الماتىداعى س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ ءبىر توپ تۇلەگى ىندەتپەن كۇرەستىڭ العى شەبىنەن تابىلدى. وقۋىن جاڭا عانا اياقتاپ, قىزمەتىنە كىرىسەر تۇستا جاس دارىگەرلەر پاندەميامەن بەتپە-بەت كەلدى. ولاردىڭ قاتارىندا 25 جاستاعى ءنۇريدىن تىلەۋبەك تە بار. ول توتەنشە جاعداي ەنگىزىلگەن كەزدەن باستاپ وپەراتيۆتىك ۆولونتەرلىك شتابتا قىزمەت ەتۋگە كىرىستى. ەرىكتى جاستار قيىن جاعدايدا قالعان وتباسىلارعا, جالعىزباستى انالارعا, قارت ادامدارعا ازىق-ت ۇلىك سەبەتتەرىن تاراتىپ, ءدارى-دارمەك اپارىپ كومەكتەستى. كەيىننەن ىندەت القىمنان الىپ, جاعداي ۋشىققان كەزدە 25 ۆولونتەر پروۆيزورلىق ستاتسيونارلاردا, كارانتيندىك وبەكتىلەردە دارىگەرلىك قىزمەتىنە ارالاستى. العاشىندا ىندەتتىڭ الدىن الۋ ءۇشىن شەتەلدەن كەلگەن وتانداستارىمىزدىڭ كارانتينگە جابىلعانى ەسىمىزدە. سول مەكەمەلەردىڭ بىرىندە ءنۇريدىن ارىپتەستەرىنە كومەكتەسىپ, جالپى جاعدايدى قاداعالاۋعا قول- ۇشىن سوزدى.
«3,5 مىڭنان استام وتانداسىمىز شەتەلدەن ورالدى. ىندەتتىڭ وزگە ەلدەردە كەڭىنەن تارالىپ جاتقان كەزى. ول كەزدە الدا نە بولارى بەلگىسىز ەدى. ەلگە كەلگەندەردەن مىندەتتى تۇردە كوروناۆيرۋسقا تەست الىنادى. ۆيرۋس جۇقتىرماعان ازاماتتاردى 1,5 كۇننەن كەيىن ۇيىنە كارانتينگە جىبەرەدى, ال ۆيرۋس انىقتالعاندارىن ينفەكتسيالىق ستاتسيونارلارعا اۋىستىراتىنبىز», دەپ ەسكە الدى ن.تىلەۋبەك.
يگى ىسىمەن وزگەلەرگە ۇلگى بولعان ۆولونتەرلەردىڭ پاندەميا كەزىندەگى جۇمىسىن ەرلىككە تەڭەۋگە ابدەن بولادى. ويتكەنى وزىنە, جاقىندارىنىڭ دەنساۋلىعىنا تونگەن قاۋىپكە قاراماستان, قايىرىمدى ىستەن باس تارتقان جوق. ءنۇريدىن دە ەڭ قيىنى جاقىندارىڭنىڭ دەنساۋلىعىنا الاڭداۋ ەكەنىن ايتادى.
«جۇمىستا سونشالىقتى قيىندىق كوپ بولدى دەي المايمىن. پسيحولوگيالىق قىسىم بولعان شىعار. سەبەبى حالىق جاپپاي كارانتيندە ۇيدە وتىرعاندا, ءبىزدىڭ وپەراتيۆتى ۆولونتەرلىك شتابتا جۇمىس قىزا ءتۇستى. ال پروۆيزورلىق ستاتسيوناردا جۇرگەندە ۆيرۋس جۇقتىرىپ الامىن با دەگەن قورقىنىش بولدى. بۇل كوبىنە ءوزىڭ ءۇشىن ەمەس, ۇيدەگى اتا-اناما, ىنىمە, اتام مەن اجەمە جۇقتىرىپ الامىن با دەگەن قاۋىپ ەدى», دەيدى ۆولونتەر. دەسە دە ۆيرۋسپەن بەتپە-بەت جۇمىس ىستەگەن ەرىكتىلەرگە ۋنيۆەرسيتەت جاتاقحانادان ورىن بەرىپ, بارلىق قاۋىپسىزدىك شارالارىن قامتاماسىز ەتكەن ەكەن.
قازىر ءنۇريدىن №4 الماتى قالالىق ەمحانادا دارىگەر-تەراپەۆت بولىپ قىزمەت ەتەدى. پاندەميا كەزىندەگى پروۆيزورلىق ستاتسيونارداعى جۇمىسى بولاشاق دارىگەردى شيراتىپ, مول تاجىريبە جيناقتاعانى ءسوزسىز. كۇندەلىكتى 8 ساعات ۋاقىتىن ەمحانادا وتكىزەتىن جاس مامان بوستاندىق اۋدانىندا تۇراتىن 1700 ادامنىڭ دەنساۋلىعىنا جاۋاپتى.
