كەش شىمىلدىعىن ريكاردو امارانتەنىڭ «Longing» («قۇشتارلىق») ءبىر اكتىلى بالەتى اشتى. ادامداردىڭ قارىم-قاتىناسى جايلى وي تولعايتىن بالەتتىڭ الەمدىك پرەمەراسى الىمساقتان بەرى مازالاپ كەلە جاتقان سۇراقتاردىڭ جاۋابىن زاماناۋي حورەوگرافيا ءتىلىنىڭ كومەگىمەن ىزدەۋگە تالپىنىپتى.
«ريكاردونىڭ ءستيلىن ءبىز تولىق مەڭگەرىپ الدىق: ونىڭ بالەتتەرىن قالاي بيلەۋ كەرەگىن ۇمىتقان جوقپىز, سول سەبەپتى حورەوگرافيانىڭ ءوزى قيىنعا سوقپادى. رەپەتيتسيا جىل باسىندا ءوتىپ, كوكتەمدە پرەمەراسى ءوتۋى ءتيىس ەدى, بىراق كارانتين جاريالانعاندىقتان, پرەمەرا كۇنى شەگەرىلدى. ساحناعا قايتا ورالىپ, كورەرمەندى كورۋ, ونىڭ ەنەرگەتيكاسىن سەزىنۋ ەرەكشە قۋانىش سىيلايدى. مەنىڭ ويىمشا, وسى پرەمەرالاردان كەيىن ارتىستەردىڭ ءبارى باقىتقا بولەنگەن شىعار», دەيدى جەتەكشى سوليست فارحاد بوريەۆ.
ريكاردو امارانتەنىڭ ايتۋىنشا, بۇل قويىلىمنىڭ دا كوركەمدىك بەزەندىرىلۋىندە مينيماليزم باسىم. جارىقتى ويناتا وتىرىپ, بالەتمەيستەر مەن جارىق ديزاينەرى روبەرت داۋتوۆ ساحناداعى ارەكەتتى تاماشالاپ وتىرعان كورەرمەندى ءتۇس كورگەندەي اسەردە قالدىردى.
«مۇندايدا ساحناداعى ارەكەت ايقىن كورىنبەيدى, قارا تۇنەك جارق ەتكەن ساۋلەمەن ءبىر ساتكە اشىلادى. وسى اتموسفەرانى ساحنادا جارىق, ءتۇتىن مەن ەكران ارقىلى بەرۋگە تىرىستىق», دەيدى حورەوگراف.
كوستيۋم سۋرەتشىسىنىڭ ايتۋىنشا, بالەتتەگى ءار بەينە كومەك كورسەتىپ, جول سىلتەيتىن سەكىلدى. «اق ءتۇس – ساحناداعى ارەكەتتىڭ ءتۇس ەكەنىن مەڭزەيدى. مۇندا وعان پەرىشتە بەينەسىندەگى ءمىنسىز تۇلعا ەلەستەيدى, قارا ءتۇس شىنايى ءومىردى بىلدىرەدى. ال ءۇشىنشى بولىمدە ارتىستەر ادام ءتانى تۇستەس كيىم كيىپ شىعۋى, بۇل – ماتەريالدىق الەمنەن ادا ادام جانىنىڭ اللەگورياسى. بۇل بولىمدە ادامدار جاندارمەن كەزدەسەدى», دەيدى پاۋلا روزا سانتانا.
«Longing» – ريكاردو امارانتەنىڭ «استانا بالەت» تەاترىنا ارناپ قويعان ونىنشى بالەتى. وسى تۋىندىسىمەن بالەتمەيستەر ەلوردالىق تەاترداعى جۇمىسىن ءتامامدايدى.
ەكىنشى بولىمدە كورەرمەن نازارىنا «Instinct» («ينستينكت») ءبىر اكتىلى بالەتى ۇسىنىلدى. استانالىق كورەرمەن «استانا بالەت» تەاترىنىڭ جەتەكشى ءسوليستى دەۆيد دجوناتاننىڭ قويۋشى-حورەوگراف رەتىندەگى ەڭبەگىمەن العاش تانىستى. «ماعان وسىنشالىقتى سەنىم ارتقانى مەن ءۇشىن زور مارتەبە. بۇل تەاتردىڭ ارتىستەرى عالامات. ولار مەنىڭ ءستيلىمدى, قيمىلدارىمدى جىلدام ۇيرەندى. بۇعان العىسىم شەكسىز, سەبەبى دايىندالۋعا ۋاقىتىمىز وتە از ەدى», دەپ اتاپ ءوتتى حورەوگراف. ابستراكتسيالى بالەتتە حورەوگراف جاقىن ادامىڭنان جىراقتا قالۋ تاقىرىبىن قوزعايدى. قازىرگى پاندەميا مەن شەكارانىڭ جابىلعان تۇسىندا بۇل وتە وزەكتى تاقىرىپقا اينالدى. مۇندا ءبىرتۇتاس مۋزىكا مەن پلاستيكا كەزدەسۋگە اسىق جانداردىڭ ىشكى كۇيىنىشىن سۋرەتتەيدى.
