كوميتەت توراعاسى مۇحتار قۇل-مۇحاممەد زاڭ جوباسىنىڭ نەگىزگى مىندەتى مەملەكەتتىك شەكارانى قورعاۋدىڭ قولدانىستاعى جۇيەسىنىڭ تيىمدىلىگى مەن ۇلتتىق قاۋىپسىزدىك ورگاندارىنىڭ فۋنكتسيونالدىق مۇمكىندىكتەرىن ارتتىرۋ ەكەنىن ايتتى.
پارلامەنت دەپۋتاتتارىنىڭ باستاماسىمەن ازىرلەنگەن زاڭ جوباسى بويىنشا سەناتور نۇرجان نۇرسيپاتوۆ ارىپتەستەرىنىڭ اتىنان بايانداما جاسادى. ول ءبىر كودەكسكە جانە جيىرما بەس زاڭعا تۇزەتۋلەر ەنگىزۋ ۇسىنىلىپ وتىرعانىن ايتتى.
"شەكارا قىزمەتىنىڭ اسكەري باسقارۋ ورگاندارىنىڭ قۇرىلىمى تۇبەگەيلى جاڭارتىلدى. ەگەر بۇرىن اسكەري سيپاتى باسىم بولسا, ەندى ونى اۋماقتىق ۇلتتىق قاۋىپسىزدىك ورگاندارىمەن تىعىز كىرىكتىرۋ كوزدەلىپ وتىر", - دەدى سەناتور نۇرجان نۇرسيپاتوۆ.
سەنات دەپۋتاتى سەرگەي ەرشوۆ قوسىمشا بايانداما جاسادى. ونىڭ پىكىرىنشە, زاڭ جوباسىن قابىلداۋ ۇلتتىق قاۋىپسىزدىك ورگاندارىنىڭ باسقارۋ قىزمەتىن وڭتايلاندىرۋعا, سونداي-اق ينفراقۇرىلىمدى دامىتۋ مەن ارنايى تەحنيكالىق قۇرالداردى پايدالانۋ ارقىلى مەملەكەتتىك شەكارانى قورعاۋ جانە كۇزەتۋ جۇيەسىن جەتىلدىرۋگە مۇمكىندىك بەرەدى.
دەپۋتاتتار زاڭ جوباسىن ءبىراۋىزدان قولداپ, ونى پالاتانىڭ قاراۋىنا ەنگىزۋدى ۇسىندى.
سەناتورلار ۇقك توراعاسىنىڭ ورىنباسارى دارحان دىلمانوۆپەن جانە يندۋستريا جانە ينفراقۇرىلىمدىق دامۋ ءمينيسترىنىڭ ورىنباسارى بەرىك كاماليەۆپەن شەكارالىق وتكىزۋ پۋنكتتەرىن دامىتۋ مەن جاڭعىرتۋ ماسەلەلەرىن تالقىلادى.
سەناتورلارعا جالپى شەكارادا 51 اۆتوموبيل وتكىزۋ بەكەتى بار ەكەنى, قازاقستان-رەسەي مەملەكەتتىك شەكاراسىندا ورنالاسقان ولاردىڭ 27-ءسى قايتا جاڭارتۋدى تالاپ ەتەتىنى ايتىلدى. بۇل بەكەتتەردى 2025 جىلعا دەيىن 5 كەزەڭدە جاڭعىرتۋ ۇسىنىلىپ وتىر.
سەناتورلار سالالىق مەملەكەتتىك ورگانداردىڭ وكىلدەرىنە قاشان كولىك كەپتەلىسىنىڭ ازاياتىنى, ترانزيت الەۋەتىنىڭ ۇلعاياتىنى جانە شەكارادا قولايلى جاعدايلار جاسالاتىنى تۋرالى قازاقستاندىقتاردى تولعاندىرىپ وتىرعان سۇراقتاردى قويدى.
وتىرىس قورىتىندىسى بويىنشا سەنات دەپۋتاتتارى شەكارا زاستاۆالارىنىڭ ماتەريالدىق-تەحنيكالىق بولىگىن جاقسارتۋ جونىندە ۇسىنىمدار توپتاماسىن ازىرلەدى. وسى ۇسىنىستاردىڭ بارلىعى سالالىق مەملەكەتتىك ورگاندار مەن ۇلتتىق قاۋىپسىزدىك ورگانىنا جىبەرىلەتىن بولادى.
