قالانىڭ شەتىندەگى اشىق الاڭدا ءبىر جازدىڭ ىشىندە بوي كوتەرگەن جاڭا زاماناۋي ستاتسيونار بۇگىننەن باستاپ ناۋقاستاردى قابىلداي باستادى.
كوروناۆيرۋسقا قارسى كۇرەس شارالارى بارىسىندا سالىنعان جاڭا اۋرۋحانانىڭ ەرەكشەلىگى سول – سىرتتاي قاراعاندا شاعىن عانا ەمدەۋ مەكەمەسى سياقتى.
الايدا ستاتسيوناردىڭ جوعارعى تەحنولوگيالىق زاماناۋي قۇرىلعىلارمەن قامتىلعان ارنايى زەرتحاناسى, دياگنوستيكا ورتالىعى, وتا جاسايتىن ءبولىمى بار. ينفەكتسيالىق ورتالىقتىڭ باستى ەرەكشەلىگى – مۇندا دارىگەرلەر ناۋقاسقا ارنايى قوندىرىلعان پلانشەت ارقىلى قاشىقتان باقىلاۋ جۇرگىزە الادى.
"بۇل ينفەكتسيالىق ستاتسيونار وبلىستىق اۋرۋحاناعا قارايدى. مۇندا ناۋقاستاردى وتتەگىمەن قامتاماسىز ەتۋدىڭ ورتالىقتاندىرىلعان جۇيەسى بار. ياعني, 8 توننا سۇيىق وتتەگى ارنايى تسيستەرناعا قۇيىلىپ, قاجەت بولعان جاعدايدا ءار توسەككە ورناتىلعان قۇرىلعى ارقىلى ناۋقاسقا قوسىلادى. ستاتسيونارداعى قالدىقتاردى جويۋدىڭ ءتيىمدى جولىن قاراستىرۋ دا ەسكەرىلگەن. قالدىقتاردى ۇنتاقتاپ, زارارسىزداندىرىپ, قورشاعان ورتاعا زيان كەلتىرمەۋىن قامتاماسىز ەتەتىن ارنايى جۇيە جۇمىس ىستەپ تۇر.
سوزىلمالى گەمودياليزى بار جانە كوروناۆيرۋسپەن اۋىرعان ناۋقاستاردىڭ قانىن تازارتۋ قاجەت بولعان جاعدايدا, گەمودياليزدەن وتكىزۋ ءۇشىن سۋ تازارتاتىن, سۋ دايىندايتىن بىرەگەي جۇيە بار. ول جانساقتاۋ توسەكتەرىنە قوسۋلى تۇرعاندىقتان, ناۋقاستى مازالاپ باسقا جاققا اۋىستىرۋدىڭ كەرەگى جوق. قابىلداۋ ءبولىمىنىڭ ەرەكشەلىگى تۋرالى دا ايتا كەتكەن ءجون. مۇندا كت قۇرىلعىسى مەن رەنتگەن اپپاراتى تۇر.
بۇل قۇرىلعىلاردىڭ كومەگىمەن اۋرۋحاناعا تۇسكەن ناۋقاس بىردەن نەگىزگى دياگنوستيكالىق زەرتتەۋلەردەن وتەدى. بارلىعى زاماناۋي جەڭىل پلاستيك ماتەريالداردان جاسالعان. سوندىقتان تەز جۋىلىپ, تەز زارارسىزدانادى. ءار پالاتادا 2-3 توسەك قويىلعان. وتە قولايلى, جارىق ء ارى جىلى. ناۋقاستار دارەتحانا, ارنايى تازارتۋدان وتكەن اۋىز سۋمەن قامتاماسىز ەتىلگەن. بۇل ىندەت جۇقتىرعان ناۋقاسقا دا, ونى ەمدەيتىن دارىگەرگە دە پسيحولوگيالىق تۇرعىدان قولايلى جاعداي تۋعىزادى.
قازىر ناۋقاستاردىڭ كوبى امبۋلاتوريالىق جاعدايدا ەمدەلىپ جاتىر. سوندىقتان قازىرشە جاڭا ينفەكتسيالىق ستاتسيوناردىڭ مەديتسينالىق قىزمەتكەرلەر جەتكىلىكتى. الايدا الداعى ۋاقىتتا 200 ناۋقاسقا دەيىن قابىلدايتىن بولساق, بىزگە قوسىمشا مەديتسينالىق قىزمەتكەرلەر مەن پارامەديكتەردى جۇمىسقا الۋعا تۋرا كەلەدى.
ينفەكتسيالىق ورتالىق 200 ناۋقاسقا شاقتالعان. 20 ورىندىق جان ساقتاۋ ءبولىمى, ەندوسكوپيالىق جانە ۋلترادىبىسپەن ەمدەۋ ءبولىمى تاعى بار.
جاڭا اۋرۋحانانى تازا جانە لاس ايماققا ءبولىپ تۇراتىن 8 مودۋل قاراستىرىلعان. ورتالىق عيماراتتارىنىڭ قوس قاپتالىندا ءبىر-بىرىنە قاراما-قارسى ورنالاسقان ەكى ەسىك بار. كوروناۆيرۋس جۇقتىرىپ, اۋرۋحاناعا جەتكىزىلگەن ناۋقاستار ءبىرىنشى ەسىكتەن كىرەدى. ال دەرتىنەن ايىققان ادامدار عيماراتتىڭ ەكىنشى جاعىنداعى باسقا ەسىكتەن شىعادى.
ءبىر قاباتتى اۋرۋحانا عيماراتىنىڭ جالپى اۋدانى 6800 شارشى مەتر بولادى. ايدان نارىمباەۆتىڭ ايتۋىنشا, مۇندا اۋانى تازارتىپ وتىراتىن كەرى جەلدەتكىش ورناتىلعان. ياعني, پالاتاداعى لاس اۋا دالىزگە شىقپايدى. اۋرۋحاناداعى بارلىق اۋا ارنايى زالالسىزداندىرۋ قۇرىلعىسى ارقىلى سۇزگىدەن ءوتىپ, تازارتىلعان كۇيدە دالاعا ءبولىنىپ شىعادى.
قوستاناي وبلىسى
