«التىن قالام» ادەبي جۇلدەسىنىڭ جەڭىمپازدارىن ماراپاتتاۋ شاراسى بيىل العاش رەت جابىق ەسىك جاعدايىندا ۇيىمداستىرىلىپ, سالتاناتتى جيىنعا تەك جەڭىمپازدار مەن جوبا سەرىكتەستەرى جانە جۋرناليستەر شاقىرىلدى. ناۋرىز ايىنىڭ 15-نەن قىركۇيەكتىڭ 15-نە دەيىن قابىلدانعان 600-گە جۋىق شىعارما بايقاۋدىڭ akalam.kz رەسمي سايتىندا جاريالانىپ, وقىرماندار مەن قازىلاردىڭ ساراپتاۋىنان وتكەن. 19 قازاندا جاريالانعان بايقاۋدىڭ قىسقا تىزىمىنە ءار جانر بويىنشا جەتى شىعارمادان ەنگىزىلگەن ەدى. قازىلار شەشىمىمەن سولاردىڭ ىشىندەگى ەڭ ۇزدىك ءبىر شىعارما عانا ماراپاتتالدى.
بەلگىلى جازۋشى تولەن ابدىك «قازاق ادەبيەتىنە قوسقان ەلەۋلى ەڭبەگى ءۇشىن» ماراپاتقا يە بولدى. ال باۋىرجان وسپانوۆ تاعايىنداعان ەسەنقۇل مامانوۆ اتىنداعى باس جۇلدە –
1 ملن تەڭگەنى الماتىلىق زامان تولەۋوۆ جەڭىپ الدى. جازۋشىنىڭ «قاراقۋىس» رومانى «ۇزدىك قازاق رومانى» اتالىمى بويىنشا جەڭىمپاز دەپ تانىلدى.
تاعى ءبىر باستى سىيلىق –
1 000 000 تەڭگەنى بالالار شىعارماشىلىعىنا ارنالعان «دارابوز» بايقاۋىندا وزگەدەن وزا شاپقان پاۆلودارلىق قالامگەر الپىسباي حونج يەلەندى.
– بيىلعى بايگەدە باق سىناعاندار قاتارى بىلتىرعىدان وسكەن جانە ولاردىڭ اراسىندا تانىمال اۆتورلار, قالالىق, وبلىستىق, رەسپۋبليكالىق جانە حالىقارالىق بايقاۋلاردان جۇلدە العان كاسىبي دەڭگەيى جوعارى قالامگەرلەر كوپ بولدى. ءبىر اتاپ وتەرلىگى, بيىل akalam.kz سايتىنا كىرىپ, بايقاۋعا ۇسىنىلعان شىعارمالارمەن تانىسىپ, پىكىر بىلدىرگەندەر قاراسى قالىڭ. سوڭعى ءتورت كۇندە 1 ملن-نان اسا ادام كونكۋرستىڭ رەسمي سايتىن اشىپ وقىعان, – دەيدى «التىن قالام» ادەبي جۇلدەسىن ۇيىمداستىرۋ كوميتەتىنىڭ ديرەكتورى كەنجە جۇمان ۇلى.
ايتۋلى بايقاۋدىڭ ءتۇرلى اتالىمىندا ۇزدىك دەپ تانىلعان اۆتورلار تومەندەگىدەي. «جىلدىڭ ۇزدىك پوەزياسى» ماكينارا حايرۋمعا, «جىلدىڭ ۇزدىك پروزاسى» ەرتاي ايعالي ۇلىنا, «جىلدىڭ ۇزدىك ساتيراسى» الپىسباي حونجعا, «جىلدىڭ ۇزدىك كينوستسەناريى جانە دراماتۋرگياسى» قۋاندىق تۇمەنبايعا, «جىلدىڭ ۇزدىك فانتاستيكاسى جانە دەتەكتيۆ شىعارماسى» سايلاۋ تولەۋوۆكە, «دارابوز» بالالارعا ارنالعان ۇزدىك شىعارما الپىسباي حونجعا, «ۇزدىك قازاق رومانى» زامان تولەۋوۆكە بۇيىردى.
«التىن قالام» ادەبي جۇلدەسى 2009 جىلدان بەرى وتكىزىلىپ كەلەدى. بايقاۋدىڭ ەرەكشەلىگى سول – جوبا ۇيىمداستىرۋشىلارىنىڭ ادەبيەتكە قاتىسى جوق, تەك كىتاپ وقىعاندى ۇناتاتىن وقىرماندار. العاشقى كەزەڭدە شىعارمالار akalam.kz ۆەب-سايتىندا ىرىكتەلدى. ونلاين داۋىس بەرۋ 6 اي بويى جالعاسقان بولاتىن.
الماتى
