ارادا ءۇش جىل وتسە دە شاحاندىقتار ءالى كۇنگە دەيىن جىلۋعا جارىماي وتىر. البەتتە, جەرگىلىكتى بيلىك قول قۋسىرىپ قاراپ وتىر دەۋدەن اۋلاقپىز. بۇل باعىتتا العا ءبىرشاما جىلجۋ بار. مىسالى, قازىر شاحان كەنتىندە ورتالىقتاندىرىلعان جىلۋ قازاندىعىنىڭ قۇرىلىسى قارقىندى ءجۇرىپ جاتىر. مۇندا قۇرامى 50 جۇمىسشىدان تۇراتىن بريگادا كۇن-ءتۇن دەمەي جۇمىس ىستەۋدە. «وڭىرلەردى دامىتۋ» باعدارلاماسى بويىنشا باستالعان قازاندىق قۇرىلىسىن كەلەسى جىلى اياقتاپ, پايدالانۋعا بەرۋ جوسپارلانعان.
جىلۋ قازاندىعى قۇرىلىسىمەن اينالىسۋشى مەردىگەر كومپانياسىنىڭ باسشىسى ءامىر داۋلەتاليەۆ نىساننىڭ زاماناۋي, ەنەرگيالىق تيىمدىلىگى جوعارى تەحنولوگيا بويىنشا سالىنىپ جاتقانىن ايتتى. ياعني بۇل جوبا كومىردىڭ كەز كەلگەن ءتۇرىن پايدالانۋعا مۇمكىندىك بەرەدى.
– جاڭا نىساندا ءۇش قازاندىق بار. قازىر ءبىز عيماراتتىڭ توبەسىن جابۋدى اياقتاپ قالدىق. الداعى اپتادا قاجەتتى جابدىقتاردى ورناتا باستايمىز. كەلەسى جىلى جىلۋ تراسساسىن تارتىپ, نىساننىڭ اينالاسىن اباتتاندىرۋدى قولعا الامىز, – دەيدى قۇرىلىس كومپانياسىنىڭ باس ديرەكتورى.
ماماننىڭ ايتۋىنشا, قازاندىقتىڭ قۋاتى بۇكىل اۋىلعا 35 گيگاكالوريا بەرۋگە قاۋقارلى بولادى. ءتىپتى بولاشاقتا كەنتتە جاڭا ۇيلەر سالىنسا, ولاردى دا جىلۋمەن تولىققاندى قامتاماسىز ەتۋگە مۇمكىندىك تۋادى.
اتالعان كەنتتە جىلۋ ماسەلەسىنەن باسقا دا پروبلەمالار باستان اسادى. ماسەلەن, 8 مىڭنان اسا تۇرعىنى بار ەلدى مەكەندە قاڭىراپ بوس تۇرعان عيماراتتار از ەمەس. ەگەر ءىستىڭ قيۋىن تابار ۇيىمداستىرۋشى ادام بولسا, مۇنىڭ ءبارىن ىسكە جاراتۋشى ەدى. «بوس تۇرعان عيماراتتاردى جوندەپ, ولارعا بالاباقشالار مەن ءبىلىم بەرۋ مەكەمەلەرىن ورنالاستىرسا» دەگەن تىلەك ايتادى جەرگىلىكتى تۇرعىندار. ەلدى مەكەندەگى كارىز جۇيەلەرى دە ەسكىرگەن, ايىرباستاۋدى قاجەت ەتەدى.
كەنتتە اۋىل تۇرعىندارى ءۇشىن قىستا سپورتپەن اينالىساتىن نىسان اتىمەن جوق. مۇنىڭ ءوزى اۋىل جاستارىنىڭ كەشكە تامان بوس سەندەلىپ جۇرۋىنە اكەپ سوقتىرادى. قازىر جەرگىلىكتى پوليتسيا بولىمىندە باسشى دا تابىلماي تۇر. بۇل جاعداي قىلمىس دەڭگەيىنىڭ وسۋىنە تىكەلەي اسەر ەتۋى مۇمكىن.
سول سەكىلدى شاحانداعى باستى پروبلەمانىڭ ءبىرى – جەكە سەكتورداعى ينتەرنەتتىڭ السىزدىگى. وسىنىڭ سالدارىنان بالالار ونلاين رەجىمىندەگى وقۋ بارىسىندا قيىندىقتارعا تاپ بولىپ ءجۇر.
بۇگىندە شاحان كەنتىنىڭ ماسەلەسى – وبلىس باسشىلىعىنىڭ تىكەلەي نازارىندا. الداعى ۋاقىتتا ەلدى مەكەننىڭ بارلىق پروبلەماسى ەسكەرىلىپ, ولاردى شەشۋدىڭ ءتيىمدى جولدارى قاراستىرىلماق.
قاراعاندى وبلىسى
