داڭقتى بوكسشىلاردىڭ اكەسى – ۆلاديمير راديونوۆيچ اسكەري ادام بولدى. شەنى – گەنەرال-مايور. سول سەبەپتى دە ولار ءوز وتباسى مۇشەلەرىمەن ۇنەمى كوشىپ-قونىپ ءجۇردى. ءۇيدىڭ ۇلكەنى ۆاسيلي 1971 جىلى قىرعىزستاننىڭ بەلوۆودسك قالاسىندا تۋسا, ۆلاديمير 1976 جىلى سەمەي وڭىرىندە دۇنيەگە كەلدى. كەيىننەن جامبىل وبلىسى مەن الماتى قالاسىندا دا بىرەر جىل تۇراقتاعان ەكەن. ولار جاستايىنان سپورتپەن شۇعىلدانىپ, ءتۇرلى جارىستاردا جەڭىس تۇعىرىنا كوتەرىلدى. اتاپ ايتساق, ۆاسيلي كليچكو العاشقى قادامىن كيكبوكسينگتەن باستادى. ەكى رەت اۋەسقويلار جانە ءتورت رەت كاسىپقويلار اراسىندا الەم چەمپيونى اتاندى. الايدا سپورتتىڭ بۇل ءتۇرى وليمپيا ويىندارى باعدارلاماسىنا ەنبەگەندىكتەن, كوپ ۇزاماي بوكسقا اۋىستى. اۋەسقويلار رينگىندە ول ءبىراز بەلەستى باعىندىرىپ ۇلگەردى. اسا اۋىر سالماقتا ونەر كورسەتكەن ۆاسيلي ۋكراينا بىرىنشىلىگىندە ءۇش مارتە باس جۇلدەنى ۇتىپ, ريمدە وتكەن اسكەريلەردىڭ دۇنيەجۇزىلىك ويىندارىندا جەڭىس تۇعىرىنىڭ ەڭ بيىك ساتىسىنا كوتەرىلدى. 1995 جىلى كليچكو الەم چەمپيوناتىنىڭ كۇمىس جۇلدەگەرى اتاندى.
ۆلاديمير كليچكو 17 جاسىندا بوكستان جاسوسپىرىمدەر اراسىندا ەۋروپا چەمپيونى اتاعىن جەڭىپ, ۋكراينا بىرىنشىلىگىندە بەس مارتە توپ جاردى. سونداي-اق اسكەريلەردىڭ دۇنيەجۇزىلىك ويىندارىنىڭ جەڭىمپازى, ەۋروپا چەمپيوناتىنىڭ كۇمىس جۇلدەگەرى اتاندى. ۆلاديمير اۋەسقويلار رينگىندە ءوزىنىڭ ەڭ زور تابىسىنا 1996 جىلى قول جەتكىزدى. +91 كيلو سالماقتا باق سىناعان ۋكراينالىق بوكسشى اتلانتادا الاۋى تۇتانعان وليمپيا ويىندارىندا باس جۇلدەنى قانجىعاسىنا بايلادى.
اۋەسقويلار اراسىندا وراسان زور تابىسقا جەتكەن اعايىندىلار وليمپيادا اياقتالعان بەتتە گەرمانياعا اتتانىپ, كاسىپقوي بوكسقا مىقتاپ دەن قويدى. ەكى ايعا جەتەر-جەتپەس ۋاقىت دايارلانعان ولار 1996 جىلدىڭ 16 قاراشاسىندا تۇساۋكەسەر كەزدەسۋلەرىن وتكىزدى. گامبۋرگتە جالاۋى جەلبىرەگەن جارىستا ۆيتالي امەريكالىق توني برەدحەمدى ەكىنشى راۋندتا ەسىنەن تاندىرسا, ۆلاديمير اقش بوكسشىسى فابيان مەزانى ءبىر جارىم مينۋتقا جەتكىزبەي ۇرىپ جىقتى. تىرناقالدى ايقاستاعى ايقىن جەڭىس كليچكولاردى قاناتتاندىردى. سودان كەيىن ەكى جىل بويى ولار ەشكىمگە ەسە جىبەرمەدى.
1998 جىلدىڭ 14 اقپانىندا ۆلاديمير شتۋتگارتتا WBس نۇسقاسىنىڭ ينتەركونتينەنتالدىق كۋبوگى ءۇشىن تالاسۋعا مۇمكىندىك الدى. ءۇشىنشى راۋندتا ۋكراينالىقتىڭ اۋىر سوققىلارىنان كەيىن اقش بوكسشىسى ماركۋس ماكينتاير ورنىنان تۇرا المادى. ال ۆيتالي ليۋبەك قالاسىندا وتكەن WBو تۇجىرىمىنىڭ ءتاجى ءۇشىن باسەكەدە ديك راياندى بەسىنشى راۋندتا نوكداۋنعا جىبەردى. جەرلەستەرىنىڭ جاعدايى مۇشكىل ەكەندەرىنە كوزدەرى جەتكەننەن كەيىن اقش باپكەرلەرى رينگكە اق ورامال تاستادى.
