينالعان جيىن ۇيىمداستىرۋشىلارىنا ايىپپۇل سالىناتىنى ەسكەرتىلدى. دەگەنمەن مەكتەپتەر جۇمىسىن جالعاستىرۋدا. بالاباقشالار دا بالدىرعاندارعا اشىق.
جاڭا ەرەجەلەر دۇكەندەر مەن شاشتارازدارعا قاتىستى بولماي شىقتى. ولار ادام سانىن شامادان اسىرماي جۇمىس ىستەي الادى. ۇكىمەت قاۋلىسىنا سايكەس گەرمانيا حالقى جاڭا ەرەجەلەردى 30 قاراشاعا دەيىن ساقتاۋى ءتيىس.
يتاليا كارانتين رەجىمى وزگەرەتىنىن كەشە حابارلادى. جۇمىسىن توقتاتپاعان مۋزەيلەر بۇگىننەن باستاپ ونەرسۇيەر قاۋىمدى قۋانتا المايتىن بولدى. جاڭا ەرەجەگە ساي مەملەكەت قىزىل, قىزعىلت جانە جاسىل ايماقتارعا بولىنەدى. ءار تۇسكە ساي شەكتەۋلەر دە الۋان. ماسەلەن, قىزىل ايماق – ۆيرۋس جۇقتىرۋ قاۋپى جوعارى ەلدى مەكەندەر. وندا بارلىق قوعامدىق ورىن جابىلعان. قىزعىلت زوناداعى شاشتارازدار مەن كەيبىر دۇكەندەر اشىق. ال جاسىل زوناداعى قوعامدىق ورىندار 18:00-گە دەيىن جۇمىس ىستەي الادى. دەگەنمەن توي, جەرلەۋ ءراسىمىن وتكىزۋگە تىيىم بار. مەكتەپتەر اشىق, دەگەنمەن جوعارى سىنىپ وقۋشىلارى ادام سانىن كوبەيتپەس ءۇشىن قاشىقتان وقۋعا كوشكەن. بارلىق جەردە مەديتسينالىق ماسكا تاعىپ ءجۇرۋ مىندەتتەلگەن.
يسپانيا دا كورشىلەس ەلدەرمەن ىلەسىپ جاڭا ەرەجەلەردى تانىستىردى. مەملەكەتتە كومەندانتتىق ساعات جاريالاندى. 25 قازاننان باستاپ يسپانيا حالقى 23:00 مەن 06:00 اراسىندا كوشەگە شىقپايدى. جۇمىسقا بارىپ-كەلۋ, ءدارىحانا مەن دۇكەنگە شىعۋدان باسقاعا رۇقسات جوق. ۇكىمەت مالىمدەمەسىنە سەنسەك, جاڭا ەرەجە كەلەر جىلدىڭ مامىرىنا دەيىن كۇشىن جوعالتپايدى. التاۋدان ارتىق ادام قاتىساتىن جيىنعا ايىپپۇل سالىنادى. ايتسە دە جوعارىدا ايتىلعان ەرەجەلەر كانار ارالدارىندا مىندەتتى ەمەس.
بەلگيا ۇكىمەتى ازاماتتارىنا قاتاڭ شەكتەۋ قويعان جوق. مۇنداعى قوعامدىق ورىندار جەلتوقساننىڭ ورتاسىنا دەيىن كەشكى ونعا دەيىن جۇمىس ىستەي الادى. كۇزگى كانيكۋل قاراشانىڭ ورتاسىنا دەيىن ۇزارتىلدى. ۇيدەن جۇمىس ىستەۋگە كەڭەس بەرىلگەنىمەن, جۇمىسقا بارۋعا تىيىم سالىنباعان. ۆولونيا مەن ەل استاناسى بريۋسسەلدە 22:00 مەن 06:00 اراسىندا كوشەدە سەبەپسىز جۇرۋگە بولمايدى.
روجدەستۆولىق فەستيۆالدار مەن جارمەڭكەلەر وتكىزىلمەيتىن بولدى. سول سەبەپتى ەۋروپا اسىعا كۇتەتىن روجدەستۆو بيىل بۇرىنعىدان وزگەشە بولعالى تۇر. سپورتتىق جارىستار مەن جانكۇيەرلەر دە قاپالى. ويتكەنى ونداي جيىندارعا ۇكىمەت ءالى دە رۇقسات بەرمەي وتىر.