ۆولونتەر بولۋ – ادەتتە ءبىر كۇندە پايدا بولاتىن كەنەتتەن كەلگەن شەشىم ەمەس, ول – ءومىر سالتى. قايىرىمدى ىسىمەن بەلگىلى بولعان جانداردىڭ بارلىعى تاريحىن ارىدەن باستايدى. تۋرا سول سەكىلدى بۇگىنگى كەيىپكەرىمىز دە ۋنيۆەرسيتەتكە ءتۇسىپ, الماتىعا كەلگەننەن باستاپ بۇل قىزمەتكە بەلسەندى ارالاسىپ كەتكەنىن ايتادى.
«ۋنيۆەرسيتەتكە تۇسكەننەن بەرى بەلسەندى ستۋدەنتتەر قاتارىندا بولىپ, ءتۇرلى جوبالاردى جۇزەگە اسىرۋعا اتسالىستىم. ولاردىڭ ىشىندە قايىرىمدىلىق ءىس-شارالار ەرەكشە ورىن الاتىن. قوعامداعى تۇرمىسى تومەن وتباسىلارعا, قارت ادامدارعا, مۇمكىندىگى شەكتەۋلى جاندارعا ءدارى-دارمەك, ازىق-ت ۇلىك تاراتىپ, ءۇي شارۋاسىنا قولعابىس ەتەتىنبىز. وتانى قاجەت ەتەتىن بالالاردىڭ ەمىنە قاراجات جيناپ, قايىرىمدى اكتسيالار مەن كونتسەرتتەر ۇيىمداستىردىق», دەيدى ن.تىلەۋبەك.
جاس دارىگەر جوعارى وقۋ ورنىندا جۇزەگە اسىرعان جوبالارى جايلى دا ەرەكشە ىقىلاسپەن ايتىپ بەردى. كوپتەگەن ستۋدەنتتىك ۇيىمدارعا جەتەكشىلىك ەتكەن ءنۇريدىن 2 جىل بويى ءوزى ءبىلىم العان وردادا جاستار ۇيىمدارى كوميتەتىن باسقارعان. جوبالارى ۋنيۆەرسيتەت دەڭگەيىنەن ءوسىپ, ۇكىمەتتىك ەمەس ۇيىمدارمەن, شەتەلدەگى ارىپتەستەرىمەن بايلانىس ورناتۋعا مۇمكىندىك بەرگەن. ءنۇريدىن 2017 جىلى ۆيچ/ سپيد پروفيلاكتيكاسى تاقىرىبىنا ارنالعان «Speak up AIDS» حالىقارالىق دەبات ءتۋرنيرىن ەرەكشە ماقتانىشپەن اتاپ ءوتتى. بولاشاق دارىگەرلەردىڭ وزەكتى ماسەلەلەردى كوتەرىپ, قوعامدىق جۇمىسقا بەلسەنە ارالاسقانى قۋانتادى.
جالپى, كەز كەلگەن جۇمىستى باستاعاندا جاقىندارىڭنىڭ, دوستارىڭنىڭ قولداۋى اسا ماڭىزدى. ءنۇريدىن اينالاسىندا ءوزى سەكىلدى جاڭا يدەيانى ءىلىپ الۋعا دايىن جانىپ تۇرعان جالىندى جاستاردىڭ كوپ ەكەنىن ايتادى.
«سەنى قولداپ, دەمەپ جىبەرەتىن دوستارىڭا كوپ نارسە بايلانىستى. سول كەزدە قۇرداستارىم مەنىمەن بارماعاندا, مۇمكىن بۇگىنگە دەيىن وسى ىسپەن اينالىسار ما ەدىم, بىلمەيمىن. ءبىز ورتاق قىزىعۋشىلىعىمىزدى تاپتىق. ودان بولەك پاندەميا كەزىندە قۇرىلعان ۆولونتەرلىك شتابقا جينالعان جاندار تۋرالى ساعاتتاپ ايتا الامىن. ەل باسىنا كۇن تۋعاندا كومەككە ستۋدەنتتەر, جۋرناليستەر, مۇعالىمدەر, وقۋشىلار, زەينەتكەرلەر دە كەلدى. بارلىعىمىز ءبىر جۇدىرىقتاي جۇمىس ىستەدىك», دەيدى ۆولونتەر.
