«بيىل ەلوردادا شولەيت, قاراۋسىز قالعان ۋچاسكەلەر مەن سازدى جەرلەر ايتارلىقتاي ازايدى. ولاردىڭ ورنىنا قالا تۇرعىندارى مەن قوناقتارى بوس ۋاقىتىن ءتيىمدى وتكىزۋگە ارنالعان ورىندار پايدا بولدى. اۋلالار مەن قوعامدىق كەڭىستىكتەردى (گۇلباقتارى, جەلەكجولدار, ساياباقتار) اباتتاندىرۋ بويىنشا اۋقىمدى جۇمىس جۇرگىزىلدى. وسى جىلى 760 مىڭ شارشى مەتر (76 گەكتار) جەر اباتتاندىرىلدى! قالا تۇرعىندارىنىڭ تورتتەن بىرىنە سەرۋەندەپ, سپورتپەن اينالىسۋعا ارنالعان قولجەتىمدى جايلى ورىندار پايدا بولدى.
اباتتاندىرۋ كەزىندە قالانىڭ ەسكى بولىگى مەن تۇرعىن الاپتارعا ەرەكشە نازار اۋدارىلدى. مىسالى, حالىق تىعىز ورنالاسقان اۋدانداردىڭ ءبىرى – بايقوڭىر اۋدانىندا 53 اۋلا مەن 13 ءىرى قوعامدىق كەڭىستىك سالىندى. «جاستار» ىقشام اۋدانىندا 50 كوپپاتەرلى تۇرعىن ءۇي كەشەنى ورنالاسقان. وندا 23 اۋلا اباتتاندىرىلدى. كوپشىلىكتىڭ كوڭىلى اۋعان جۇمىستىڭ ءبىرى كوپىر استى كەڭىستىكتەر بولدى. ولاردىڭ ءبىرى ل.ن. گۋميلەۆ اتىنداعى ەۇۋ ماڭىندا ورنالاسقان. ونداعى 3 مىڭ شارشى مەترلىك ورىنعا باسكەتبول, ۆوركاۋت جانە سكەيت-الاڭدار, تەننيس ۇستەلدەرى جانە ت.ب. ورنالاستىرىلعان.
ء«وندىرىس» تۇرعىن الابىندا (لەسوزاۆود) دا وزگەرىستەر ورىن الدى – اۋماقتاعى سازدى جانە 1950 جىلعى ۇيلەردىڭ ورنىنا فۋتبول, باسكەتبول الاڭدارى بار شاعىن ساياباقتار (تايبۋرىل كوشەسى, 9ا, اقبيداي كوشەسى, 11 جانە ت.ب.) سالىندى.
سارىارقا اۋدانىندا - 40 اۋلا جانە 20 قوعامدىق كەڭىستىك. «كوكتال-1» تۇرعىن الابىنداعى جاڭا ساياباقتىڭ كولەمى 16 گەكتار شاماسىندا. وندا سپورت پەن ويىن-ساۋىققا ارنالعان ۇلكەن اۋماقتان بولەك, امفي-تەاتر مەن جاس جۇبايلاردىڭ نەكە قيۋ ءراسىمىن وتكىزۋگە ارنالعان روتۋندا ورناتىلدى, يتپەن سەرۋەندەۋگە ارنالعان ارنايى الاڭ جابدىقتالدى. سونداي-اق, جەلتوقسان, ەسەنبەرلين, جانگەلدين, سەيفۋللين كوشەلەرى, بەيبىتشىلىك داڭعىلى بويىندا ورنالاسقان اۋلالاردىڭ ءبىر بولىگى اباتتاندىرىلدى. بۇل كوشەلەر وڭ جاعالاۋدىڭ رۋحاني اتموسفەراسىن بويىنا سىڭىرگەن ءار ادامعا جاقسى تانىس دەپ ويلايمىن.
الماتى اۋدانىندا – 50-دەن استام اۋلا مەن قوعامدىق كەڭىستىك بار. قالاداعى العاشقى كوپىر كەڭىستىگىنىڭ اۋماعى 8 مىڭ شارشى مەتردەن اسادى جانە ترياتلون مەن پرەزيدەنتتىك ساياباقتار اراسىن بايلانىستىرىپ تۇرعان ارتەريا بولىپ سانالادى. اۋماق سپورت تۇرلەرىنە بولىنگەن. قالا تۇرعىندارى تەپلوحودپەن ءجۇرۋى ءۇشىن پيرستەر ورناتىلدى, مۇندا وزىنە ءتان ەكواۋماق تا بولادى. ازاماتتاردى قابىلداۋ كەزىندە قاجىمۇقان, 15, پەتروۆ, 32, قۇدايبەردى ۇلى, 17/6 كوشەلەرىنىڭ تۇرعىندارى قاراۋسىز قالعان ۋچاسكەلەر دەپ ايتقان بۇل جەرلەر قازىر تۇرعىنداردىڭ سۇيىكتى ورنىنا اينالدى.
ەسىل اۋدانىندا 27 اۋلا جانە 7 قوعامدىق كەڭىستىك بار. «تەلمان», «ۇركەر», «پريگورودنىي» جانە ت.ب. تۇرعىن الاپتارىندا جايلى ورىندار پايدا بولىپ, بۇرىنعى ساياباقتار وزگەردى.
جايلى اۋماقتىڭ, ساياباقتاردىڭ, گۇلباقتارى مەن جەلەكجولدار سانىنىڭ ارتۋى تۇرعىنداردىڭ سپورتپەن بەلسەندى تۇردە اينالىسۋىنا, ال بالالاردىڭ ەرتە جاستان دەنساۋلىعىنا كوڭىل بولۋىنە اسەر ەتەدى.
پاندەميا كەزىندە قالا تۇرعىندارى تازا اۋادا كوبىرەك سەرۋەندەۋ كەرەكتىگىن ءتۇسىندى. جاڭا قوعامدىق كەڭىستىكتەردىڭ ارتىقشىلىعى ولاردى قىستا دا پايدالانۋعا بولادى. كەڭىستىكتەردە مۇز ايدىندارىن جاساپ, باسقا دا قىسقى سپورت تۇرلەرى مەن ويىندارىنا ساي جابدىقتايمىز.
مەملەكەت باسشىسىنىڭ تاپسىرماسىنا سايكەس, اۋلالاردى اباتتاندىرۋعا, كوگالداندىرۋعا ەرەكشە كوڭىل بولەمىز. بيىل 30 مىڭنان استام اعاش جانە 80 مىڭنان استام جاسىل جەلەك وتىرعىزىلدى - قالاداعى ەكواۋماق كولەمى ۇلعايىپ كەلەدى. اباتتاندىرۋ بويىنشا اۋقىمدى جۇمىستاردى كەلەسى جىلى دا جالعاستىراتىن بولامىز», دەپ جازدى التاي كولگىنوۆ.
