سۋرەتتەردە: پوليتسيا مايورى رۋسلان بەكبولاتوۆ; ۋچاسكەلىك ينسپەك- تور قادىربەك يسين
ۋچاسكەلىك ينسپەكتوردىڭ بەدەلىن ارتتىرۋ ءۇشىن ولارعا جوعارى بيلىك, اتاپ ايتقاندا ىشكى ىستەر مينيسترلىگى تاراپىنان قولداۋ جاسالۋى كەرەك-اق. ايتپەسە, قۇقىق قورعاۋدىڭ تەك قارا جۇمىسىمەن عانا اينالىساتىن جاندار كوزگە ىلىنە قويمايدى. پرەزيدەنت جولداۋىنداعى تالاپتان كەيىن مينيسترلىك تاراپىنان وسى ىسكە ءمان بەرىلە باستادى. سونىڭ ءبىرى رەتىندە ءمينيستردىڭ ءوزى قاتىسقان جيىندارعا ولاردىڭ شاقىرىلۋىنان كورۋگە بولادى. جۋىردا سولتۇستىكقازاقستاندىق ۋچاسكەلىك پوليتسيا ينسپەكتورى رۋسلان بەكبولاتوۆ ءىىم كەڭەيتىلگەن القاسىندا وزىنە مەرزىمىنەن بۇرىن بەرىلگەن مايور اتاعىن مينيستر, گەنەرال-لەيتەنانت ەرلان تۇرعىمباەۆتىڭ ءوز قولىنان الدى. القا وتىرىسىنا پرەزيدەنت قاسىم-جومارت توقاەۆتىڭ ءوزى دە قاتىسقان ەدى. وتىرىستا ۋچاسكەلىك ينسپەكتورلاردىڭ الدىندا تۇرعان مىندەتتەر ايتىلىپ, جاڭا تالاپتار جەتكىزىلدى. «بۇل اتاق مەن ءۇشىن ايرىقشا بولدى. ءمينيستردىڭ ءوز قولىنان پوگون العاندا قۋانىشتان قاتتى تولقىدىم. وسى وتىرىستا ءبىزدىڭ قىزمەتىمىز ءۇشىن جاڭا مۇمكىندىكتەر اشىلعانىن بىلدىك. باستى مىندەتىمىز – قىلمىستاردىڭ الدىن الۋ. ەندى ءبىزدىڭ فۋنكتسيامىزعا جاتپايتىن باسقا جۇمىستار بىزگە جۇكتەلمەيتىن شىعار دەگەن ۇمىتتەمىز», دەدى ول ءوزىنىڭ سوزىندە.
رۋسلان بەكبولاتوۆ تايىنشا اۋدانى اباي اۋىلدىق وكرۋگىندە ۋچاسكەلىك ينسپەكتور بولىپ قىزمەت ىستەيدى. ۋچاسكە حالقىنىڭ سانى 1400-گە جۋىق ادام. جىل باسىنان بەرى مۇندا ءتورت ۇرلىق جاسالىپ, ولار رۋسلان بەكبولاتوۆتىڭ قاتىسۋىمەن بارلىعى ءىزى سۋىماي اشىلدى. ونىڭ ۇستانىمى – ۋچاسكەلىك پوليتسيا ينسپەكتورلارى ءوزىنىڭ ۋچاسكەسىن تولىقتاي ءبىلۋى ءتيىس.
ۋچاسكەدە ءتۇرلى وقيعالار بولىپ تۇرادى. بىردە وعان اكەسىن ۇرىپ جاتقان بۇزاقىنى ۇستاۋعا تۋرا كەلدى. ىشىمدىككە تويىپ العان بالاسىنىڭ قولىندا پىشاق بولعان. ر.بەكبولاتوۆ وعان قاراماي قاسكۇنەمنىڭ قولىن قايىرىپ, پىشاقتى تارتىپ العان. بىراق وسى بۇزىقتىڭ اۋىل شارۋاشىلىعى كاسىپورنىنا جۇمىسقا قابىلدانۋىنا دا كومەكتەسكەن. قازىر ول ر.بەكبولاتوۆتى كورگەندە كادىمگىدەي قۋانىپ قالادى. «پوليتسيانىڭ مىندەتى – ادامدارعا كومەكتەسىپ, قولداۋ كورسەتە وتىرىپ, قۇقىقتىڭ بۇزىلۋىنا جول بەرىلمەگەنىن قاداعالاۋ. القا وتىرىسىندا ادامداردى بىرجاقتى كىنالاۋعا جول بەرىلمەۋى كەرەكتىگى ايتىلدى», دەيدى پوليتسيا مايورى.
