«مۇنداي اكتسيانى وتكىزۋدىڭ ماڭىزى زور. ول تۋبەركۋلەزدى دەر كەزىندە انىقتاۋ جانە قاجەتتى ەم تاعايىنداۋ بويىنشا جۇمىستى قايتا باستاۋعا مۇمكىندىك بەردى. العاشقى 10 كۇننىڭ ىشىندە قالانىڭ 1 300-دەن استام تۇرعىنى فليۋوروگرافيالىق تەكسەرۋدەن تەگىن ءوتتى. قالادا بۇرىن تۋىنداعان كۇردەلى ەپيدەميولوگيالىق جاعدايعا بايلانىستى تۋبەركۋلەزدى ەرتە انىقتاۋ بويىنشا جۇمىس ءبىرشاما السىرەدى. «ستوپ تۋبەركۋلەز» ايلىعى اياسىندا اۋرۋدى جۇقتىرۋعا جول بەرمەۋ ماقساتىندا بەلگىلى تۇرعىلىقتى جەرى جوق ادامدارعا تەكسەرۋ جۇرگىزۋگە مۇمكىندىك بار», - دەيدى دەنساۋلىق ساقتاۋ باسقارماسى باسشىسىنىڭ ورىنباسارى ءاليا رۇستەموۆا.
جىلجىمالى تسيفرلى فليۋوروگرافيا قوندىرعىلارى بازارلاردا, ساۋدا ورتالىقتارىندا, قالانىڭ تۇرعىن ءۇي الاپتارىندا دا ورناتىلدى. تەكسەرۋ «ارتەم», «الەم», «جاننۋر», «دجافار», «استىقجان» (بەيسەكوۆا ك-ءسى) ساۋدا ۇيلەرىنىڭ; «ەۆرازيا» ساۋدا ءۇيىنىڭ, ورتالىق بازاردىڭ اۋماقتارىندا جۇرگىزىلدى. پرومىشلەننىي, پريگورودنىي, ءوندىرىس, كوكتال ەلدى مەكەندەرى تۇرعىندارى دا تەگىن تەكسەرۋدەن ءوتتى.
بۇدان باسقا, پوليتسيا دەپارتامەنتىنىڭ قولداۋىمەن فليۋوروگرافيالىق تەكسەرۋ تۇراقتى تۇراتىن جەرى جوق ادامدارعا جۇرگىزىلەدى. ماماندار كەڭەس بەرۋ كومەگىن, سونىڭ ىشىندە تاۋەكەل توبىنداعى ادامدارعا قاشىقتان كومەك كورسەتەدى.
«مۇنداي پروفيلاكتيكالىق تەكسەرۋلەر اۋرۋدىڭ ەرتە دياگنوزىن قويۋعا ىقپال ەتەدى جانە تۋبەركۋلەزدىڭ بەلسەندى انىقتالۋىن ارتتىرادى. تەكسەرۋ الدىن الۋ ماسەلەلەرى بويىنشا سانيتارلىق – اعارتۋ جۇمىستارىمەن قاتار جۇرەدى», - دەيدى ەلوردانىڭ باس فتيزياترى اننا تسەپكە.
سونىمەن قاتار اۋماقتىق بمسك مەديتسينا قىزمەتكەرلەرىمەن «سانات الەمي» ۇەۇ قاتىسۋىمەن تۋبەركۋلەزدىڭ الدىن الۋ, ەرتە انىقتاۋ, العاشقى بەلگىلەرى بويىنشا جۇمىستار جۇرگىزىلدى.
ەستەرىڭىزگە سالا كەتەيىك, قالا اكىمدىگىنىڭ قولداۋىمەن ۇيىمداستىرىلعان «ستوپ تۋبەركۋلەز!» شاراسى ەلوردادا 23 قازاندا باستالدى.
