وسى جىلدىڭ باسىندا, ياعني 25 قاڭتاردا پرەمەر-ءمينيستردىڭ تاپسىرماسى بويىنشا Kazakh Tourism ۇلتتىق كومپانياسى جەدەل ءوزارا ءىس-قيمىل جاساۋ ماقساتىندا الماتى وڭىرىندە ءتۋريزمدى دامىتۋ جونىندەگى بىرلەسكەن جوبالىق كەڭسە قۇرىپ, وعان الماتى قالاسى مەن الماتى وبلىسى اكىمدىكتەرىنىڭ وكىلدەرى كىردى. تاراپتار تۋريستىك ينفراقۇرىلىم جوبالارىن دايىنداۋ جانە ىسكە اسىرۋ, تاۋ كلاستەرىن قۇرۋ جانە دامىتۋ ءۇشىن كۇش بىرىكتىرۋگە كەلىستى.
وسىعان وراي 24 قازاندا «كولساي كولدەرى», «ىلە – الاتاۋ», «التىن ەمەل», «شارىن», «جوڭعار الاتاۋى» مەملەكەتتىك ۇلتتىق پاركتەرىنىڭ وكىلدەرىن شاقىرۋمەن جوبالىق كەڭسەنىڭ كەڭەيتىلگەن كەڭەسى ءوتىپ, وندا ءاربىر پارك وكىلدەرىنىڭ كەڭسە قۇرامىنا كىرۋى تۋرالى شەشىم قابىلداندى.
وسىلايشا, بىرىككەن جوبالىق كەڭسە الماتى وڭىرىندە ءتۋريزمدى, ونىڭ ىشىندە ەكوتۋريزمدى دامىتۋ جونىندەگى ستراتەگيالىق ورگانعا اينالۋى مۇمكىن. بىرىڭعاي الاڭ قۇرۋ ءتۋريزمدى دامىتۋ, ونىڭ ىشىندە ەكوتۋريزم, ۇلتتىق پاركتەردى تسيفرلاندىرۋ (ينتەرنەتكە قولجەتىمدىلىگى بار wi-fi ايماقتاردى ۇيىمداستىرۋ, بەينەباقىلاۋدى, دابىل تۇيمەلەرىن قامتاماسىز ەتۋ), تۋريستەرمەن, الەۋەتتى ينۆەستورلارمەن, تۋراگەنتتىكتەرمەن, جۇرتشىلىق وكىلدەرىمەن ۇيلەستىرىلگەن جۇمىستى جۇرگىزۋ, ۇلتتىق پاركتەر ءۇشىن – رەيندجەرلەر قىزمەتى, تاۋ ءتۋريزمى نۇسقاۋشىلارى, الپينيزم نۇسقاۋشىلارى ءۇشىن كاسىبي كادرلار دايارلاۋ بويىنشا ماڭىزدى ماسەلەلەردى جەدەل شەشۋگە مۇمكىندىك بەرەدى.
«ەكوتۋريزم بۇكىل الەمدە ايتارلىقتاي ءوسۋ قارقىنىن كورسەتەدى, وعان تۋريستەر تاراپىنان قىزىعۋشىلىق تەك پاندەميانى ەسكەرە وتىرىپ وسەدى. بۇل قازىرگى جاعدايدا حالىقتىڭ اشىق كەڭىستىكتە, تازا اۋامەن, تابيعات قۇشاعىندا بولۋ قاجەتتىلىگىنە بايلانىستى. تيىسىنشە, قازاقستان ىشىندە, ونىڭ ىشىندە ۇلتتىق پاركتەردە تۋريستەر اعىنىنىڭ ءوسۋى تاياۋ جىلدارى ءسوزسىز», دەپ اتاپ ءوتتى Kazakh Tourism ۇك اق باسقارما توراعاسى ەرجان ەركىنباەۆ.
«سوندىقتان مەملەكەتكە ۇلتتىق پاركتەردە ەكوتۋريزمدى دامىتۋ ءۇشىن جاعداي جاساۋ, ونىڭ ىشىندە ءتيىستى ينفراقۇرىلىم, ينۆەستورلار تارتۋ, جەرگىلىكتى ەكوجۇيەگە رەكرەاتسيالىق جۇكتەمەنى تەڭ ءبولۋ بويىنشا شارالار قابىلداۋدى جالعاستىرۋ ماڭىزدى», دەدى ول.