جالپى, اتالعان وتىرىسقا سولتۇستىك قازاقستان وبلىسىنان ءۇش ۇزدىك ۋچاسكەلىك پوليتسيا ينسپەكتورى قاتىستى. ولاردىڭ قاتارىندا بولعان ۋچاسكەلىك پوليتسيا ينسپەكتورى, پوليتسيا مايورى قادىربەك يسين مامليۋت اۋدانىنداعى پريگورودنىي سەلولىق وكرۋگىندە قىزمەت ەتەدى. «مەن جيىننان ءومىر بويىما جەتەرلىك اسەر الدىم. اسىرەسە ۋچاسكەلىك ينسپەكتورلاردىڭ قىزمەتتىك مىندەتتەرىن جەتىلدىرۋ بويىنشا ايتىلعان ۇسىنىستار مەنىڭ دە ويىمنان شىقتى. سونىڭ ىشىندە ءبىزدى وزىمىزگە ءتان ەمەس مىندەتتەردەن بوساتۋ ماسەلەلەرى وتە ورىندى دەپ سانايمىن. ءبىزدىڭ مىندەتىمىز قىزمەت كورسەتەتىن اۋماقتا قىلمىستىڭ الدىن الۋ بولا تۇرا, كەز كەلگەن جۇمىستارعا ءبىزدى جەگۋ ادەتكە اينالعان. مىسالى, اسكەرگە شاقىرۋشىلاردى كوميسسارياتقا جەتكىزۋ مەن باسقا دا مىندەتتەردى ورىنداۋدان ءبىزدىڭ قىزمەتتى بوساتۋ ۇسىنىلدى», دەگەن ويىمەن ءبولىستى پوليتسيا مايورى.
ۋچاسكەلىك ينسپەكتورلاردىڭ كۇتەتىن جاڭالىقتارىنىڭ اراسىندا تۇرمىستىق زورلىق-زومبىلىقتى بولعىزباۋدىڭ جولى بولىپ تابىلاتىن رەسىمدەردى وڭتايلاندىراتىن زاڭناماداعى وزگەرىستەر. بيىل قادىربەك يسينگە وتباسىلىق جانجالعا قاتىستى 7 ءىستى سوتقا دايىنداۋعا تۋرا كەلگەن. مۇنداي جۇمىس بىرنەشە كۇنگە سوزىلادى, كەيدە زايا كەتەتىن جاعدايلار دا بولادى. ويتكەنى ايەلدەرى جۇبايلارىنىڭ ۋادەلەرىنە سەنىپ, جازعان ارىزدارىن كەرى قايتارىپ الادى. وتىرىستا وتباسىنداعى زورلىق-زومبىلىق فاكتىلەرى بويىنشا تاتۋلاستىرۋ ءراسىمى مەن ەسكەرتۋ تۇرىندەگى اكىمشىلىك جازانى الىپ تاستاۋ ۇسىنىلعان. سونداي-اق مۇراعا قالعان تۇرعىن ءۇيدىڭ قۇجاتتارىن رەسىمدەۋ, كۇيەۋىمەن اجىراسۋ رەسىمى, وزگە دە بىرنەشە ماسەلەلەر بويىنشا ۋچاسكەلىك ينسپەكتورعا فۋنكتسيونالدىق مىندەتىنەن تىس جۇمىستار جۇكتەلەدى ەكەن. پريگورودنىي سەلولىق وكرۋگىندە 1043 ادام بار, بارلىعىندا دا قۇقىقتىق ماسەلەلەر تۋىنداۋى مۇمكىن, ءار جاعدايعا تۇسىنىستىكپەن قاراپ, اۋىلدىقتارعا كومەكتەسۋگە تىرىسۋ قاجەت دەپ سانايدى قادىربەك يسين.
سولتۇستىك قازاقستان وبلىسى