قايىرىمدى ىستەردىڭ باسىندا جۇرگەن جاستار ءۇشىن بۇل – ۇلكەن ومىرلىك تاجىريبە ەكەنى بۇرىننان ايتىلىپ كەلەدى. مۇنىمەن ۆولونتەر جاستاردىڭ ءوزى دە تولىق كەلىسەدى. «بىرىنشىدەن, ۆولونتەرلىك ادامدى قايىرىمدى, وزگەلەرگە مەيىرىمدى بولۋعا ۇيرەتەدى. بۇل ىسپەن جىلدار بويى اينالىسۋ ارقىلى كوممۋنيكاتيۆتى داعدىلارىمدى دامىتتىم دەي الامىن. ول باسقا اداممەن ءتىل تابىسۋ, قيىن جاعدايداعى ادامدارمەن سويلەسۋ سەكىلدى مەنىڭ ماماندىعىم قاجەت ەتەتىن باستى قاسيەتتەر بولدى. قيىن جاعدايلار كوپ ەكەنى راس. مىسالى, پروۆيزورلىق ستاتسيوناردا, كارانتيندىك وبەكتىلەردە جۇمىس ىستەگەن كەزدە كوممۋنيكاتيۆتى داعدىلار دەگەن ساباقتان جيناعان ءبىلىمىمىزدى تاجىريبەدە پايدالاندىق», دەيدى ءنۇريدىن. ول سونداي-اق ماماندىعىنا كەرەك بۇرىن-سوڭدى بولماعان پتر-تەست جاساۋدى, زەرتتەۋدىڭ قالاي جۇرەتىنىن كورگەنىن باسا ايتتى. كەيىپكەرىمىز بولاشاق دارىگەرلەر ءۇشىن پاندەميا كەزىندەگى بۇل جۇمىس ۇلكەن مەكتەپ بولدى دەگەن پىكىردە.
دارىگەر سەكىلدى ابىرويلى ماماندىقتى ادال الىپ ءجۇرۋ – ۇلكەن مىندەت. ول ءۇشىن جاس ماماندارعا, ەڭ الدىمەن جۇمىسىنا دەگەن ماحاببات پەن سۇيىسپەنشىلىك كەرەك. بيىل عانا وقۋدى اياقتاپ, قىزمەتىنە كىرىسكەن ءنۇريدىن ءوز ماماندىعىن وزگەلەرگە كومەك كورسەتە الاتىنى ءۇشىن تاڭداعانىن ايتادى. ول العاشقى جۇمىس ورنى №4 قالالىق ەمحانادا ارىپتەستەرىنەن مول تاجىريبە جيناپ, ابىرويلى دارىگەر اتانۋعا ۇمتىلاتىنىن بىرنەشە قايتارا ايتتى.
ال پاندەميا كەزىندەگى جانكەشتى ەرلىگى ءۇشىن ءنۇريدىن تىلەۋبەك تۇڭعىش پرەزيدەنت – ەلباسى نۇرسۇلتان نازارباەۆتىڭ ماراپاتى مەن «حالىق العىسى» مەدالىنە يە بولدى. «توتەنشە جاعداي جاريالانعاندا جاعداي تۇراقسىز ەدى. وسىنداي قيىن كەزدە قايىرىمدى ىسپەن اتاق ءۇشىن ەمەس, شىن جۇرەكپەن اينالىستىق. بۇل ماراپاتتاردى ەڭبەگىمىزدىڭ جەمىسى دەپ بىلەمىن. بۇل مەن ءۇشىن ءارى قاراي توقتاماي جۇمىس ىستەۋگە يتەرمەلەيتىن ىنتالاندىرۋ دەۋگە بولادى», دەپ اعىنان جارىلدى جاس مامان.
ول ەلىمىزدەگى ۆولونتەرلىك قىزمەتتىڭ سوڭعى ەكى جىلدا قارقىندى دامىپ جاتقانىن اتاپ ءوتتى. «مەملەكەت قولداۋىمەن ۆولونتەرلىك ادىمداپ دامىپ كەلەدى. قانداي دا ءبىر ناتيجە تۋرالى ايتۋ ەرتە. دەگەنمەن جۇيەلى جۇمىس ءالى دە جەتىسپەي تۇر. ءبىزدىڭ سالادا ەمحانالاردىڭ, ۆولونتەر دارىگەرلەردىڭ بىرىڭعاي بازاسى قالىپتاسسا, جۇمىس قازىرگىدەن دە ءتيىمدى بولار ەدى. بارلىعى تاجىريبەگە كەلىپ تىرەلەتىنىن تۇسىنەمىن, قازىر ءبىز سونى جيناقتاپ جاتىرمىز. الداعى ۋاقىتتا ۆولونتەرلىك قوزعالىس ۇلكەن ءبىر قاۋىمداستىققا اينالاتىنىنا سەنىمدىمىن», دەيدى ن.تىلەۋبەك.
