بۇگىنگى كۇندە وبلىستىق توتەنشە جاعدايلار دەپارتامەنتى (تجد) تۇرعىنداردى قورعاۋ ماقساتىندا ارنايى جوسپار ازىرلەپ, تاياۋدا ونى جاريا ەتتى. قۇجاتقا سايكەس, وبلىستاعى 714 شاقىرىم قاشىقتىقتى قۇرايتىن جولداعى قار ءجيى الىپ قالاتىن 525 ۋچاسكە كۇشەيتىلگەن باقىلاۋعا الىناتىن بولادى. سونداي-اق قار قۇرساۋىندا قالعان ادامدار ءۇشىن جىلىناتىن 28 بەكەتتىڭ جۇمىسى ۇيىمداستىرىلادى. «جالپى, قىس كەزەڭىندە وسى جانە باسقا دا قۇتقارۋ جۇمىستارىن ۇيىمداستىرۋعا 3070 ادام مەن 1200 تەحنيكا بىرلىگى جۇمىلدىرىلاتىن بولادى», دەپ مالىمدەدى وبلىستىق تجد باسشىسىنىڭ مىندەتىن اتقارۋشى مۇرات قاتپانوۆ.
قازىرگى ۋاقىتتا وبلىستىق تجد قىس كەزىندە قۇتقارۋ جۇمىستارىن ىركىلىسسىز جۇزەگە اسىرۋعا جارامدى تەحنيكامەن ءبىرشاما ءتاۋىر قامتاماسىز ەتىلگەن. مىسالى, قۇتقارۋشىلاردىڭ گاراجىندا ومبى قاردى, قاتتى بوراندى ەلەڭ قىلمايتىن 87 بىرلىك ءجۇرىسى ءونىمدى جانە ينجەنەرلىك تەحنيكا دايىن تۇر. بۇل تەحنيكا تۇرلەرى كوبىنە قار قالىڭ تۇسەتىن تەمىرتاۋ, وساكاروۆكا, مولودەجنىي, اقسۋ-ايۋلى, اتاسۋ وڭىرلەرى باعىتىندا شوعىرلانعان.
جالپى, قىس كەزىندە ادامداردىڭ دا قاۋىپسىزدىك شارالارىنا ءمان بەرىپ, ساق جۇرگەنى ابزال. جاسىراتىنى جوق, كەيبىر اعايىن اۋا رايىنىڭ قولايسىز ەكەنىن كۇنى بۇرىن بىلگەنىمەن بىتپەيتىن شارۋاسىن سىلتاۋ ەتىپ, جولعا شىعىپ كەتەدى. ءسويتىپ ولار وزدەرىن عانا ەمەس, قۇتقارۋشىلاردى دا اۋرە-سارساڭعا سالىپ قويادى.
بۇدان بولەك مۇز جۇقا كەزدە سۋ قويمالارى مەن وزەندەرگە جانە كولدەرگە بالىق اۋلاۋعا جاياۋ-جالپىلاپ, كولىكپەن شىعىپ كەتەتىن جۇرت تا از ەمەس. مۇنداي كەزدە ويىن بالاسىن دا باقىلاۋسىز قالدىرماعان ءجون.
سونىمەن قاتار كۇن سۋىتقاندا تۇرعىنداردىڭ وت جاعىپ, ەلەكتر جىلىتقىشتاردى قولداناتىنى بەلگىلى. ءدال وسىنداي كەزدە قاۋىپسىزدىك شارالارىنا وتە قاتتى ءمان بەرىپ, ساق بولعان ءجون. ماسەلەن, وبلىستا جىلىتۋ ماۋسىمى باستالعاننان بەرى جەكەمەنشىك تۇرعىن ءۇي سەكتورىندا 166 ءورت وقيعاسى تىركەلگەن. ءتىلسىز جاۋ بەس ادامنىڭ ءومىرىن جالمادى.
تاياۋدا عانا قاراعاندى قالاسىنداعى كوپقاباتتى ۇيلەردىڭ بىرىندە بولعان ءورت ءتىلسىز جاۋدىڭ ساقتىق شارالارىن ساقتاماسا قانشالىقتى قاۋىپتى ەكەنىن كورسەتتى. سول توتەنشە وقيعا كەزىندە ءبىر وتباسىنىڭ ءۇش بىردەي مۇشەسى جالىن قۇشاعىندا قالىپ, كوز جۇمدى. اراسىندا جاسقا تولماعان ءسابي دە بولدى. كەيىن بەلگىلى بولعانداي, اتالعان پاتەردەگى ءورتتىڭ شىعۋىنا ەلەكتر جىلىتقىش سەبەپشى بولعان ەكەن.
بۇگىنگى كۇندە وبلىستا پەشپەن جىلىتىلاتىن جەر ۇيلەردە تۇراتىن ازاماتتاردىڭ ءومىرىن قاۋىپسىز ەتۋ ءۇشىن قۇتقارۋشىلار تاراپىنان ءبىرشاما شارۋالار اتقارىلىپ تا جاتىر. مىسالى, 2020 جىلدىڭ تامىز ايىنان بەرى كوپبالالى, الەۋمەتتىك جاعىنان از قامتىلعان وتباسىلاردىڭ ۇيلەرىنە جەرگىلىكتى اتقارۋشى بيلىك پەن ۇكىمەتتىك ەمەس ۇيىمداردىڭ كومەگىمەن 230 اۆتونومدى دابىل قاققىش ورناتىلعان.
قاراعاندى وبلىسى
