وسى رەتتە مەملەكەتتىك قىزمەت كورسەتۋ سالاسىنا دا بىرقاتار وزگەرىس ەندى. تۇرعىندار حالىققا قىزمەت كورسەتۋ ورتالىعىنا بارىپ, ۇزىن-سونار كەزەككە تۇرمايتىن بولدى. قىزمەتتىڭ كوبى – ونلاين. حالىق تەك قاعاز جۇزىندە كورسەتىلەتىن قىزمەتتەردى الۋعا بارادى. حالىقپەن تىكەلەي جۇمىس ىستەيتىن ازاماتتاردىڭ قىزمەتى دە ۇلكەن وزگەرىسكە ۇشىرادى.
– مەن حقو-دا كوپ جىلدان بەرى جۇمىس ىستەيمىن. ءبىز كۇن سايىن كليەنتتەردىڭ جۇزدەگەن سۇراعىنا جاۋاپ بەرەمىز, كەڭەس بەرەمىز. قالىپتى جاعدايدا جۇمىس ىستەي ءجۇرىپ, اياقاستى قاشىقتان قىزمەت كورسەتۋگە كوشكەندە جاۋابىمىزدان گورى سۇراعىمىز كوپ بولدى, – دەيدى وسكەمەن قالاسىنداعى №3 حقو مامانى گۇلنۇر نۇرچينا.
ناۋرىز ايىنىڭ سوڭىندا ەلىمىز بويىنشا حقو-لار جابىلدى. قىزمەت الۋشىلار بارلىق قىزمەتتى egov.kz ەلەكتروندى پورتالى ارقىلى الۋعا ءماجبۇر بولدى. بۇل جەردە مەملەكەتتىك كورپوراتسيا باسشىلىعى قىزمەت الۋشىلارعا بارىنشا كومەك بەرۋ كەرەك ەكەنىن ءتۇسىنىپ, 1414 call-ورتالىقتىڭ جۇمىسىن كۇشەيتتى.
مەملەكەت ءۇشىن قىزمەتتەن حالىقتىڭ دەنساۋلىعى الدەقايدا ماڭىزدى ەدى. سوندىقتان دا شىعىس قازاقستان وبلىسىندا 250-دەن استام حالىققا قىزمەت كورسەتىپ وتىرعان مامان ۇيلەرىنە قايتارىلدى. ولار ازاماتتارعا 1414 تەلەفون ءنومىرى بويىنشا قاشىقتان كەڭەس بەرۋگە كوشتى. توتەنشە جاعداي كەزىندە ۇيدەن جۇمىس ىستەگەن كەڭەسشىلەردىڭ ءبىرى وسكەمەن قالاسى №3 حقو مامانى ءلاززات احمەتاللينوۆا ەدى.
– العاشىندا وتە قيىن بولدى, كۇنىنە 200-250 قوڭىراۋعا دەيىن قابىلدادىق. ءبىز ءۇشىن بۇل سىناق سياقتى, – دەپ ەسكە الادى ءلاززات.
ولاردىڭ جۇمىسى تەلەفون ارقىلى كەڭەس بەرۋمەن شەكتەلگەن جوق. كوپ ۇزاماي پورتالدا ەتسق-نى قاشىقتان الۋ ىسكە اسىرىلدى, eGov.kz پورتالىندا بەينەكامەرا ارقىلى ازاماتتاردى سايكەستەندىرۋ ماسەلەسى تۋىندادى. ول ءۇشىن رەسپۋبليكا بويىنشا 800-گە جۋىق قىزمەتكەرگە, ال شىعىس قازاقستان وبلىسى بويىنشا 120 قىزمەتكەرگە جاڭا مىندەت جۇكتەلىپ, ولار ۆيرتۋالدى اسسيستەنت جانە بەينەكونسۋلتانت بولىپ جۇمىس ىستەي باستادى.
حقو بەينەكونسۋلتانتى جانات وسپانوۆتىڭ ايتۋىنشا, ەلەكتروندى فورماتقا كوشۋ حالىق ءۇشىن وڭاي بولعان جوق. كەيىن ءبارى ونلاين فورماتقا ۇيرەنىسىپ كەتكەنىمەن, بارلىعى سمارتفوننان باس الا الماي قالدى.
بۇگىندە شىعىس قازاقستان وبلىسىندا كارانتين شارالارى قايتا كۇشەيتىلىپ كەلەدى. ءىرى قالالاردىڭ حقو-لارىندا قاعاز قىزمەتتەرى تەك الدىن الا برونداۋ بويىنشا عانا كورسەتىلەدى.
شىعىس قازاقستان وبلىسى بويىنشا «ازاماتتارعا ارنالعان ۇكىمەت» فيليالىنىڭ ديرەكتورى ازامات ەسەمبۋلوۆتىڭ ايتۋىنشا, برونداۋدى ەنگىزگەن كەزدە كوپتەگەن كليەنت تۇسىنبەي, ونلاين الۋعا بولاتىن قاراپايىم انىقتامالار ءۇشىن حقو-عا بارۋدى قويماعان. ال بۇگىن ازاماتتاردىڭ ۇيدە وتىرىپ قىزمەت الۋى الدەقايدا ىڭعايلى جانە قاۋىپسىز. وعان كوپشىلىكتىڭ كوزدەرى جەتتى دە.
قاپەرلەرىڭىزگە سالا كەتسەك, بۇگىنگى كۇنى مەملەكەتتىك قىزمەتتەردىڭ 80%-ىن eGov.kz ەلەكتروندىق ۇكىمەت پورتالى, eGovKzBot2.0 telegram-بوتى جانە eGovMobile ءموبيلدى قوسىمشاسى ارقىلى الۋعا بولادى.
شىعىس قازاقستان وبلىسى
