حاتتاما ونەركاسىپتىك مەنشىك وبەكتىلەرىن قورعاۋدىڭ ەۋرازيالىق تەتىگىن نىعايتۋعا جانە كەڭەيتۋگە, بارلىق قاتىسۋشىلاردىڭ اۋماعىندا قولدانىلاتىن بىرىڭعاي ەۋرازيالىق پاتەنت نەگىزىندە ونەركاسىپتىك ۇلگىلەردى قورعاۋدىڭ مەملەكەتارالىق جۇيەسىن قۇرۋعا جانە ساۋدا مەن ينۆەستيتسيالىق قىزمەتتى دامىتۋ ءۇشىن ولاردىڭ اۋماقتارىنىڭ تارتىمدىلىعىن ارتتىرۋعا مۇمكىندىك بەرەدى.
حاتتامادا ۋاعدالاسۋشى مەملەكەتتەردىڭ (قازاقستان, ءازىربايجان, قىرعىزستان, ارمەنيا, بەلارۋس, تاجىكستان, رەسەي, تۇرىكمەنستان) ونەركاسىپ مەنشىگى وبەكتىلەرىن قورعاۋ سالاسىنداعى 1994 جىلعى 9 قىركۇيەكتەگى ەۋرازيالىق پاتەنتتىك كونۆەنتسياداعى ەۋرازيالىق پاتەنتتىك ۇيىمنىڭ فۋنكتسيالارىن كەڭەيتۋ كوزدەلىپ وتىر.
"حاتتامانى راتيفيكاتسيالاۋ ناتيجەسىندە وتاندىق تاۋار وندىرۋشىلەردىڭ ونەركاسىپتىك ۇلگىدەگى پاتەنتىن ەۋرازيالىق پاتەنتتەۋ جۇيەسىنە قاتىسۋشى سەگىز مەملەكەتتە قولدانۋعا بولادى. ونەركاسىپتىك ۇلگىگە ەۋرازيالىق پاتەنتتىڭ قولدانىلۋ مەرزىمى 5 جىل, ول وسى پاتەنت يەسىنىڭ ءوتىنىشحاتى بويىنشا ءاربىر رەتتە تاعى بەس جىلعا ۇزارتىلۋى مۇمكىن. بۇل رەتتە مۇنداي پاتەنتتىڭ قولدانىلۋ مەرزىمى ونەركاسىپتىك ۇلگىگە ءوتىنىم بەرىلگەن كۇننەن باستاپ 25 جىلدان اسپاۋعا ءتيىس", - دەدى دەپۋتات ۆلاديمير ۆولكوۆ.
سەنات دەپۋتاتى سونداي-اق حالىقارالىق پاتەنتتەۋ كەزىندە ءاربىر مەملەكەتتە جەكەلەگەن وتىنىمدەر بەرۋ جانە باج سالىعىن تولەۋ قاجەتتىگى ەلەۋلى اكىمشىلىك كەدەرگى بولىپ تابىلاتىنىن اتاپ ءوتتى. سونىمەن قاتار, قازاقستاندىق ءوتىنىم بەرۋشىلەر ءۇشىن وڭىرلىك جۇيەنىڭ ارتىقشىلىعى سەگىز مەملەكەتتىڭ اۋماعىندا ونەركاسىپتىك ۇلگىلەرگە اۆتورلىق, باسىمدىق جانە ايرىقشا قۇقىق الۋ ءۇشىن ەۋرازيالىق پاتەنتتىك ۇيىمعا جۇگىنۋ مۇمكىندىگى بولىپ تابىلادى.
بىرىڭعاي ەۋرازيالىق پاتەنت پاتەنتتەۋگە جۇمسالاتىن شىعىندار مەن مەرزىمدەردى قىسقارتىپ قانا قويماي, نارىقتىق قاتىناستاردى ءتيىمدى دامىتۋعا جانە حالىقارالىق ەكونوميكالىق بايلانىستاردى نىعايتۋعا ىقپال ەتەتىن بولادى.
