قالانىڭ مەملەكەتتىك اكتيۆتەر باسقارماسىنىڭ باسشىسى رۇستەم اليەۆ وڭىرلىك كوممۋنيكاتسيالار قىزمەتىنىڭ الاڭىندا وتكەن ونلاين بريفينگتە الماتى اكىمىنىڭ يەسىز جەلىلەردى قالا بالانسىنا بەرۋ تاپسىرماسى قالاي جۇزەگە اسىرىلىپ جاتقانى تۋرالى باياندادى.
وسى ماقساتتا بيىل «الاتاۋ جارىق كومپانياسى» اق-دا ەلەكتر جەلىلەرى مەن جابدىقتارىنىڭ 117 نىسانىن بەرۋ ءراسىمى جۇرگىزىلدى. 2019 جىلى «اجك» اق-نا ەلەكتر جەلىلەرى مەن جابدىقتارىنىڭ 544 نىسانى تاپسىرىلدى. بارلىعى ەكى جىلدا 661 نىسان ءوتتى.
«بۇل شارالار قالا تۇرعىندارىنا ساپالى كوممۋنالدىق قىزمەتتەردى الۋعا, تاريفتەردىڭ تومەندەۋىنە جانە جالپىقالالىق تاريفتەرمەن تەڭەستىرىلۋىنە الىپ كەلەدى», دەدى ر.اليەۆ.
سونىمەن قاتار يەسىز جەلىلەردى قالا بالانسىنا بەرۋ كوممۋنالدىق قىزمەتتەرگە توتەنشە جاعدايلاردا جەدەل ارەكەت ەتۋگە مۇمكىندىك بەرەدى. ويتكەنى بۇل – تىرشىلىكتى قامتاماسىز ەتۋ نىساندارىنداعى كوممۋنالدىق اپاتتاردىڭ باستى سەبەپتەرىنىڭ ءبىرى.
ينجەنەرلىك جەلىلەردى يەسىز دەپ تانۋ ءراسىمى ازاماتتىق كودەكستىڭ 242-بابىنا سايكەس جۇزەگە اسىرىلادى. اتاپ ايتقاندا اۋداندىق اكىمدىكتەر تۇرعىنداردىڭ وتىنىشتەرىن جينايدى, ەنەرگيا تيىمدىلىگى جانە ينفراقۇرىلىمدىق دامۋ باسقارماسى مەن كوممۋنالدىق قىزمەتتەردى جەتكىزۋشىلەرمەن بىرلەسىپ, قايتالانۋدى بولدىرماۋ ماقساتىندا يەسىز نىسانداردىڭ تىزبەسى دايىندالادى. بۇدان ءارى يەسىز نىساندار تىزبەسى مەملەكەتتىك اكتيۆتەر باسقارماسىنا جىبەرىلىپ, باسقارما ءوز كەزەگىندە نىسانداردى يەسىز دەپ تانۋ ءراسىمىن باستايدى.
الماتى
