مىسالى, بيىل جىلى كوكسۋ اۋدانىندا جالپى ۇزىندىعى 47 شاقىرىم بولاتىن اۆتوكولىك جولى جوندەلگەن. بۇل ءىستى ۋاقىتىندا اياقتاۋ مەملەكەتتىك باعدارلامانىڭ اياسىندا مۇمكىن بولدى. وسى جوندەلگەن جولدىڭ 40 شاقىرىمى «جۇمىسپەن قامتۋدىڭ جول كارتاسى» بويىنشا جاسالسا, 7 شاقىرىمى «اۋىل – ەل بەسىگى» باعدارلاماسىنىڭ شەڭبەرىندە جۇزەگە اسىپتى. جالپى, جول كارتاسى اياسىندا كوكسۋ اۋدانىندا قۇنى 5 ملرد 518 ملن تەڭگە بولاتىن 33 جوبا قولعا الىنعان. ياعني اتالعان باعدارلاماعا سايكەس الەۋمەتتىك جانە كولىك ينفراقۇرىلىمىن دامىتۋ, ءبىلىم مەن مادەنيەت نىساندارىن جوندەۋ, تۇرعىن ءۇي-كوممۋنالدىق سالاداعى جوبالارعا كوڭىل بولىنگەن.
– قازىر اۋداندا جاڭادان 400 جۇمىس ورنى قۇرىلدى, سونىڭ ىشىندە 268 ادام جۇمىسپەن قامتۋ ورتالىعىنىڭ جولداماسىمەن ورنالاستىرىلدى. ال «جۇمىسپەن قامتۋدىڭ جول كارتاسى» اياسىندا اۋىلدارداعى 48 كوشەدە جوندەۋ اياقتالدى. تاعى 10 كوشەنى جوندەپ بىتىرەمىز. ياعني بيىل اۋداندا جالپى ۇزىندىعى 40 كم بولاتىن 58 كوشە جوندەلەدى, – دەيدى كوكسۋ اۋدانىنىڭ اكىمى الماس ءادىل.
ايتپاقشى, بيىل الماتى وبلىسىندا جەرگىلىكتى ماڭىزداعى جولداردىڭ قۇرىلىسى مەن جوندەۋ جۇمىستارىنا 61,7 ملرد تەڭگە قاراستىرىلعان. ونىڭ ىشىندە 19,7 ملرد تەڭگە «جۇمىسپەن قامتۋدىڭ جول كارتاسى-2020» باعدارلاماسى ارقىلى بولىنگەن. ال اياقتالعان جۇمىستىڭ ناتيجەسى بويىنشا ايماقتاعى جولداردىڭ ساپالىلىق دەڭگەيى 84 پايىزعا جەتۋى ءتيىس. ونىڭ ءبىر كورىنىسىن جوعارىداعى كوكسۋ اۋدانىنان بايقاۋعا بولار.
ال «جۇمىسپەن قامتۋدىڭ جول كارتاسى-2020» باعدارلاماسىنىڭ جەمىسىن كورگەن اۋداننىڭ كەلەسى مىسالىن پانفيلوۆ اۋدانىنان الۋعا بولار. جاركەنت وڭىرىندە باياعدارلاما اياسىندا 55 جوبا قولعا الىنعان. سونىڭ ءبىرى – ەڭبەكشى ورتا مەكتەبى. ىرگەتاسى 35 جىل بۇرىن سالىنعان ءبىلىم عيماراتى تولىقتاي شاتىرىنان ەدەنىنە دەيىن جاڭارتىلۋدا. جول كارتاسىمەن بولىنگەن كۇردەلى جوندەۋ جۇمىستارىن «نۇر-شاپاعات قۇرىلىس» سەرىكتەستىگى اتقارىپ جاتىر. مەردىگەرلەر قازىر نىساننىڭ ىشكى جۇمىستارىن 100 پايىز اياقتادى. ەندى اۋلاسىنداعى اباتتاندىرۋ-كوگالداندىرۋ, جارىق شامدارىن ورناتۋ شارۋالارى قالىپتى. بۇعان دەيىن توزىعى جەتكەن عيماراتتى قىسقى ماۋسىمدا جىلىتۋ قيىن بولعان ەكەن. جاڭارتىلۋى كەزىندە وسى جاعىنا باسا ءمان بەرىلىپتى. جۇمىسپەن قامتۋدىڭ جول كارتاسىمەن جاڭارتىلىپ جاتقان جوبا قۇنى – 958 ملن تەڭگە. مەردىگەرلەر قۇرىلىستى مامىردىڭ ورتاسىندا باستاعان. سودان بەرى 178 جەرگىلىكتى تۇرعىن جۇمىسقا تارتىلىپ وتىر. مۇنداعى جۇمىسشىلاردىڭ ايلىق جالاقىسى 85 000 تەڭگەدەن 200 000 تەڭگەگە دەيىنگى ارالىقتا بەلگىلەنگەن. ايتپاقشى, مەكتەپتىڭ ماتەريالدىق-تەحنيكالىق بازاسى تولىعىمەن جاڭارتىلادى. بۇل ماقساتقا قۇرىلىستان بولەك 23 ملن تەڭگە قارجى بولىنگەن. وسى اۋداننىڭ پەنجىم اۋىلىندا دا جاڭا امبۋلاتوريا سالىنىپ جاتىر. قۇرىلىسقا قاجەتتى قارجى «جۇمىسپەن قامتۋدىڭ جول كارتاسى-2020» باعدارلاماسى اياسىندا بولىنگەن. 7 مىڭ تۇرعىنى بار اۋىلدا بۇعان دەيىن ەمدەۋ مەكەمەسى بولماعان. جۇرتتىڭ باسى اۋىرىپ, بالتىرى سىزداسا, اۋدان ورتالىعىنا شاپقىلايتىن. ەندى 50 ورىندىق نىسان ىسكە قوسىلسا, تۇرعىندار دەنساۋلىعىن ساقتاۋعا ماڭىز بەرىلمەك. امبۋلاتوريا عيماراتىنىڭ قۇرىلىسىنا 259,2 ملن تەڭگە قارجى جۇمسالۋدا.
