يزمير – تۇركياداعى ەڭ ءىرى ءۇشىنشى قالا. بۇقارالىق اقپارات قۇرالدارىنىڭ حابارلاۋىنشا, جەر سىلكىنىسىنەن كەيىن يزمير قالاسىنىڭ تۇرعىندارى ءتۇندى دالادا وتكىزگەن.
تۇركيا ۇكىمەتى جانىنداعى توتەنشە جاعدايلاردىڭ الدىن الۋ جانە جويۋ باسقارماسىنىڭ حابارلاۋىنشا, 30 قازان كۇنى ءزىلزالا جەرگىلىكتى ۋاقىتپەن 14.51-دە تىركەلگەن. ءدۇمپۋ وشاعى ەگەي تەڭىزىنىڭ جاعالاۋىندا, 16,5 شاقىرىم تەرەڭدىكتە ورنالاسقان كورىنەدى. 15 سەكۋندقا سوزىلعان جەر سىلكىنىسى يزمير قالاسىنان بولەك تۇركيانىڭ باتىسىنداعى كوپتەگەن اۋداندا سەزىلگەن.
تۇركيا ىشكى ىستەر مينيسترلىگىنىڭ حابارلاۋىنشا, جەر سىلكىنىسى سالدارىنان يزمير قالاسىنىڭ بورنوۆا جانە بايراكلى اۋداندارىنداعى بىرنەشە ءۇي قيراعان. تۇركيا ەكولوگيا جانە قالا قۇرىلىسى ءمينيسترى مۋرات كۋرۋمانىڭ كەلتىرگەن دەرەكتەرىنە سۇيەنسەك, قازا تاپقاندار سانى 30-عا جۋىقتادى. بۇدان بولەك, مىڭنان استام ادام جاراقات العان. قۇلاعان ءۇيىندى استىندا قالعانداردى قۇتقارۋ ماقساتىندا تۇركيا ۇكىمەتى 3 ميلليون ليرا ءبولدى. قۇتقارۋ جۇمىستارى ءالى ءجۇرىپ جاتقاندىقتان, اپاتتان قانشا ادامنىڭ زارداپ شەككەنىن ناقتى ايتۋعا ءالى ەرتە. قيراعان 17 تۇرعىن ءۇيدىڭ سەگىزىندە ىزدەستىرۋ-قۇتقارۋ جۇمىستارى اياقتالدى.
ءدۇمپۋ گرەكيا قالالارىندا دا سەزىلگەن. دۇمپۋلەر افينادا دا سەزىلدى. كارلوۆاسيدەگى تەوتوكوس شىركەۋىنىڭ ءبىر بولىگى قيرادى. سونىمەن قاتار گرەكيانىڭ ساموس ارالىندا قاتتى جەر سىلكىنگەن. ارالدا ەكى ءجاسوسپىرىم كوز جۇمدى. باتىس ساموس قالاسىنىڭ مەرى الەكساندروس ليمپەريستىڭ ايتۋىنشا, قابىرعا قۇلاعان كەزدە ءبىر ادام جاراقات العان.
اپاتتىڭ ءدۇمپۋى باسىلعان سوڭ انادولى حالقى جان-جاقتان يزميرگە اعىلىپ, كومەك كورسەتۋگە اسىققان-دى. ءزىلزالا سالدارىنان بۇكىل اۋە رەيسى توقتاپ, تەلەفون بايلانىسى ىستەن شىقتى. سونداي-اق قۇتقارۋشىلارعا كەدەرگى كەلتىرمەس ءۇشىن قالاعا باسقا شاھاردىڭ كولىكتەرىن ۋاقىتشا كىرگىزۋگە تىيىم سالىندى.
جالپى, تۇركيادا ءزىلزالا ءجيى بولىپ تۇرادى. بيىل قاڭتاردا تۇركيانىڭ ەليازىگ پروۆينتسياسىندا بولعان جەر سىلكىنىسىنەن 30 ادام قازا بولىپ, 1600 ادام جارالانعان-دى. 2019 جىلى گرەكيا استاناسى افينادا دا جەر سىلكىنىپ, قالانىڭ ءبىراز بولىگى جارىقسىز قالعان. 1999 جىلى تۇركيانىڭ يزميت قالاسىندا كۇشتى جەر سىلكىنىپ, 17 مىڭ ادام قازا بولعان.
