وسى اۋىلدىڭ بايىرعى تۇرعىنى, ءىى توپ مۇگەدەگى ورىسباي ناۋحانباەۆتىڭ اۋلاسىن جىل سايىن سۋ باسىپ قالادى ەكەن. بىلتىرعى ورازادا اۋىل ازاماتتارى ءوزارا اقىلداسىپ, جاڭا باسپانانىڭ ىرگەتاسىن دا قۇيىپ قويعان ەدى. بىراق بيىلعى كوكتەمدە ۇزدىكسىز جاۋعان نوسەر سۋى اقساقالدىڭ ءۇيىن تولىق باسىپ قالىپتى. وسى اۋىلداعى №92 ورتا مەكتەپ مۇعالىمى ءسابيت ىقىلاسوۆ وسى جاعدايدى فەيسبۋكتەگى پاراقشاسىندا جاريالاعان سوڭ, جەرلەستەرىنىڭ جاعدايىنا الاڭداعاندار قاتارى كۇرت كوبەيگەن.
– اۋىلداعىلار عانا ەمەس, ەلىمىزدىڭ ءار تۇكپىرىندە جۇرگەن ازاماتتار دا حابارلاسىپ, كومەك قولىن سوزاتىنىن جەتكىزدى. سولاي بولدى دا. نەبارى 3 كۇننىڭ ىشىندە 1,6 ملن تەڭگە اقشا جينالدى. وسىلايشا, ءبىزدىڭ قايىرىمدىلىق ىسىمىزگە اۋىلدىڭ ۇلكەن-كىشىسى دە, سىرتتاعى تىلەكشى اعايىن دا ءبىر كىسىدەي اتسالىستى. ءۇيدىڭ قۇرىلىسىن سالۋعا ءبىر تيىن دا اقشا جۇمسامادىق. ءۇيدىڭ ىرگەتاسىن قۇيۋدان باستاپ, كىرپىشىن قالاپ, شاتىرىن جابۋ, سىرتىن سىلاپ-ارلەۋ جۇمىستارىنا دەيىن اۋىلدىڭ جىگىتتەرى اتقاردى. كۇنىنە 100 ادامعا دەيىن كەلگەن ۋاقىت تا بولدى. سوندىقتان بۇل ىسكە اتسالىسقان بارشا ازاماتتارعا اۋىل تۇرعىندارىنىڭ اتىنان العىس ايتامىز, – دەيدى ءسابيت ىقىلاسوۆ.
اسارلاتقان اۋىل ازاماتتارىنىڭ ارقاسىندا ورىسباي ناۋحانباەۆتىڭ وتباسى قازىر جىلى دا جايلى ۇيگە كوشىپ الدى.
– مەن تۋعاننان ءىى توپ مۇگەدەگىمىن. ايەلىم دە – مۇمكىندىگى شەكتەۋلى جان. ءبىز تۇرماق مىنا زاماندا تەپسە تەمىر ۇزەتىن ازاماتتاردىڭ ءوزى ءاپ-ساتتە ءۇي سالىپ الۋى نەعايبىل عوي. سۋ باسقاننان جىل سايىن قابىرعالارى سوگىلىپ بارا جاتقان باسپانامنىڭ جايى قابىرعاما باتىپ, ويلانىپ جۇرگەندە ءۇيدىڭ ىرگەتاسى دا قۇيىلدى, ازاماتتاردىڭ ارقاسىندا كىرپىش پەن اعاش كەلدى. كەرەكتىڭ ءبارىن جىگىتتەردىڭ وزدەرى تاپتى. جەرلەستەرىمنىڭ ارقاسىندا جاقىندا جاڭا ۇيگە قونىس اۋداردىق, – دەيدى ق.ءپىرىموۆ اۋىلىنىڭ تۇرعىنى ورىسباي ناۋحانباەۆ.
ازاماتتار وسى اۋىلدىڭ تاعى ءبىر تۇرعىنى بەكتىلەۋ ىزتىلەۋوۆتىڭ ۇيىنە دە كۇردەلى جوندەۋ جۇمىستارىن جۇرگىزىپ جاتىر. ولار توزىعى جەتكەن باسپانانىڭ ەدەنىن, تەرەزەسىن جانە شاتىرىن تولىق اۋىستىرىپ, قازىر ءىشى-سىرتىن سىلاپ جاتىر.
قىزىلوردا