سوعان دەيىنگى ءوز جەكپە-جەكتەرىنىڭ بارلىعىن گەرمانيادا وتكىزگەن كليچكولار 1998 جىلدىڭ جازىندا اقش-تا ونەر كورسەتۋگە شاقىرتۋ الدى. بۇل تاكاپپار امەريكالىقتاردىڭ ولاردىڭ مىقتىلىعىن مويىنداۋمەن پارا-پار ەدى. ويتكەنى ەكىنىڭ بىرىنە كاسىپقوي بوكستىڭ وتانىندا ونەر كورسەتۋ باقىتى بۇيىرا بەرمەيدى. ۆلاديمير لۋيزيانا شتاتىنىڭ ماركسۆيل قالاسىندا كارلوس مونرونى التىنشى راۋندتا, ال ۆلاديمير ماياميدە ريكاردو كەننەديدى ءبىرىنشى راۋندتا-اق نوكاۋتپەن جەڭدى. اقش-تان باسقا جەردە وتكەن باسەكەلەرگە اسا ءمان بەرمەيتىن جەرگىلىكتى ماماندار وسىنداي ادەمى جەڭىستەردەن سوڭ ەۋروپادا تاماشا بوكسشىلار ءوسىپ كەلە جاتقاندىعىن ەرىكسىز مويىندادى.
سپورتتا جەڭىس پەن جەڭىلىستىڭ قاتار جۇرەتىنى بەلگىلى. ەرتە مە, كەش پە ءتورت تۇياعىن تەڭ باسقان تۇلپارلاردىڭ دا سۇرىنەتىن كەزى بولادى. سول جىلدىڭ جەلتوقسان ايىندا ۆلاديمير كيەۆتە ءوز جەرلەستەرىنىڭ كوز الدىندا وڭباي ۇتىلدى. WBس نۇسقاسىنىڭ ينتەركونتينەنتالدىق كۋبوگى ءۇشىن ايقاستا ول امەريكالىق روسس ءپيۋريتتيدى كوگالا قويداي ساباپ جاتىپ, 11 راۋندتا ابايسىزدا قاتتى سوققى الدى. كليچكونىڭ ەسى اۋىپ قالعانىن كورگەن باپكەرى دەرەۋ جەكپە-جەكتى توقتاتىڭدار دەپ تورەشىگە ءوتىنىش ايتتى. «بۇل ساتسىزدىك مەن ءۇشىن ۇلكەن ساباق بولدى. باپكەرىمنىڭ اقىلىن تىڭداعاننىڭ ورنىنا مەن قىزبالىققا سالىندىم. جانكۇيەرلەر ايقايلاعان سايىن العا ۇمتىلىپ, قارسىلاسىمدى ۇرىپ جىعۋعا اسىقتىم. كورەرمەندەردى ەرەكشە شاتتاندىرعىم كەلدى. ال ونىڭ اقىرى وسىنداي جاعدايعا اكەلىپ سوقتىردى», دەپ باسەكەدەن كەيىن ۆلاديمير اعىنان جارىلدى.
ال ۆيتالي بولسا, قارسىلاستارىن بىرىنەن سوڭ ءبىرىن ۇتىپ جاتتى. اۋەلى يتاليالىق فرانچەسكو سپينەلليدى ۇتىپ, ەۋروپاداعى تەڭدەسسىز بوكسشى ەكەنىن تاعى ءبىر دالەلدەسە, 1999 جىلى ۇلىبريتانيالىق حەربي حايدتى ەكىنشى راۋندتا ەسىنەن تاندىرىپ, WBو نۇسقاسىنىڭ چەمپيوندىق ءتاجىن يەلەندى. ماۋسىمنىڭ سوڭىنا دەيىن ۆيتالي كليچكو سول اتاعىن تاعى ەكى مارتە قورعادى.
