"ەكى اۋرۋدىڭ بەلگىلەرى وتە ۇقساس. كوروناۆيرۋس بەلگىلەرى دەنە قىزۋىنىڭ كوتەرىلۋى (37,5-38گرادۋس), السىزدىك, باس اۋرۋى, قۇرعاق جوتەل, دەمىكپە, ءيىس, ءدام سەزبەۋ, كەي جاعدايدا ديارەيا دا بولۋى مۇمكىن. دەنە قىزۋىمەن, جوتەلمەن قاتار دەمىكپە بولسا, ونىڭ كوروناۆيرۋس ەكەنىن انىقتاۋعا بولادى. تۇماۋدىڭ ينكۋباتسيالىق كەزەڭى 1-4 كۇنگە دەيىن بولسا, كوروناۆيرۋستا 2 كۇننەن 14 كۇنگە جالعاسادى", دەيدى نۇر-سۇلتان قالاسى اكىمدىگى, شجق "كوپبەيىندى مەديتسينالىق ورتالىق" مكم-ءنىڭ ينفەكتسيونيست دارىگەرى ەلميرا اديشەۆا.
سونىمەن قاتار دارىگەر جۇقپالى اۋرۋداردىڭ اسقىنۋى كۇردەلى اۋرۋلارعا ۇلاسۋى مۇمكىن ەكەنىن دە اتاپ ءوتتى.
"ماسەلەن, تۇماۋ اسقىنسا, وتيت, سينۋسيت, مەنينگيت, پنەۆمونياعا ۇلاسۋى ىقتيمال. ال كوروناۆيرۋس اسقىنسا, وكپە ەمبولياسى, ميوكارديت, پەريكارديت, سپونتاندى پنەۆماتوروكسقا الىپ كەلۋى مۇمكىن", دەيدى دارىگەر.
سوندىقتان دارىگەر ازاماتتارعا اتالعان بەلگىلەردىڭ ءبىرى بايقالسا, دەر كەزىندە قارالۋدى ەسكەرتەدى.
ونىڭ ايتۋىنشا, كوروناۆيرۋسپەن ءبىر رەت اۋىرعان ادام ەكىنشى مارتە دە جۇقتىرىپ الۋى مۇمكىن. ءتىپتى سيمپتومسىز ءوتىپ كەتكەن بولسا دا, ەكىنشى مارتە قيىن ءوتۋى ابدەن مۇمكىن. بۇنىڭ بارلىعى ادام اعزاسىنىڭ يممۋنيتەتىنە بايلانىستى. الايدا, ازىرگە نۇر-سۇلتان قالاسى بويىنشا ەكىنشى مارتە اۋىرعان ادامدار تىركەلمەگەن.
دارىگەردىڭ سوزىنشە, جالپى جۇقپالى اۋرۋلاردىڭ الدىن الۋ ءۇشىن ءتيىستى زەرتتەۋ تاپسىرىپ, دارىگەردىڭ كەڭەسىمەن كومپلەكستى ۆيتامىن قابىلداعان ءجون. يممۋنيتەتتى كوتەرىپ, تازا اۋادا سەرۋەندەپ, جەكە باس گيگيەناسىن ساقتاپ, ماسكا تاعىپ, دۇرىس تاماقتانىپ, ۋاقتىلى ۇيىقتاۋ قاجەت.
ەگەر ناۋقاس ءوزىن ناشار سەزىنىپ, قىزۋى كوتەرىلىپ دەمىكپەنى سەزسە, تىنىس الۋى قيىنداسا دەرەۋ جەدەل جاردەم شاقىرۋى قاجەت. ءتىپتى كوروناۆيرۋس ەمەس, جرۆي بولعان جاعدايدا ناۋقاس وزدىگىنەن ءدارى-دارمەك قابىلداماۋى كەرەك. مىندەتتى تۇردە ۋچاسكەلىك دارىگەرگە بارىپ, تاعايىندالعان ەمدى عانا الۋى قاجەت.