عالىمداردىڭ ەسەپتەۋىنشە, الداعى 30 جىل كولەمىندە ەگەي تەڭىزىندە وتە كۇشتى جەر سىلكىنىسى بولۋى مۇمكىن. ونىڭ سالدارىنان تەڭىزدى جاعالاي قونىس تەپكەن قالالار قاتتى قيراۋى ىقتيمال. مۇنداي اپاتتىڭ بەتىن اۋلاق قىلسىن دەيمىز.
جەر سىلكىنىسىنە بايلانىستى گرەكيانىڭ پرەمەر-ءمينيسترى كيرياكوس ميتسوتاكيس تەلەۇندەۋىن كەيىنگە قالدىردى. رەسمي انكارانىڭ حابارلاۋىنشا, گرەكيا مەن تۇركيا سىرتقى ىستەر مينيسترلەرى تەلەفون ارقىلى سويلەسىپ, اپاتتىڭ سالدارىمەن بىرلەسىپ كۇرەسۋگە كەلىسكەن.
بۇعان دەيىن گرەكيا مەن تۇركيا اراسىندا جەرورتا تەڭىزىنە بايلانىستى داۋ تۋعان بولاتىن. ەللادالار ەلىنىڭ پرەمەر-ءمينيسترى كيرياكوس ميتسوتاكيس تۋيتتەردەگى پاراقشاسىندا «ايىرماشىلىقتارىمىزعا قاراماستان, بۇگىن حالقىمىز اپاتپەن بىرگە كۇرەسەتىن ءساتى كەلدى», دەپ جازدى.
تۇركيا پرەزيدەنتى رەجەپ تايپ ەردوعان دا تۋيتتەردەگى پاراقشاسىندا بارشا گرەك حالقىنىڭ قايعىسىمەن ورتاقتاسىپ, كەز كەلگەن قيىن ساتتە كومەكتەسۋگە ءازىر ەكەنىن جەتكىزدى. «كورشى ەلدەردىڭ قيىن كەزەڭدە كومەك قولىن سوزۋى ومىردەگى باسقا نارسەلەرگە قاراعاندا الدەقايدا قۇندى», دەپ جازدى ەردوعان.
الدىن الا اقپارات بويىنشا, زارداپ شەككەندەر اراسىندا قازاقستان ازاماتتارى جوق. قازاقستاننىڭ تۇركياداعى توتەنشە جانە وكىلەتتى ەلشىسى ابزال ساپاربەك ۇلىنىڭ حابارلاۋىنشا, قازاقستان ەلشىلىگى مەن باس كونسۋلدىعى سول ايماقتا وقىپ جاتقان 147 ستۋدەنتپەن بايلانىس ورناتقان. ولارعا قازاقستاننىڭ قۇرمەتتى كونسۋلى مەن دوستارى قاجەتتى مورالدىق-ماتەريالدىق كومەك كورسەتىپ جاتىر. توتەنشە جاعدايعا بايلانىستى جەدەل كومەك بايلانىستارى ورناتىلدى.
يزميردەگى قايعىلى جاعدايعا بايلانىستى مەملەكەت باسشىسى قاسىم-جومارت توقاەۆ تۇركيا پرەزيدەنتى رەجەپ تايپ ەردوعانعا كوڭىل ايتۋ جەدەلحاتىن جولدادى. پرەزيدەنت قاسىم-جومارت توقاەۆ يزمير پروۆينتسياسىنداعى جەر سىلكىنىسى سالدارىنان قايتىس بولعان جانە زارداپ شەككەن ازاماتتار تۋرالى سۋىت حاباردى تەرەڭ كۇيزەلىسپەن قابىل العانىن جەتكىزىپ, باۋىرلاس تۇرىك حالقىنا شىنايى تىلەكشى ەل رەتىندە, قاجەتتىلىك تۋىنداعان جاعدايدا, قازاق حالقى مەن ۇكىمەتى ءتيىستى كومەك كورسەتۋگە دايىن ەكەنىن مالىمدەدى.
سونداي-اق قازاقستاننىڭ تۇڭعىش پرەزيدەنتى نۇرسۇلتان نازارباەۆ تۇركيا رەسپۋبليكاسىنىڭ پرەزيدەنتى رەجەپ تايپ ەردوعانعا كوڭىل ايتۋ جەدەلحاتىن جولدادى. ەلباسى تۇركيانىڭ يزمير پروۆينتسياسىندا جەر سىلكىنىسى سالدارىنان تۇرعىنداردىڭ زارداپ شەگىپ, قازا بولعانى تۋرالى سۋىت حاباردى كۇيزەلىسپەن قابىلدادى.
