جىل باسىنان بەرى وبلىستا 547 ءورت تىركەلىپ, ونىڭ ىشىندە 43 ادام قازا تاپقان. كەلتىرىلگەن ماتەريالدىق زالالدىڭ كولەمى 116 ملن تەڭگە. بۇل بىلتىرعىمەن سالىستىرعاندا شامامەن ەكى ەسەگە ارتىق.
وسى ءورتتىڭ 75%-ى جەكەمەنشىك تۇرعىن ۇيلەر سەكتورىندا بولعان. قازا تاپقانداردىڭ دا 41 ادامى وسى سەكتوردىڭ ۇلەسىندە. ناقتى ايتساق, 8 ورتتە 20 ادام قازا تاپقان. ونىڭ ىشىندە 14 ادام (70%) ماس كۇيىندە قازا بولعان. ماسەلەن, بيىلعى قاڭتاردا پەتروپاۆلداعى «جۇمىسشىلار كەنتىندەگى» جەكە ۇيدە بولعان ءورت سالدارىنان 1991 جىلى تۋعان ايەل جانە 2016 جانە 2018 جىلدارى تۋعان ونىڭ ەكى ۇلى قايتىس بولدى. ءورت ەلەكتر سىمدارىنىڭ قىسقا تۇيىقتالۋىنان شىققان.
2020 جىلعى 7 تامىزدا دا وسى كەنتتەگى جەكە ۇيدە بولعان ءورت سالدارىنان 1988 جىلى تۋعان ءۇيدىڭ يەسى جانە ونىڭ 2011 جانە 2015 جىلدارى تۋعان ونىڭ ەكى بالاسى قازا تاپتى. ءورت سالدارىنان شاتىر, ءۇيدىڭ ىشكى قاپتاماسى, م ۇلىكتەر مەن شارۋاشىلىق قۇرىلىسى تولىعىمەن جانىپ كەتتى. ءتىپتى كورشى ءۇيدىڭ قابىرعاسى زاقىمدالدى. ءورتتىڭ جالپى اۋماعى 141 شارشى مەتردى قۇرادى. بۇل ءورت – تەمەكى شەككەندەگى ابايسىزدىقتان بولعانى انىقتالدى. وسى تامىز ايىندا يلينكا سەلوسىندا جەكە تۇرعىن ۇيدە بولعان ءورتتىڭ سالدارىنان 1969 جىلى تۋعان ەرلى-زايىپتى مەن ولاردىڭ 1992 جىلى تۋعان ۇلى جانە نەمەرەلەرى اجال قۇشتى. بۇل جولى دا ءورت تەمەكىدەن تۇتانعان.
سول كۇنى ايىرتاۋ اۋدانى ايىرتاۋ سەلوسىنىڭ ماڭىنداعى كارەردەگى جىلجىمالى تۇرعىن ۆاگوندا بولعان ورتتەن «كوكشە-بۋر» جشس جۇمىسشى-بۇرعىلاۋشىسى, 1960 جىلى تۋعان ازامات قۇربان بولدى.
بولعان ورتتەردىڭ نەگىزگى سەبەبى – جىلىتۋ پەشتەرىن پايدالانۋ كەزىندە ءورت قاۋىپسىزدىگىن ساقتاماۋ. سونىمەن قاتار قايتىس بولعان ەرەسەكتەردىڭ ءبارى ماس كۇيىندە بولعانىن اتاپ ءوتۋ كەرەك. دەمەك, ماس بولىپ وت تۇتاتۋ ادام ومىرىنە ايرىقشا قاۋىپتى ەكەنىن ارقاشان ەسكەرگەن ءجون.
سونداي-اق وبلىستا ۋلى گازبەن ۋلانۋ سالدارىنان زارداپ شەككەندەر دە كوپ. 2019 جىلى وسى سەبەپپەن 27 ادام زارداپ شەگىپ, ءبىر ادام قايتىس بولدى. اعىمداعى جىلى 4 ادام جاراقات العان جانە تاعى تورتەۋى (ونىڭ ىشىندە 1 بالا) قايتىس بولدى.
