«Hi-Tech» رەسپۋبليكالىق جەدەل-پروفيلاكتيكالىق ءىس-شاراسىنىڭ ماقساتى – ينتەرنەت ارقىلى جاسالاتىن قىلمىستارمەن كۇرەسۋ. سونىڭ ناتيجەسىندە كيبەرقىلمىستاردى اشۋ جونىندەگى مامانداندىرىلعان جەدەل-تەرگەۋ توبىنىڭ جۇمىسى كۇشەيتىلدى. وسىنىڭ ناتيجەسىندە بۇرىن جاسالعان التى ينتەرنەت-الاياقتىق اشىلدى. ءۇش كۇدىكتىنى ۇستاۋ ءۇشىن كريمينالدىق پوليتسيا قىزمەتكەرلەرى نۇر-سۇلتان, ەكىباستۇز جانە پاۆلودار قالالارىنا باردى. بەلگىلى ءبىر قاراجات سوماسىنا قاجەتتى قۇجاتتاردى جىلدام الۋعا كومەكتەسەتىنى تۋرالى حابارلاندىرۋ ورنالاستىرعان ەلوردا تۇرعىنى ۇستالدى. ماسەلەنى وڭاي جولمەن شەشپەكشى بولعان ول پەتروپاۆلدىق جىگىتتەن 77 مىڭ تەڭگەنى قاقشىپ كەتكەن. اشىقاۋىز پەتروپاۆلدىق ماسەلەسىن شەشەمىن دەگەن الاياققا 77 مىڭ تەڭگەنى اۋدارا سالعان. اقشانى قولىنا تۇسىرگەن سوڭ «قىزمەت كورسەتۋشى» زىم-زيا بولىپ, تۇتقانى كوتەرمەي قويعان. «سوڭعى كەزدە ۆيرتۋالدى الاياقتار ءتۇرلى ادىستەردى پايدالانادى. ولاردىڭ ماقساتى – ادامداردىڭ جەكە مالىمەتتەرى مەن بانك دەرەكتەمەلەرىنە قول جەتكىزۋ. قولعا تۇسكەن اقپارات ارقىلى قاسكويلەر جابىرلەنۋشىلەردىڭ اتىنا نەسيە رەسىمدەيدى. سونداي-اق ءتۇرلى «قىزمەتتەر» ۇسىنىپ, جابىرلەنۋشىنىڭ اقشاسىن الداپ الىپ كەتەدى. جەدەل-پروفيلاكتيكالىق ءىس-شارانىڭ العاشقى كۇنىندە جۇمىسقا ورنالاسۋعا كومەك كورسەتەمىن دەپ الاياقتار مەديتسينالىق انىقتامانى جىلدام رەسىمدەۋگە اقشا سۇراعان, سونىمەن بىرگە بانك كارتاسىنىڭ دەرەكتەمەلەرىن الداپ قولعا تۇسىرگەن. وسىنداي ءۇش فاكتى انىقتالدى», - دەپ اتاپ ءوتتى وبلىستىق پوليتسيا دەپارتامەنتى كريمينالدىق پوليتسيا باسقارماسىنىڭ باستىعى, پوليتسيا پولكوۆنيگى پەتر كليموۆ.
سونىمەن بىرگە جەدەل-پروفيلاكتيكالىق ءىس-شارانىڭ العاشقى كۇنىندە وبلىس پوليتسەيلەرى تاۋارلاردى ساتۋ تۋرالى 2 جالعان حابارلاندىرۋدى انىقتادى. قۇقىققا قايشى كونتەنتپەن 30-دان استام رەسۋرس انىقتالىپ, سىلتەمەلەرى قۇزىرەتتى ورگاندارعا بۇعاتتاۋ ءۇشىن جىبەرىلدى. الەۋمەتتىك جەلىلەردە ءتارتىپ ساقشىلارى ينتەرنەتتە كۇماندى كەلىسىم جاساۋدان اۋلاق بولۋ, جەكە جانە قارجى مالىمەتتەرىن, قۇپياسوزدەردى ەشكىمگە بەرمەۋ, اقشانى جىبەرۋگە قاتىستى كەز-كەلگەن مالىمەتتى ەگجەي-تەگجەيلى تەكسەرۋ سياقتى كەڭەستەرى بار جادىنامالاردى ورنالاستىردى.
سولتۇستىك قازاقستان وبلىسى