اتالعان بوكسشىلاردىڭ ءبىر ەرەكشەلىگى – جەڭىلىپ قالعان جاعدايدىڭ وزىندە ولاردىڭ جىگەرى جاسىمادى. كەلەسى جولى ەسەسى كەتكەن قارسىلاسىن ساباماي تىنبادى. ماسەلەن, 2000 جىلدىڭ اقپانىندا ۆيتالي بەرليندە كريس بەردتان ۇتىلدى. ۇتىلعاندا قولىنان جاراقات الىپ, توعىزىنشى راۋند اياقتالعان سوڭ جەكپە-جەكتى جالعاستىرۋدان باس تارتتى. سول كەزدە جانكۇيەرلەر مەن جۋرناليستەر ونى اقش بوكسشىسىنان قۇلاپ قالۋدان قورقىپ, وسىنداي قادامعا باردى دەپ ايىپتادى. تىپتەن, «قورقاق», «سۋجۇرەك» دەگەن سوزدەر دە ايتىلدى. ال ءوزىنىڭ بۇل شەشىمىن كليچكو ء«ار ادام ءۇشىن ەڭ باستى بايلىق – دەنساۋلىق. ال دەنساۋلىعىڭ سىر بەرگەندە جەڭىسكە جەتۋ وتە قيىن. سول سەبەپتەن دە WBO-نىڭ چەمپيوندىق بەلبەۋىن ءوز ەركىممەن بەردكە بەردىم. سونىڭ قىزىعىن ۋاقىتشا كورە تۇرسىن. چەمپيوندىق اتاق قايدا كەتەر دەيسىز, جاراقاتىم جازىلعان سوڭ بەلبەۋدى قايتا قايتارىپ الامىن عوي» دەپ ءتۇسىندىردى.
قوس مىقتىنىڭ جولى رينگتە ءالى قيىسقان جوق. الايدا سول جىلدىڭ قاراشا ايىندا ءىنىسى ۆلاديمير كەلن قالاسىندا كريس بەردتى ەكى رەت ەسەڭگىرەتىپ, ايقىن باسىمدىقپەن جەڭدى. ءسويتىپ ارادا سەگىز اي وتكەن سوڭ WBO-نىڭ چەمپيوندىق بەلبەۋى كليچكولاردىڭ شاڭىراعىنىڭ تورىنەن ورىن تاپتى.
اعاسى دا قاراپ قالعان جوق. ءبىر كەزدەرى كيەۆ قالاسىندا روسس پيۋريتتيگە ءىنىسى جىبەرگەن ەسەسى ەسىنە ءتۇسىپ, سول بوكسشىمەن جۇدىرىق ءتۇيىستىرۋدىڭ امالىن قاراستىردى. اراعا ءۇش جىل سالىپ ولاردىڭ جولدارى قيىستى. دورتمۋندتا ۇيىمداستىرىلعان باسەكەدە ۆيتالي ءپيۋريتتيدىڭ بەت-اۋزىن قانعا بويادى. بۇل وقيعا جايىندا باياندالعان «اعايىندىلاردىڭ كەگى», «قانعا – قان, جانعا – جان» اتتى قۇلاش-قۇلاش ماقالالار كەزىندە ءباسپاسوز بەتتەرىندە جارىق كورگەنى دە ەسىمىزدە.
كاسىپقوي رينگكە اۋىسقالى بەرگى جەتى جىل ارالىعىندا ازۋلى بوكسشىلارعا اينالعان اعايىندىلار ءۇشىن 2003 جىل اسا ءساتسىز بولدى. WBO تۇجىرىمى بويىنشا الەم چەمپيونى اتاعىن التىنشى مارتە قورعاۋعا شىققان ۆلاديمير ويدا-جوقتا 38 جاستاعى وڭتۇستىك افريكا رەسپۋبليكاسىنىڭ وكىلى كورري ساندەرستەن ەكىنشى راۋندتا ويسىراي ۇتىلدى. بۇل جەڭىلىس ونىڭ بەدەلىنە ەلەۋلى نۇقسان كەلتىردى. ال ۆيتالي «قۇلاساڭ ناردان قۇلا» دەپ, WBس نۇسقاسىنىڭ ءتاجى ءۇشىن اتاقتى لەننوكس ءليۋيستىڭ وزىمەن جۇدىرىقتاستى. بۇل ۋكراينالىق جىگىتتىڭ كاسىپقوي رينگكە تابان تىرەگەلى بەرى اڭساپ جۇرگەن ارمانى ەدى. ەندى سول ارماندى اقيقاتقا اينالىرۋ ءۇشىن كليچكو بارىن سالىپ ايقاستى. ەكىنشى كەزەڭدە ءۆيتاليدىڭ اۋىر سوققىسىنان الەم چەمپيونى قۇلاپ قالا جازدادى. جالپى ستاتيستيكاعا سۇيەنسەك, كليچكونىڭ ءاربىر ءتورت سوققىسىنا ليۋيس ءبىر عانا سوققىمەن جاۋاپ قايىرىپ وتىرعان. الايدا بۇل كەشتە الەم چەمپيونى اتانۋ باقىتى ۆيتاليگە بۇيىرمادى. باسەكە بارىسىندا كليچكونىڭ قاباعى جارىلىپ, دارىگەر التىنشى راۋندتان سوڭ وعان ايقاستى ءارى قاراي جالعاستىرۋعا رۇقسات بەرمەدى. بىراق سودان كەيىن ۆيتالي كليچكونىڭ قانشالىقتى مىقتى ەكەنىن سەزگەن ۇلىبريتانيالىق قارىمتا ماتچتا وڭباي ۇتىلاتىنىن سەزسە كەرەك, بوكسپەن قوش ايتىستى.
