ءوزىمىز كەزىندە گەولوكاتسيا قوسۋ, كەيبىر مەديافايلعا رۇقسات بەرۋ سياقتى تالاي ءموبيلدى قوسىمشاعا ەسىكتى اشىپ بەردىك. شەتەلدىك Clario كومپانياسى اقپاراتتىق قاۋىپسىزدىك سالاسى بويىنشا ءموبيلدى قوسىمشالارعا زەرتتەۋ جۇرگىزىپتى. زەرتتەۋ ناتيجەسىندە ءبىز پايدالاناتىن Facebook, Instagram قوسىمشاسى ءوز قولدانۋشىسى جايلى ەڭ كوپ اقپارات جينايدى ەكەن. ودان كەيىنگى ورىندا – Tinder قوسىمشاسى.
بۇل قوسىمشالار تەلەفون, پوشتا, گەولوكاتسيا, ءۇي ادرەسى, سالماعىڭىز, بويىڭىز, تۋىستارىڭىز, دوستارىڭىز, ءسىز قىزىقتىراتىن پوستتار, داۋىس حابارلامالارى – بارلىق قاجەتتى اقپاراتتى ءوزىنىڭ سەرۆەرلەرىنە ساقتاپ وتىرادى. مۇنىڭ ءبارىن نە ىستەيدى دەيسىز؟ بۇل اقپارات – ۇلكەن Big Data, كوپ اقشا. ادامداردىڭ قىزىعۋشىلىعىن بىلگەن كومپانيالار ءوزى نەمەسە وزگە كومپانيامەن كەلىسىپ, ءسىز ۇناتقان تاۋارلاردى, كوممەرتسيالىق ۇسىنىستاردى الدىڭىزعا شىعارا بەرەدى. وسىنداي قاجەتسىز جارنامالارعا جەم بولماۋ ءۇشىن پروگرامماعا رۇقسات بەرۋدىڭ الدىندا وزىڭىزگە نە كەرەگىن ءبىلىپ, سارالاپ العان ءجون.
Sophos كومپانياسىنىڭ ساراپشىلارى Apple Store جۇيەسىندە Fleeceware تيپىندەگى الاياقتىقپەن اينالىساتىن قوسىمشالاردىڭ بار ەكەنىن انىقتادى. Fleeceware قوسىمشالارىن جۇكتەگەندە قولدانۋشىعا بەلگىلى ءبىر سىناق مەرزىمىن بەلگىلەيدى. قولدانۋشى ءموبيلدى قوسىمشانى ءوز تەلەفونىندا وشىرگەنىمەن, جۇيەدە ساڭىلاۋلاردى تاۋىپ, پايدالانۋشىنىڭ شوتىنان اقشا شىعارىپ وتىرعان.
كەيبىر ءموبيلدى قوسىمشالار شپيوندىق قۇرىلعى ءتارىزدى تەلەفوندا ءسىز تەرگەن ماتىندەردى وزىنە ساقتاپ, ۇزاق ۋاقىت وتكەن سوڭ اقپاراتتى ءوز پايداسىنا اسىرۋى مۇمكىن. سوندىقتان رەسمي App Store, Play Market-تe جۇكتەلگەن ءموبيلدى قوسىمشالارعا دوسىڭداي سەنە بەرۋدىڭ قاجەتى جوق.
IBM كومپانياسىنىڭ ماماندارى وزدەرىنىڭ جىلدىق «Cost of a Data Breach Report» ەسەبىندە حاكەرلەردىڭ ءىس-ارەكەتىنەن 500 كومپانيا مەن ۇيىم دەرەكتەرىنىڭ جارياعا شىعىپ كەتۋىن زەرتتەدى. زەرتتەۋ ناتيجەسى بويىنشا ءار اقپاراتتىڭ قولدى بولۋى كومپانياعا شامامەن $3,86 ملن شىعىن كەلتىرگەنىن انىقتادى.
ححI عاسىردىڭ باستى بايلىعى اقپارات بولعاندىقتان, وزىڭىزگە جانە ءوزىڭىز ىستەپ جۇرگەن مەكەمەگە شىعىن كەلتىرمەۋ ءۇشىن ءموبيلدى قوسىمشالاردى جۇكتەر الدىندا زەردەلەپ العان ءجون.
عاسىر قۇرالباي ۇلى,
ءىت مامانى
