ءان بار – ءانشى بار. ءانشىنىڭ شەبەرلىگى – ءاندى حالىقتىڭ جۇرەگىنە ۇيالاتاتىنداي ەتىپ ورىنداۋىنا بايلانىستى ەكەندىگى داۋسىز اكسيوما. ەندەشە, عاريفوللانىڭ كەمەلىنە كەلتىرە ورىنداعان «اينامكوز», «ۇلكەن ايداي», «اق كەربەز», «ىسمەت», «بوز جورعا», «ون التى قىز» ت.ب. حالىق اندەرىنىڭ ورىنداۋ ءستيلى بۇزىلماي بۇگىنگى كۇنگە جەتكەندىگى وسى عارەكەڭنىڭ ارقاسى ەمەس پە؟!
قازاق ونەرىنىڭ تاريحىندا ە.برۋسيلوۆسكيدىڭ «ەر تارعىن», «ايمان – شولپان», «قىز جىبەك», م.تولەباەۆتىڭ ء«بىرجان – سارا», ا.جۇبانوۆ پەن ل.ءحاميديدىڭ «اباي» وپەرالارىندا كۇردەلى پارتيالاردى العاش رەت شىرقاعان دا وسى عارەكەڭ.
عاريفوللانىڭ انشىلىك ورىنداۋ شەبەرلىگىن قايتالاۋعا بولاتىن شىعار, بىراق اسىپ ءتۇسۋ مۇمكىن ەمەس دەگەن ويدامىن. ونىڭ ورىنداعان اندەرىنەن ناعىز قازاقتىڭ بولمىس-ءبىتىمىن كورۋگە بولادى. ءان ورىنداعاندا داۋسى الاتاۋدىڭ بيىك شىڭىنان اسىپ شەكسىزدىككە ءسىڭىپ جاتقانداي سەزىمگە بولەنەسىز. كوز الدىڭا قازاق حالقىنا ءتان بۋىرقانعان داۋىلدى تەڭىز, جۇلقىنا شاپقان ات, جايىلعان شەكسىز سارى دالادا تولقىعان اق سەلەۋ مەن اڭقىعان جۋسان ءيىسى ەلەستەپ, ەرىكسىز سەزىم تۋدىرادى. سىڭسۋ جوق, قۇلشىنعان قايرات پەن الىپ كۇش بايقالادى.
زامانىمىزدىڭ كورنەكتى مۋزىكا مامانى, كومپوزيتور نۇرعيسا تىلەنديەۆ ءوزىنىڭ ءبىر ەستەلىگىندە عاريفوللانىڭ اۋزىنان ەستىگەن: «مەن ءاندى مۇحيتتىڭ نەمەرەسى شايقىنىڭ اتىنا مىنگەسىپ ءجۇرىپ, ءدال وزىنەن ۇيرەندىم» دەگەنىن ايتادى. دەمەك, عاريفوللا ءانشى مۇحيتتىڭ ونەرىن ءدال باستاۋ-بۇلاعىنان ۇيرەنىپ, بۇگىنگى ۇرپاققا جالعاستىراتىن انشىلەر توبىن تاربيەلەپ,ءىزبا-سارلارىن دايىنداپ كەتكەنى.
ءانشىنىڭ ءتول شاكىرتتەرىنىڭ ءبىرى ءبورىباي كارتەن العاش رەت اقتوبە وبلىسىنىڭ مارتوك اۋدانىندا قامبار مەدەتوۆ اتىنداعى ونەر مەكتەبىنىڭ قابىرعاسىندا ءداستۇرلى انشىلەر سىنىبىن اشىپ, ءانشى مۇراسىن جالعاستىرسا, ءداستۇرلى انشىلەر ساۋلە جانپەيىسوۆا, ايگۇل قوسانوۆا ت.ب. ساحنا تورىندە عاريفوللانىڭ انشىلىك ونەرىن دامىتۋدا. مىنە, سول سەبەپتى ماقالا اۆتورى كورسەتكەندەي ۇلىلاردى ۇلىقتاۋمەن اينالىساتىن ءتيىستى مەكەمەلەر مەن جاۋاپتى ادامدار گازەتتە كوتەرىلگەن ۇسىنىستاردى ەسكەرىپ, ءتىزىمدى تولىقتىرىپ, حالىق پىكىرىنە دە قۇلاق اسىپ وتىرسا دەيمىز.
جاقسات قارلىعاشوۆ,
ولكەتانۋشى
