قوعام • 30 قازان، 2020

ەرىكتىلەر ەرتىستىڭ جاعاسىن جينادى

26 رەت كورسەتىلدى

كەيبىر ادامداردىڭ ساناسىنا «قوقىس شاشپا» دەگەن ەكى-اق ءسوزدىڭ سىڭبەي-اق قويعانى. تابيعاتقا دەگەن جاناشىرلىق بولسا، وسكەمەندەگى ەرتىستىڭ، ۇلان اۋدانىنداعى دۇبىعالىنىڭ، التاي جاقتاعى بۇقتىرما سۋ قويماسىنىڭ جاعالاۋلارىنان جۇزدەگەن قاپ قوقىس شىعار ما ەدى؟!

 

جەلمەن ۇشقان تسەلوفان پاكەتتەر، اياقتىڭ استىندا شاشىلىپ جاتقان پوليەتيلەن بوتەل­كە­لەردىڭ شىرىمەي، ەكولوگيانى عاسىرلاپ ۋلاپ جاتاتىنىن جاقسى بىلەمىز. بىلە تۇرا قوقىس شاشۋدى قويا الماي كەلەمىز. ول دەگەنىمىز، ادامدار اراسىنداعى مادەنيەتتىڭ تومەندىگى شىعار بالكىم، كىم ءبىلسىن؟!  

كەرىسىنشە، وڭىرىمىزدە قور­شاعان ورتاعا جاناشىرلىق تانىتىپ جۇرگەن ازاماتتار دا از ەمەس. از ەمەس دەيمىن، نەگىزىنەن اينالانى لاستاپ جۇرگەندەر از ەمەس. ال وزەن-كولدەردىڭ ماڭايىن تازالاۋعا شىققان ون-جيىرما ازامات شاشىلعان قوقىستى تۇگەلدەي دەرلىك تازالاپ كەتۋلەرى مۇمكىن ەمەس، سا­يىپ كەلگەندە مىندەتتى دە ەمەس. ولار ءوز اينالامىزعا پايدامىز ءتيسىن دەگەن نيەتتە ۇيىمداسىپ، يگى ءىستىڭ باسى-قاسىندا جۇرگەن ەرىكتىلەر. ەرىكتىلەردىڭ قاتارىنا قىزىعۋشىلىق تانىتقان كەز كەلگەن تۇرعىن قوسىلا الادى.

جۋىردا ۆولونتەرلەر قاتارى «ابلاكەتكانىڭ تازا جاعالاۋى» اتتى تاعى ءبىر توپ­پەن تولىقتى. ونى قۇرۋعا مۇرىن­دىق بولعان ابلاكەتكا شاعىن اۋدانىنىڭ تۇرعىنى سۆەتلانا كوروشكو ەدى. ەرتىس جاعالاۋىندا ءجيى سەرۋەندەيتىن ول دەمالۋشىلاردىڭ تاستاپ كەتكەن قالدىقتارىن شاماسى كەلگەنشە، قوقىس كونتەينەرىنە اپارىپ سالىپ جۇرەتىن. بىراق جاعالاۋدا جايراپ جاتقان قوقىس ازايار ەمەس. ءسويتىپ ول جالعىز ءوزىنىڭ جاعالاۋدى تازارتىپ شىعۋعا مۇمكىندىگى جوق ەكەنىن سەزىپ، الەۋمەتتىك جەلىدە توپ قۇرعان.        

– مەن ابلاكەتكادا تۇرا­مىن. ءبىزدىڭ اۋدان ۇلكەن ەمەس. جاعالاۋدى قوقىستان تازارتۋعا اتسالىسىپ جۇرگەن باسقا دا تۇرعىندار بار. بىراق قاتارى­مىز كوبەيسە ەكەن دەپ الەۋمەتتىك جەلىدە توپ قۇرىپ، قالا تۇرعىن­دارىن قۇلاعدار ەتتىم، – دەيدى سۆەتلانا كوروشكو.

جوسپار جۇزەگە اسىپ، ۆولونتەرلەر قاتارى كوبەيە بەردى. ءوز اۋماقتارىن تازارتقان سوڭ ۆولونتەرلەر توبى ورتالىق جاققا ويىسقان. قالا ىشىندەگى استانا كوشەسى بويىمەن ءۇلبى جاعالاۋىمەن ءجۇرىپ وتكەن. ءبىر ءجۇرىپ وتكەندە-اق 111 قاپ قوقىس جيناعان.

– قاتارىمىز ۋاقىت وتكەن سايىن كوبەيىپ وتىردى. كەلەسى جولىندا ءبىزدىڭ توپتى بۇقتىرما سۋ قويماسى مەن دۇبىعالى كولى­نىڭ جاعالاۋلارىن تازالاۋعا شاقىردى. جالپى، ءتورت رەيد بارىسىندا ءبىز 300 قاپتان اسا قوقىس جينادىق، – دەيدى ۆولونتەرلەر توبىن قۇرعان سۆەتلانا.

ۆولون­تەرلەردىڭ ايتۋىنشا، تازالىق جۇمىستارىن جۇرگى­زەتىن اۋماق الدىن الا جوسپارلانادى. ولار جيناقتالعان قال­دىق­­تاردىڭ قوقىس پوليگونىنا ۋاقتلى شىعارىلۋى ءۇشىن قوقىس شىعاراتىن ۇيىمدارمەن كەلىسە­دى. سودان سوڭ ۋاقىتتارى مەن ورىندى تاڭداپ، ىسكە كىرىسەدى.

ۇيىمداستىرۋشىلار باستال­عان يگى ىسكە مۇمكىندىگىنشە كوپ ادام تارتۋدى جوسپارلاپ وتىر. ول ءۇشىن ولار كورنەكى قۇرال­دا­رىن دايىنداپ، تابيعاتتىڭ قالاي وزگەرەتىنىن كورسەتكىسى كەلەدى. «تازا جاعالاۋ» توبىنا قوسىل­عى­­سى كەلەتىن نەمەسە قاپ، قول­عاپ ساتىپ الۋعا كومەكتەسكىسى كەلە­تىن­دەر­دىڭ بارلىعى 8 705 530 17 67 تە­لە­فونىنا حابارلاسا الادى.

 

وسكەمەن

 

سوڭعى جاڭالىقتار

ۇقساس جاڭالىقتار