«جۇمىسپەن قامتۋدىڭ جول كارتاسى-2020» باعدارلاماسى اياسىنداعى اۋقىمدى جۇمىس الاكول اۋدانىنا دا ءتان. بيىل اۋدانى بويىنشا باعارلاماعا 57 جوبا كىرگەن بولاتىن. جوسپار بويىنشا 603 ادامدى جۇمىسپەن قامتۋ كوزدەلسە, سۇرانىستىڭ وسۋىنە وراي 56 جوباعا 612 ادام تارتىلىپتى. جول كارتاسىنىڭ يگىلىگى ارقاسىندا اۋدانداعى 32 الەۋمەتتىك نىسان, 15 كوشە, 3 تۇرعىن ءۇي-كوممۋنالدىق نىسان جوندەلىپ, جاڭعىرتىلسا, اۋىلداردى كوگالداندىرۋ مەن اباتتاندىرۋ بويىنشا دا 7 جوبا جۇزەگە اسقان ەكەن. بۇلاردىڭ قاتارىندا ۇشبۇلاق اۋىلىنداعى مادەنيەت ءۇيى مەن مەكتەپتىڭ كۇردەلى جوندەۋدەن وتۋىنە ەرەكشە توقتالۋعا بولادى. اۋىلداعى ءبىلىم ورداسىندا اتقارىلعان كۇردەلى جۇمىستارعا بارلىعى 601 ملن 890 مىڭ تەڭگە جۇمسالىپ, 170 ادام جۇمىسپەن قامتىلدى. ولاردىڭ 86-سى وسى باعدارلاما نەگىزىندە ەڭبەكپەن قامتىلدى. ال مادەنيەت وشاعىنىڭ جوندەۋ جۇمىستارىنا 350 ملن 620 مىڭ تەڭگە قاراستىرىلىپ, 180 ادام جۇمىسقا تارتىلعان ەكەن.
ال قاراساي اۋدانىندا «جۇمىسپەن قامتۋدىڭ جول كارتاسى-2020» باعدارلاماسى بويىنشا 62 نىسانعا قۇرىلىس جانە جوندەۋ جۇمىستارى جۇرگىزىلۋدە. وسى ماقساتتارعا 10 763 930 تەڭگە بولىنگەن. ناتيجەسىندە 1 880 جۇمىس ورنىنىڭ اشىلۋىنا مۇمكىندىك تۋدى. ونىڭ ىشىندە جۇمىسپەن قامتۋ ورتالىعى ارقىلى 940 ادامدى ەڭبەكپەن قامتۋ جوسپارلانعان ەكەن. قازىر قاسكەلەڭ قالاسىندا 1 500 ورىندىق ورتا مەكتەپ قۇرىلىسى باستالىپ, وعان 4,5 ملرد تەڭگە قارجى بولىنگەن. ال رايىمبەك اۋىلىنداعى ك.ازىرباەۆ ورتا مەكتەبىنىڭ كۇردەلى جوندەۋ جۇمىستارى اياقتالعان. جالپى, بيىل اۋدان بويىنشا 7 مەكتەپتىڭ اجەتحاناسىن عيمارات ىشىنە ورناتۋ جۇمىسى اياقتالادى, بۇعان 35 ملن تەڭگە جۇمسالۋدا. سونداي-اق جول كارتاسى اياسىندا بەرەكە اۋىلىنىڭ مادەنيەت ءۇيىنىڭ كۇردەلى جوندەۋ جۇمىستارىنا 726 ملن 297 مىڭ تەڭگە قاراجات بولىنسە, ىرگەلى اۋىلىنداعى دارىگەرلىك امبۋلاتوريا قۇرىلىسىنا 467 ملن تەڭگەدەن اسا قارجى قاراستىرىلىپتى.
الماتى وبلىسى
