ءوزىنىڭ Instagram-داعى پاراقشاسىندا ب. ساعىنتاەۆ ناۋرىزباي اۋدانىنداعى ينجەنەرلىك جانە اۆتوكولىك ينفراقۇرىلىمىنىڭ اۋقىمدى دامۋى ەرەكشە باقىلاۋدا ەكەنىن اتاپ ءوتتى.
«تاياۋ جىلدارى ورتالىق سۋمەن قامتاماسىز ەتۋدى 100%-عا دەيىن جەتكىزۋ مىندەتى تۇر. بۇگىندە ول بار بولعانى 30%-دى قۇرايدى. جۇمىس ساپارى كەزىندە سۋمەن جابدىقتاۋ جانە سۋ بۇرۋ جەلىلەرىنىڭ قۇرىلىسىن تەكسەردىم. «تاستىبۇلاق» ىقشاماۋدانىنداعى جۇمىس جىل سوڭىنا دەيىن اياقتالادى. كەلەسى جىلى «اقجار», «قۇرامىس», «تاۋجولى», «قارعالى», «جايلاۋ», «شۇعىلا» ىقشاماۋداندارىندا جەلىلەر مەن «قارعالى» سۋ دايىنداۋ ستانساسىن سالۋدى جوسپارلاپ وتىرمىز», – دەپ جازدى ب. ساعىنتاەۆ.
ونىڭ ايتۋىنشا, اباي داڭعىلىن مومىش ۇلى كوشەسىنەن قالا شەكاراسىنا دەيىن تەسىپ ءوتۋ جۇرگىزىلۋدە. ۋچاسكەنىڭ جالپى ۇزىندىعى – 5,3 شاقىرىي. ءاشىموۆ كوشەسىنىڭ قيىلىسىندا جولايرىق سالىنىپ جاتىر.
الماتى اكىمى ب. ساعىنتاەۆ جەر قاتىناستارى باسقارماسىنا قۇرىلىس ايماعىنا كىرەتىن جەر ۋچاسكەلەرىن ساتىپ الۋ ماسەلەلەرىن تەزدەتىپ شەشۋدى تاپسىردى. «باتىس باعىتتاعى ترافيكتى جەڭىلدەتۋ ءۇشىن جوبانى كەلەسى جىلى اياقتاۋ مىندەتى تۇر», - دەپ اتاپ ءوتتى شاھار اكىمى.
سونداي-اق كەلەسى جىلى قوناەۆ كوشەسىن قايتا جاڭارتۋدى (جاندوسوۆ كوشەسىنىڭ جالعاسى) ياسساۋي كوشەسىنەن رىسقۇلوۆ كوشەسىندەگى «تاۋسامالى» كەنتىنە دەيىن اياقتاۋ جوسپارلانۋدا. ۇزىندىعى 1,2 شاقىرىم بولاتىن جول 4 جولاقتى بوپ كەڭەيتىلىپ, تروتۋارلار مەن ارىق جەلىسى سالىنادى. اۋداندا قازىر 57 كوشەدەگى 48 شاقىرىم جولعا اسفالت توسەلدى. 147 كوشەگە اعىمداعى جوندەۋ جۇمىستارى جۇرگىزىلدى. 34 كوشەدە جاڭا تروتۋارلار مەن 18,7 شاقىرىم ارىق جەلىلەرى سالىندى.