قۋانىش پەن وكىنىش الماسقان كۇندەر ءوتىپ جاتتى. ال الدارىنا بيىك ماقسات قويعان اعالى-ءىنىلى كليچكولار جانكەشتى جاتتىعۋلارىن جالعاستىرىپ, كوز ارباعان بەلەستەرگە كوز تىكتى. اقىرى ۆيتالي ىرىكتەۋ سايىسىندا كيرك دجونسوندى, ال شەشۋشى باسەكەدە كورري ساندەرستى ايقىن باسىمدىقپەن ۇتىپ, ەڭ بەلدى تۇجىرىم – WBس بويىنشا الەمدىك ءتاجدى يەلەندى. ىلە-شالا ۇلكەن كليچكو دەنني ۋيليامستى سەگىزىنشى راۋندتا ەسىنەن تاندىرىپ, اسا اۋىر سالماقتاعى تورتكۇل دۇنيەدەگى ەڭ مىقتى بوكسشى ەكەنىن تايعا تاڭبا باسقانداي ەتىپ دالەلدەدى.
كاسىپقوي رينگتەگى ۆيتالي كليچكونىڭ كارەراسى 16 جىلعا (1996-2012 جىلدارى) سوزىلدى. سول ارالىقتا 47 جەكپە-جەكتىڭ تەك ەكەۋىندە عانا ۇتىلدى. 41 قارسىلاسىن ەسىنەن تاندىردى. ول تەك كريس بەرد پەن لەننوكس ليۋيسكە عانا ەسە جىبەرگەنىن جوعارىدا ايتتىق. ۆلاديمير 20 جىلعا جۋىق ۋاقىت بويى (1996-2017 جىلدارى) كاسىپقويلارمەن كۇش سىناستى. سەمەي ءوڭىرىنىڭ تۋماسى 69 مارتە شارشى الاڭعا كوتەرىلىپ, 64 رەت جەڭىس تويىن تويلادى. 54 باسەكەدە قارسىلاستارىن ەسىنەن تاندىردى. ەكەۋى دە ەڭ بەلدى نۇسقالار بويىنشا چەمپيوندىق بەلبەۋدى يەلەنىپ, وزدەرىنىڭ مىقتىلىعىن تۇبەگەيلى مويىنداتقان ساڭلاقتار ەكەنى ەش داۋ تۋعىزبايدى.
اعايىندى كليچكولاردىڭ رينگتەن تىس ومىرلەرى دە وزگەلەرگە ۇلگى بولارلىق. ولار باسقا بوكسشىلار سەكىلدى بوس ۋاقىتتارىن ويىن-ساۋىق ورتالىقتارىندا, كازينولار مەن مەيرامحانالاردا وتكىزبەيدى. جانجال مەن داۋ-دامايدان دا بويلارىن اۋلاق ۇستاۋعا تىرىسادى. ەكەۋى دە كەزىندە ءبىلىم نارىنە سۋسىنداپ, ءبىرى – فيلوسوفيا عىلىمدارى بويىنشا, ەكىنشىسى – سپورت تاقىرىبىندا كانديداتتىق ديسسەرتاتسيا قورعادى. ءتۇرلى ۇيىمدار مەن قورلاردا باسشىلىق قىزمەتتەر اتقاردى. قايىرىمدىلىق شارالارىن دا ءجيى قاتىسىپ ءجۇر. اعايىندىلاردى ساياسي دودالاردا دا ءجيى كورىپ ءجۇرمىز. بۇل رەتتە ۆيتالي ەرەكشە بەلسەندىلىك تانىتۋدا. كەزىندە ول ۋكراينا پرەزيدەنتىنىڭ كەڭەسشىسى بولسا, بۇل كۇندەرى كيەۆ قالالىق اكىمشىلىگىنىڭ باسشىسى قىزمەتىن اتقارۋدا. ەكەۋى دە ءتۇرلى ماراپاتتان كەندە ەمەس. ءىنىسى بىرنەشە وردەن مەن مەدالدى كەۋدەسىنە تاقسا, اعاسىنىڭ «ۋكراينا باتىرى» دەگەن اسا مارتەبەلى اتاعى بار. مىنە, ۆيتالي مەن ۆلاديمير وسىنداي جاندار. ولار تەك سپورتتا عانا ەمەس, كۇندەلىكتى ءومىر مەن ساياساتتا دا تەك بيىكتەن كورىنۋدە.