ء بىر توپ ادامنىڭ قازا بولۋى 2020 جىلعى 25 قازاندا قىزىلجار اۋدانىنىڭ پەتەرفەلد سەلوسىندا تىركەلدى. وندا 1959 جانە 1963 جىلى تۋعان ەرلى-زايىپتىلار كومىرتەگى توتىعىمەن ۋلانعان.
رەسپۋبليكالىق رەيتينگ بويىنشا ءبىزدىڭ وبلىس ءورت سانى جاعىنان تومەن بولعانىمەن ادام ءولىمى بويىنشا ەكىنشى ورىندا تۇر. كوڭىل كونشىتپەيتىن ستاتيستيكانىڭ سەبەپتەرى بىرنەشەۋ. ولاردىڭ ءبىرى – حالىقتىڭ وسال توپتارىنا جاتاتىن ءوڭىر تۇرعىندارىنىڭ باسىم بولىگىنىڭ الەۋمەتتىك جاعدايى. قازىر سونداي 4557 مەكەنجاي ەسەپكە الىندى, وندا 16944 ادام تۇرادى, ونىڭ ىشىندە 4841-ءى بالا. بۇل تۇرعىن ۇيلەردىڭ ورتكە قارسى جاي-كۇيى وتە قاۋىپتى كۇيدە قالۋدا.
ەلەكتر قاۋىپسىزدىگىن تەكسەرۋ بارىسىندا 2956 ۇيدە ەلەكتر جابدىقتارى مەن جىلىتۋ جۇيەلەرىن پايدالانۋ قاۋىپتى جاعدايدا ەكەنى انىقتالدى. بۇگىنگى كۇنى سونداي 618 ۇيدە ەلەكتردەن ءورت شىعۋ قاۋپى جويىلدى. ال حالىقتىڭ الەۋمەتتىك وسال توپتارىنىڭ 2338 ۇيىندە 4964 بۇزۋشىلىق جويىلماعان. ولار تۇراتىن مەكەنجايلارعا كومەك كورسەتۋ شەڭبەرىندە بارلىعى 274 اۆتونومدى داتچيكتەر (191 ۋلى گاز, 83 ءتۇتىن) ورناتىلدى, ال وبلىستىڭ باسقا وڭىرلەرىندە بۇل سان بىرنەشە ەسە اسادى.
ءوزىنىڭ سوزىندە ر.كامالوۆ اعىمداعى جىلى توتەنشە جاعدايلار دەپارتامەنتى جەرگىلىكتى اتقارۋشى ورگاندارمەن, ەرىكتىلەرمەن, جەرگىلىكتى پوليتسيا قىزمەتىمەن بىرلەسىپ, وبلىستىڭ ەلدى مەكەندەرىنىڭ تۇرعىن ءۇي سەكتورىندا ورتتەردىڭ الدىن الۋ بويىنشا ايتارلىقتاي پروفيلاكتيكالىق جۇمىس جۇرگىزگەندەرىن جەتكىزدى. وسى جىلدىڭ 15 تامىز بەن 15 قازانى ارالىعىنداعى ءورت قاۋىپسىزدىگىنىڭ ەكى ايلىعى بارىسىندا رەيدتىك ءىس-شارالارمەن 20 مىڭ تۇرعىن ءۇيدى ارالاپ, نۇسقاۋلىقتار وتكىزىلگەن, ءورت قاۋىپسىزدىگى ەرەجەلەرىن تۇسىندىرەتىن 50 مىڭنان استام جادىناما تاراتىلعان. ادام ءولىمىنىڭ الدىن الۋ ماقساتىندا توتەنشە جاعدايلار دەپارتامەنتى تۇرعىندارعا پەشپەن جىلىتۋعا جانە ەلەكتر سىمدارى مەن ەلەكتر اسپاپتارىنىڭ جارامدىلىعىنا ەرەكشە نازار اۋدارۋ كەرەكتىگىن ەسكەرتكەن.
سولتۇستىك قازاقستان وبلىسى