پورتۋگاليا 121 مۋنيتسيپاليتەتىنىڭ قاۋىپتى ايماققا اينالعانىن مالىمدەدى. ولاردا حالىقتىڭ 70 پايىزى شوعىرلانعان. سوندىقتان حالىققا سەبەپسىز ۇيدەن شىعۋعا بولمايدى. مەرەكەلىك شارالارعا دا تىيىم سالىندى, ءدىني مەرەكەلەر دە تويلانبايدى. قوعامدىق ورىندار جۇمىسىن توقتاتقانىن ايتپاعاندا, جانارماي قۇيۋ ستانسالارى دا كەشكى سەگىزگە دەيىن جۇمىس ىستەي الادى.
نيدەرلاند ۇكىمەتى ۇيگە كەلەتىن قوناق سانىنا دا شەكتەۋ قويدى. بۇدان بىلاي ۇيگە ءۇش ادامنان ارتىق كەلۋگە تىيىم سالىنعان. سىرتتا ءتورت ادامنان ارتىق جينالۋعا بولمايدى. مەكتەپتەر, حاۋىزدار جۇمىسىن جالعاستىرىپ جاتىر. 18-گە تولماعان بالالار سپورتتىق جارىستارعا قاتىسا الادى, سپورتپەن اينالىسۋعا شەكتەۋ جوق.
چەحيا ەۋرووداقتاعى كارانتين جاريالاعان العاشقى ەل بولىپ وتىر. بۇعان دەيىن شەكتەۋلەردىڭ 3 قاراشاعا دەيىن بولاتىنىن ايتسا, جاقىندا ونىڭ 20 قاراشاعا دەيىن ۇزارتىلعانى ءمالىم بولدى.
دانيادا جاعداي تۇراقتى بولعانىمەن, قوعامدىق ورىندا جينالۋعا رۇقسات ەتىلگەن ادام سانى 50-دەن 10-عا قىسقارتىلدى. ەلدە ساعات 22:00-دەن كەيىن الكوگول ونىمدەرى ساتىلمايدى. مەديتسينالىق ماسكا تاعۋ بارىنە مىندەتتەلدى. جاڭا ەرەجەلەردى قاڭتارعا دەيىن ساقتاۋ تالاپ ەتىلگەن.
شۆەتسيانىڭ ۆيرۋستىڭ تارالۋىنا قارسى شارالار قولدانباعانى وداقتاس مەملەكەتتەردىڭ ۇرەيىن تۋعىزعانى ءمالىم. كورشىلەس ەلدەر سىناعانىمەن قويماي, شۆەتسيا ازاماتتارىن ەلدەرىنە كىرگىزۋدەن باس تارتتى.
ۇكىمەت الەۋمەتتىك قاشىقتىق سىندى قورعانىس شارالارىن جاريالاماعانمەن, ازاماتتار ءوز قالاۋىمەن 2 مەتر ارا قاشىقتىق ساقتاپ, كەيبىر قۇرىلىمدار قاشىقتان جۇمىس ىستەۋگە كوشتى. سوڭعى ستاتيستيكا ەلدەگى ناۋقاستار سانىنىڭ ارتقانىن كورسەتىپ وتىر, الايدا جاعداي باسقا ەلدەردەگىدەي اۋىر ەمەس. ۇكىمەت ءالى دە ماسكا تاعۋدى مىندەتتەمەسە دە, مەيرامحانالاردا ءبىر ۇستەلدە 8 ادامنان ارتىق جينالۋعا تىيىم سالدى. ەلدەگى 21 ايماقتىڭ ۇشەۋىندە, اتاپ ايتار بولساق, ەل استاناسى ستوكگولم مەن گەتەبورگ جانە مالمە تۇرعىندارىنا قوعامدىق كولىكتەردەن باس تارتۋ, ۇلكەن ساۋدا ورتالىقتارىنا, مۋزەيلەر مەن كونتسەرتتەرگە بارماۋ سياقتى كەڭەستەر بەرىلگەن.
