ورتالىقتى الداعى ۋاقىتتا ماگنيتتى تەراپيا جانە باسقا دا مەديتسينالىق اپپاراتتارمەن تولىقتىرۋ جوسپارلانعان. ەمحانا بازاسىندا سونىمەن قاتار ۆيرۋسولوگيالىق زەرتحانا ۇزدىكسىز جۇمىس ىستەيدى. مۇندا ءوڭىردىڭ وتىرار, بايدىبەك, سوزاق اۋداندارى مەن كەنتاۋ, تۇركىستان قالالارىنداعى ەمدەۋ مەكەمەلەرىنەن الىنعان پتر سىنامالارىنا تالداۋ جاسالادى. ناتيجەلەرى ورتالىقتاندىرىلعان جۇيە ارقىلى ازاماتتاردىڭ جەكە مالىمەتىنە ەنگىزىلەدى.
«كوروناۆيرۋس ينفەكتسياسىنىڭ ىقتيمال ەكىنشى تولقىنى باستالعان جاعدايدا ەمحانالاردىڭ قىزمەتى قالىپتى جاعدايدا جالعاسا بەرەدى. سانيتارلىق تالاپتاردى قاتاڭ ساقتاي وتىرىپ, دارىگەرلەر تۇرعىنداردى الدىن الا جازىلۋ بويىنشا قابىلدايدى. ال COVID-19 بەلگىلەرى بار ناۋقاستار بولەك ەسىك ارقىلى سۇزگى بولىمىنە كىرگىزىلىپ, جەكە كابينەتتە تەكسەرىلەدى. ۆيرۋس انىقتالعان جاعدايدا امبۋلاتوريالىق باقىلاۋ جانە ەمدەۋ جۇرگىزىلەدى. وبلىستاعى بارلىق مەديتسينالىق ۇيىمدا ىندەتپەن كۇرەس جۇمىستارى بارىنشا كۇشەيتىلگەن», دەيدى تۇركىستان قالالىق ەمحاناسىنىڭ باس دارىگەرى رايىمبەك تاسىرباەۆ.
كوروناۆيرۋس ينفەكتسياسىنىڭ ءبىرىنشى تولقىنىندا اۋرۋحانادا 300-دەن اسا قىزمەتكەر جۇمىلدىرىلعان بولاتىن. ەمدەۋ مەكەمەسىندە 320 توسەكتىك ورىن پروۆيزورلىق ستاتسيونار قاراستىرىلعان. قوسىمشا 50 ورىندىق ينفەكتسيالىق ءبولىم اشۋ جوسپارلانعان. اۋرۋحانا 81 وتتەگى تاراتۋ كوزى, 16 وكپەنى جاساندى تىنىستاندىرۋ اپپاراتى, 70 وتتەگى كونتسەنتراتورى مەن 70 پۋلسوكسيمەترمەن تولىققان. ستاتسيونارلىق وتتەگى ستانساسى ورناتىلىپ, 2 ايلىق ءدارى-دارمەك قورى جانە دەزينفەكتسيالىق زاتتارمەن, جەكە قورعانىش كيىمدەرىمەن قامتاماسىز ەتىلگەن.
جالپى, بۇگىندە وبلىس ورتالىعىنداعى مەديتسينالىق مەكەمەلەر زاماناۋي قوندىرعىلارمەن جابدىقتالىپ, حالىققا قىزمەت كورسەتۋ ساپاسى جاقسارا تۇسكەن. مىسالى, تۇركىستان قالالىق بالالار اۋرۋحاناسىندا جىل باسىنان بەرى 800-گە جۋىق وتا ءساتتى جاسالدى. بۇعان دەيىن كۇردەلى وتا جاساتۋ ءۇشىن بالالارعا باسقا ءىرى قالالارداعى مەديتسينالىق ۇيىمدارعا جولداما بەرىلىپ كەلگەن. ەمدەۋ مەكەمەسىندەگى ماتەريالدىق-تەحنيكالىق بازانىڭ جاقسارتىلۋى مەن قىزمەتكەرلەرىنىڭ ارنايى كاسىبي بىلىكتىلىك ارتتىرۋىنان وتانىڭ اۋىر تۇرلەرى اۋرۋحانا قابىرعاسىندا جاسالۋدا. مۇندا جاقىن ورنالاسقان كەنتاۋ قالاسى مەن وتىرار, بايدىبەك اۋداندارىنىڭ تۇرعىندارى دا ەم قابىلدايدى. وسىدان 5 جىل بۇرىن قابىرعاسى قالانعان 214 ورىندىق اۋرۋحانا بازاسى زاماناۋي كومپيۋتەرلىك توموگرافيا, تسيفرلى رەنتگەن, ۋلترادىبىستىق زەرتتەۋ اپپاراتتارىمەن تولىق قامتاماسىز ەتىلگەن.
«ەمدەۋ مەكەمەسىنىڭ ساعاتىنا 8 تەكشە مەتر وتتەگى شىعاراتىن جەكە وتتەگى ستانساسى بار. قالالىق بالالار اۋرۋحاناسىنا ونىڭ 1 تەكشە مەترىنىڭ ءوزى جەتكىلىكتى. ارتىعىمەن وندىرىلەتىن بولعاندىقتان, باسقا اۋرۋحانالارعا تاراتۋعا مۇمكىندىگىمىز بار. قوسىمشا 19 وتتەگى كونتسەنتراتورى ورناتىلعان», دەيدى قالالىق اۋرۋحانانىڭ باس دارىگەرى ابدىشۇكىر ەگىزباەۆ.
اۋرۋحانادا حيرۋرگيا, نەۆرولوگيا, جۇرەك اۋرۋلارىن ەمدەۋ سىندى 12 بولىمشە بار. بارلىعى دا قاجەتتى ءدارى-دارمەك جانە مەديتسينالىق قۇرال-جابدىقتارمەن قامتىلعان. بىلىكتى دارىگەرلەر قۇرامى قازىر 200-گە جۋىق بالاعا ەمدىك قىزمەت كورسەتۋدە.
وڭىردە سونداي-اق COVID-19 ينفەكتسياسىن انىقتاۋعا بەيىمدەلگەن زەرتحانالاردا قوسىمشا جاڭا BIO-rad اپپاراتى ىسكە قوسىلىپ, ارقايسىسىندا سىناما الۋ قاۋقارلىعى 500-گە جەتتى. وسىلايشا, وبلىس اۋماعىنداعى بارلىق زەرتحانانىڭ تاۋلىگىنە 5 مىڭ سىناما الۋ مۇمكىندىگى بار. وڭىردە 10 زەرتحانا جۇمىس ىستەيدى.
وبلىستىق قوعامدىق دەنساۋلىق ساقتاۋ باسقارماسىنىڭ باسشىسى مارات پاشيموۆتىڭ ايتۋىنشا, كوروناۆيرۋس ينفەكتسياسىنىڭ ىقتيمال بەلەڭ الۋ جاعدايلارى ەسكەرىلە وتىرىپ, مەديتسينالىق ۇيىمداردا 6 مىڭنان اسا ورىنمەن قامتۋ قاراستىرىلعان. كورشى ەلدەرمەن شەكارالاس سارىاعاش پەن ماقتاارال اۋداندارىندا 100 كارانتيندىك ستاتسيونارلىق ورىندار دايىن.
