"انالار ءبىزدىڭ ترەنينگتىك ورتالىققا وقۋعا كەلىپ, ساباق ۋاقىتىندا بالالارىن تاربيەشىلەرگە قالدىرادى. ءتۇرلى دياگنوزى بار بالالار كەلەدى: اۋتيزم, تسەرەبرالدى سال اۋرۋى, داۋن سيندرومى جانە ت.ب. بۇل رەتتە ينكليۋزيا ورىن الادى. سەبەبى ولار دەنى ساۋ بالالارمەن بىرگە جۇمىس ىستەيدى", دەپ اتاپ ءوتتى "ماما پرو" قق قۇرىلتايشىسى ءاسيا تيكەەۆا.
ايەلدەر قورىندا شەشەندىك ونەردەن باستاپ, بۋحگالتەرلىك ەسەپكە دەيىن كاسىبي قىزمەت تۇرلەرى وقىتىلادى.
ء"بىز كاسىبي كوۋچ, ترەنەرلەرمەن جۇمىس جاسايمىز. وقۋ بارىسىندا ءبىز ماقسات قويۋدى, شەشەندىك ونەردى, نيشانى جانە اۋديتوريانى تاڭداۋدى, سمم, كوپيرايتينگ, تايم-مەنەدجمەنت, ساتۋ, ەسەپتەۋ, بۋحگالتەرلىك ەسەپ, ەموتسيالىق زياتكەرلىك, كومپيۋتەرلىك ساۋاتتىلىق پەن ديزايندى ۇيرەتەمىز", دەدى ءاسيا تيكەەۆا.
سونىمەن قاتار, پسيحولوگتار ايەلدەرمەن جۇمىس ىستەيدى. ءۇش جىل ىشىندە ۇيىمدا 300 ادام وقىدى.
"پۋت ماستەرستۆا" قق جۇگىنۋ ارقىلى پسيحوتەراپيادان ءوتىپ, تابىس تاباتىن جاڭا كاسىپتى يگەرۋگە مۇمكىندىك بار.
ء"بىز توقىما ونەرىن تەگىن ۇيرەتەمىز, ونىڭ كومەگىمەن ءبىزدىڭ تۇلەكتەر تابىس اكەلەتىن كاسىپكە ماشىقتانادى. ءبىز حالىقتىڭ الەۋمەتتىك وسال توپتارىنان شىققان مۇمكىندىگى شەكتەۋلى ادامدارمەن, ەرەكشە قاجەتتىلىكتەرى بار بالالار انالارىمەن تەگىن جۇمىس ىستەيمىز", دەدى قوعامدىق قوردىڭ باسشىسى راحيما مۇقىشەۆا.
ولار ءۇشىن توقۋ تەك تابىس كوزى عانا ەمەس, سونىمەن قاتار سترەستى جەڭۋ ءتاسىلىنىڭ ءبىرى. اسىرەسە, بۇل ساباق كوبىنە پاندەميا كەزىندە ويدى بولۋگە جاقسى كومەكتەستى دەيدى ۇيىم وكىلدەرى. ۇەۇ 2019 جىلدىڭ جەلتوقسان ايىندا اشىلدى جانە وسى ۋاقىت ىشىندە 100 ادامدى توقىما ونەرىنە ۇيرەتتى.
بۇعان دەيىن حابارلانعانداي, ەلوردادا تەگىن قۇقىقتىق, پسيحولوگيالىق جانە مەديتاتيۆتىك كومەك الۋعا مۇمكىندىك بەرەتىن 20-عا جۋىق ۇەۇ جۇمىس ىستەيدى. جالپى العاندا نۇر-سۇلتاندا 2996 ۇكىمەتتىك ەمەس ۇيىم تىركەلگەن. يدەيانى جوباعا اينالدىرۋ, ونى ىسكە اسىرۋ ءۇشىن بەلسەندىلەرگە ازاماتتىق باستامالار ورتالىعىندا اقپاراتتىق قىزمەتتەر, سونداي-اق قۇقىقتىق جانە قارجىلىق ماسەلەلەر بويىنشا كەڭەستەر بەرىلەدى.
