يتاليا ارقىلى فرانتسياعا جەتكەن جاس جىگىت شىركەۋدە پىشاقپەن ەكى ادامنىڭ باسىن كەسىپ, ءۇشىنشىسىن بىرنەشە رەت جاراقاتتايدى. ۇشەۋى دە وقيعا ورنىندا كوز جۇمدى. باسىلىمداردىڭ جازۋىنشا, فرانتسيا پرەزيدەنتى ءسوز بوستاندىعىن جالاۋ ەتىپ, مۇسىلمانداردىڭ قۇقىعىن تاپتاۋدا. ەلدەگى كەلەڭسىزدىكتەردىڭ باسى قازان ايىنىڭ ورتاسىندا باستالعان-دى. پاريج كوللەدجدەرىنىڭ بىرىندە ءسوز بوستاندىعى تاقىرىبىن تۇسىندىرگەن مۇعالىم ساباق كەزىندە وقۋشىلارعا مۇحاممەد پايعامباردىڭ (س.ع.س.) كاريكاتۋراسىن كورسەتتى. كوپ ۇزاماي رەسەيدە تۋعان چەشەن ۇلتىنىڭ وكىلى Twitter-دەگى پاراقشاسىندا مۇعالىمدى ولتىرگەنىن جانە جاۋاپكەرشىلىكتى ءوز موينىنا الاتىنىن جازادى.
ودان بولەك قازان ايىندا فرانتسيا بويىنشا 5 قىلمىس تىركەلدى. ۇكىمەت نيتسا, اۆينون, ليون مەن پاريجدە تىركەلگەن وقيعالاردى راديكالدى يسلامشىلاردىڭ ارەكەتى دەپ توپشىلايدى. جالپى, ماكروننىڭ سوڭعى سۇحباتى تەك فرانتسياداعى مۇسىلمانداردىڭ ەمەس, بىرقاتار يسلام مەملەكەتتەرىنىڭ شامىنا تيگەن سىڭايلى. ويتكەنى پاكىستان, ليۆان, تۇركيا, پالەستينادا بەلسەندىلەر الاڭعا شىعىپ, ماكروننىڭ سۋرەتى مەن فرانتسيا بايراعىن ورتەگەن.
